Шпанската фармацевтска компанија „Фрамамар“ соопшти дека во стручното списание „Наука“ е објавена рецензија во која се потврдува дека лекот „плитидепсин“ може да биде потенцијално ефикасен во претклиничко лекување на Ковид-19.

Врз основа на научно истражување спроведено во Њујорк, Сан Франциско и Париз, откриено е дека лекот помага да се намали ширењето на вирусот во телото на заразени животни и да се намали концентрацијата на вирусот во белите дробови на животните третирани со „плитидепсин“.

По денешното отворање на берзата, вредноста на акциите на „Фармамар“ скокна за 13 проценти, на 98,5 евра, пренесува „Ројтерс“.

Почнувајќи од среда, 26 јануари, сите патници кои сакаат да влезат во САД мора да имаат негативен тест за коронавирус или документација со која се потврдува дека оздравеле од Ковид-19, објави американската амбасада во БиХ. Документацијата не смее да биде постара од три дена од датумот на поаѓање на летот за Соединетите Американски Држави.

Здравствените власти на Тајван ставија во карантин 5.000 луѓе додека трагаат по изворите на два нови случаи на коронавирус поврзани со нивниот престој во болница.

Официјалните лица рекоа дека не биле во можност да идентификуваат како мажот и сопругата се заразиле по краткиот престој во болницата во Таојуан, близу Тајпеј.

Мажот бил во болница три дена поради здравствени проблеми кои не биле поврзани со коронавирусот, додека сопругата се грижела за него.

Пациентите кои биле отпуштени од болницата помеѓу 6 и 19 јануари, како и лицата кои се грижеле за нив ќе бидат ставени во карантин.

Тајван досега има седум смртни случаи од последиците на коронавирусот и нешто повеќе од 900 заразени, иако е близу Кина каде што започна пандемијата.