Американскиот министер за трговија Хауард Латник призна за време на сведочење пред Сенатот дека го посетил озлогласениот приватен остров на осудениот сексуален престапник Џефри Епстин. Признанието доаѓа и покрај неговите претходни тврдења дека ги прекинал сите контакти со Епстин откако првпат се сретнале во 2005 година, објави „The Hill“.

„Ручав со него додека со брод поминувавме низ таа област за време на семеен одмор“, изјавил Латник. Тој нагласил дека сопругата и децата биле со него за време на посетата во декември 2012 година и дека не бил сведок на никакви сексуални злосторства кои, според наводите, се случувале на приватниот остров.

„Бев на островот со семејството“

„Сопругата беше со мене, како и нашите четири деца и дадилки. Таму беше и уште еден пар со своите деца. Ручавме на островот. Тоа е вистина, поминавме околу еден час и си заминавме – сите заедно“, сведочел Латник пред сенаторите, додавајќи: „Не се сеќавам зошто отидовме таму.“

Неколку демократски сенатори ги доведоа во прашање неговите претходни тврдења дека го прекинал контактот со Епстин пред повеќе од 20 години. Тие посочија дека неговото име повеќепати се појавува во документи поврзани со Епстин, кои неодамна ги објави Министерството за правда.

Некои од документите упатуваат дека Латник го посетил островот во 2012 година, откако Епстин се изјаснил за виновен за поттикнување малолетничка на проституција. Електронски пораки покажале дека Латник бил поканет на островот во декември 2012 година, а помошничката на Епстин подоцна напишала: „Ми беше драго што ве видов.“

Сенаторот Крис Ван Холен изјави дека новообјавените документи ја доведуваат во прашање веродостојноста на Латник како сведок пред Конгресот.

„Наслутивте дека сте го прекинале секој контакт со Џефри Епстин по средбата во 2005 година во неговиот стан. Како што знаете, документите покажуваат сосема поинаква слика“, рекол Ван Холен.

Претходно тврдеше дека немал контакт

Латник претходно изјавувал дека бил вознемирен од карактерот на Епстин уште при првото запознавање во Њујорк, кога, како што рекол, Епстин давал сексуални алузии.

„Во следните 14 години, колку што се сеќавам, го сретнав уште двапати. Двапати. Шест години воопшто не го видов. Шест години подоцна повторно се сретнавме, па една и пол година подоцна – и никогаш повеќе“, сведочел Латник. „Од милиони документи, има можеби десет мејлови што ме поврзуваат со него. Во 14 години немав никаква врска со него“, рекол тој.

Но Ван Холен оценил дека новите информации не се совпаѓаат со претходните изјави.

На директното прашање дали навистина го посетил приватниот остров на Епстин, Латник признал дека бил таму.

„Не видов сомнително однесување“

Министерот инсистирал дека не видел никакво сомнително или незаконско однесување.

„Единственото што го видовме – јас, сопругата, децата и другиот пар со нивните деца – беа вработени кои работеа за господинот Епстин на островот“, рекол тој.

Ван Холен истакнал дека посетата се случила откако Епстин веќе бил осуден за поттикнување малолетничка на проституција. Сенаторот прашал и за документ што сугерира дека Латник присуствувал на вечера со Вуди Ален во резиденцијата на Епстин во 2011 година.

„Не“, одговорил Латник, додавајќи дека пронашол документ што наведува средба во мај во 17 часот, „но не вечера или нешто слично“.

Претседателот на САД, Доналд Трамп се јавил во полицијата во Палм Бич, Флорида, кратко откако во средината на 2000-тите била покрената истрага против Џефри Епстин, за да им изрази благодарност, открива новооткриен документ.

„Фала му на Бога што го запирате“, наводно рекол Трамп, додавајќи: „Сите знаеја дека го прави тоа“, објави Си-Ен-Ен.

Документот претставува писмен запис од разговор на ФБИ со поранешниот началник на полицијата во округот Палм Бич и би можел да отвори дополнителни прашања за тоа што и кога точно Трамп знаел за Епстин и неговите злосторства. Претседателот Трамп и Белата куќа повеќепати тврдеа дека тој ги прекинал сите врски со Епстин во раните 2000-ти затоа што го сметал за „морничав тип“.

Според „Мајами Хералд“, кој прв ја објави приказната, во документот е забележан разговор со Мајкл Рајтер, чие име во списите било редактирано. Рајтер бил началник на полицијата во Палм Бич во времето на повикот.

Во разговорот, Трамп наводно рекол дека луѓето во Њујорк знаеле дека Епстин е „одвратен“. За неговата соработничка Гислеин Максвел рекол дека е „оперативец на Епстин“, додавајќи: „Таа е зла и на неа треба да се фокусираме.“

Во документот се наведува и дека Трамп раскажал како еднаш се нашол во близина на Епстин во присуство на тинејџерки и побегнал. Наводно бил меѓу првите луѓе кои се јавиле во полициската станица во Палм Бич по објавувањето на истрагата против Епстин.

Документот е дел од милиони страници што Министерството за правда ги објави врз основа на нов закон донесен од Конгресот.

Белата куќа барањето за коментар го препратила до Министерството за правда. Од Министерството изјавиле: „Не сме запознаени со какви било поткрепувачки докази дека претседателот контактирал со полицијата пред 20 години.“

Прашањето што Трамп знаел за Епстин и неговите злосторства повторно е во фокусот поради обновениот интерес на јавноста и објавувањето милиони страници документи поврзани со починатиот осуден сексуален престапник.

Трамп претходно изјавувал дека тој и Епстин биле пријатели во 1990-тите и се движеле во истите кругови во Палм Бич, сè додека не се скарале во раните 2000-ти. Според Трамп, конфликтот довел до тоа Епстин да добие забрана за влез во неговиот клуб „Мар-а-Лаго“.

Трамп тврди дека до кавгата дошло затоа што Епстин му „преземал вработени“, но негира дека знаел нешто за неговите злосторства. „Не ми се допаѓа концептот луѓе да ми земаат персонал“, изјавил Трамп во јули. „Луѓе беа одведени од спа-центарот, тој ги вработи, со други зборови, си заминаа.“

„Кога слушнав за тоа, му реков дека не сакаме да ни зема луѓе – од спа-центарот или од каде било. Тој се согласи, но набрзо повторно го направи тоа и му реков: Бегај одовде’“, раскажал Трамп.

Во еден момент тој навестил дека една од тие лица можеби била Вирџинија Џуфре, една од најпознатите жртви на Епстин, но подоцна изјавил дека не знае зошто тие жени го напуштиле неговиот клуб.

Наводниот опис на Максвел како „зла“ е во спротивност со реакцијата на Трамп по нејзиното апсење во 2020 година, кога изјави: „И посакувам сè најдобро.“ Максвел во моментов издржува долга затворска казна за трговија со луѓе за сексуална експлоатација.

Нејзиниот адвокат изјавил дека би била подготвена „целосно и искрено да зборува ако претседателот Трамп ѝ додели помилување“. Во разговор со заменик-државниот обвинител Тод Бланш, Максвел изјавила дека „апсолутно никогаш“ не слушнала ниту од Епстин ниту од некој друг дека Трамп направил нешто непримерно.

Во јули, Трамп за Си-Ен-Ен изјавил дека не размислувал за помилување или намалување на казната на Максвел, иако не ја исклучил можноста. „Тоа е нешто за што не сум размислувал“, рекол. „Имам право да го направам тоа, но не сум размислувал за тоа.“

На социјалните мрежи се шири тврдење дека новообјавени документи покажуваат оти американските власти подготвиле соопштение за смртта на Џефри Епстин еден ден пред да биде пронајден мртов, што според тие објави наводно имплицира дека Епстин е сè уште жив. Како „доказ“ се наведува документ на американското Министерство за правда во кој се споменува датумот 9 август 2019 година – ден пред Епстин да биде пронајден мртов во затворска ќелија.

Би-Би-Си Verify ја провери оваа информација и заклучи дека станува збор за погрешно толкување на интерен нацрт-документ, а не за доказ дека смртта на Епстин била лажирана или однапред планирана.

Спорниот документ и датумот што ги поттикна теориите

Повод за новите шпекулации бил нацрт-соопштение на американското Министерство за правда, вклучено во најновата серија декласифицирани документи за Епстин. Во документот се наведува дека Епстин бил „пронајден без свест во својата ќелија“ во затвор во Њујорк, а како датум стои петок, 9 август 2019 година.

На социјалните мрежи тоа било протолкувано како наводен доказ дека американските власти однапред знаеле за неговата смрт или дека во тој момент тој воопшто не се наоѓал во ќелијата.

Што велат официјалните наоди?

Сепак, како што наведува Би-Би-Си Verify, сите релевантни службени документи потврдуваат дека Џефри Епстин бил пронајден мртов во сабота, 10 август 2019 година. Тоа вклучува декласифициран извештај на ФБИ за неговата смрт во притвор, обдукциски наод, интерни затворски документи, како и службени фотографии од местото на настанот.

Во ниту еден од тие документи не се појавува датумот 9 август како ден на неговата смрт или пронаоѓање на телото.

Министерството за правда: Станува збор за грешка во нацрт

Американското Министерство за правда му потврдило на Би-Би-Си Verify дека спорниот датум е резултат на грешка во интерен нацрт-документ кој никогаш не бил наменет за јавна објава. Според нивното објаснување, нацрт-верзиите на службената изјава почнале да циркулираат преку интерни електронски пораки во Канцеларијата на американскиот државен обвинител за јужниот округ на Њујорк дури на 10 август 2019 година, по смртта на Епстин.

„Иако првичните верзии на изјавата содржеа претходен датум, станува збор за несреќна административна грешка која подоцна била исправена пред објавувањето на службеното соопштение“, соопштиле од Министерството за правда за Би-Би-Си Verify.

Додале и дека тврдењата оти изјавата била подготвена пред смртта на Епстин се неточни.

Како грешката станала јавна

Спорниот документ бил интерен нацрт што останал зачуван во архивата на електронската комуникација и подоцна бил вклучен во објавените судски списи. Токму тоа овозможило погрешниот датум да стане видлив за јавноста и да послужи како повод за нови теории на заговор.

Би-Би-Си Verify нагласува дека нема никакви докази кои би упатувале на тоа дека смртта на Епстин била фалсификувана или дека тој преживеал, како што се тврди во виралните објави.

Заклучокот на Би-Би-Си Verify е јасен: погрешниот датум во интерниот нацрт-документ е резултат на административна грешка, а не доказ за заташкување или лажирање на смртта на Џефри Епстин. Сите релевантни и службени наоди потврдуваат дека тој починал на 10 август 2019 година во затвор во Њујорк, како што тогаш и официјално беше објавено.