Свет
Гренланд распишува општи избори: „Ќе го почнеме процесот на независност“

Премиерот на Гренланд, Муте Егеде, денеска објави дека на полуавтономната данска територија ќе се одржат општи избори на 11 март, бидејќи американскиот претседател Доналд Трамп покажува интерес за купување на арктичкиот остров.
Главните прашања во изборната кампања се очекува да бидат аспирациите на Гренланд за независност и односите со Данска и САД, како и кревката економија која зависи од риболовот и данските субвенции.
Оживувајќи ја идејата што ја даде за време на неговиот прв мандат во 2019 година, Трамп минатиот месец ја изрази својата желба да го „придобие“ стратешки важниот остров, оставајќи ја отворена можноста за употреба на воена или економска сила за да се постигне тоа.
Гренланд, кој има огромни неискористени минерални ресурси, рече дека е отворен за деловни предлози, но дека не сака да биде дел од Соединетите држави. Како одговор на интересот на Трамп и стравувањата од странско мешање, парламентот во вторникот забрани странски и анонимни донации за политички партии.
Интересот на САД, исто така, ги поттикна пратениците да ги заострат регулативите за странските недвижности и инвестициите во недвижности оваа недела. „Поминуваме низ многу сериозен период, каков што никогаш не сме доживеале. Ова не е време за внатрешни поделби“, рече премиерот Егеде во објавата на социјалните мрежи во која не се споменува Трамп.
Движењето кон целосна независност од поранешниот колонијален владетел Данска доби на интензитет во последниве години. Егеде, кој ќе наполни 38 години на денот на изборите, ја поддржува независноста, но не предложи план за постигнување на таа цел. Тој ја предводи владејачката коалиција составена од неговата левичарска партија Инуит Атакатигиит и социјалдемократската партија Сиумут.
Иако сите пет парламентарни партии ја поддржуваат независноста, тие не се согласуваат како и кога треба да се постигне. Само опозициската партија Налерак, која во моментов има пет места во парламентот од вкупно 31, сака веднаш да ги прекине односите со Данска. „Најважниот дел од нашата изборна кампања ќе биде да го започнеме процесот на независност од Данска“, изјави за Ројтерс лидерот на партијата Налерак, Пеле Броберг.
Мнозинството жители на Гренланд би гласале за независност доколку сега се одржи таков референдум, покажа неодамнешната анкета спроведена од Verian и нарачана од медиумите.
Сепак, анкетата, исто така, покажа дека 45 отсто би се спротивставиле на независноста доколку тоа негативно влијае на животниот стандард, што укажува на тоа дека патот до независноста останува неизвесен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија вели дека НАТО мора да го повлече ветувањето од 2008 година за членство на Украина

Русија сака НАТО да го повлече ветувањето од 2008 година дека еден ден ќе ѝ даде на Украина членство во воената алијанса предводена од САД, а Киев да се согласи на неутралност, изјави портпаролката на руското Министерство за надворешни работи, Марија Захарова.
Членството на Украина во НАТО е неприфатливо за Русија, рече таа.
„Треба да се нагласи дека сега не е доволно одбивањето да се прими Киев во НАТО“, рече Захарова во одговор на прашање на Ројтерс.
„Алијансата мора да го повлече ветувањето од 2008 година во Букурешт, во спротивно овој проблем ќе продолжи да ја труе атмосферата на европскиот континент“, рече таа.
Захарова додаде дека Украина мора да се врати на позицијата утврдена во нејзината декларација за суверенитет против Советскиот Сојуз во 1990 година, во која Киев рече дека ќе стане трајно неутрална земја, која нема да учествува во воени блокови или да поседува нуклеарно оружје.
„Она што Украина треба да го направи е да се врати на корените на својата државност и да го следи словото и духот на (тие) документи“, рече Захарова.
„Тоа би била најдобрата гаранција за нејзината безбедност“, рече таа, додавајќи дека ниту членството во НАТО, ниту западната интервенција „под маската на мировен контингент“ нема да ѝ дадат таква безбедност на Украина.
НАТО објави на самитот во Букурешт во април 2008 година дека и Украина и Грузија ќе се приклучат на алијансата предводена од САД, но не даде временска рамка или план за постигнување на таа цел.
Русија постојано го наведува постсоветското проширување на НАТО, а особено амбициите на Украина за членство, како причина за војната во Украина.
Свет
По четири и пол часа заврши состанокот помеѓу САД и Русија, стигаат првите реакции

Советникот за надворешна политика на рускиот претседател Владимир Путин изјави дека четири и пол часовните разговори меѓу Русија и САД во Саудиска Арабија завршиле и биле успешни.
Јуриј Ушаков рече дека двете страни разговарале за условите за средба меѓу Путин и американскиот претседател Доналд Трамп, пренесе руската новинска агенција ТАСС.Средбата меѓу Путин и Трамп најверојатно нема да се одржи следната недела, рече Ушаков.
„Не е лошо, не е лошо… тешко е да се каже дали ние (Русија и САД) се зближивме, но разговаравме за тоа… Тоа беше многу сериозна дискусија за сите прашања што сакавме да ги допреме… Се согласивме да ги земеме предвид взаемните интереси и да развиеме билатерални односи, бидејќи и Москва и Вашингтон се заинтересирани за тоа“, додаде во изјава за руската државна телевизија.
Тој рече и дека се договориле специјален тим од преговарачи да воспостави контакт во догледно време.
Кирил Дмитриев, шеф на рускиот фонд за директни инвестиции, за руската државна телевизија изјави:
„Почна многу позитивен, конструктивен дијалог. За разлика од администрацијата на Бајден, која никогаш не се обиде да ја слушне руската позиција, ова беше многу јасен обид да се започне дијалог, да се разбере руската позиција и да се разговара за работи за кои се согласуваме“, рече тој.
Регион
(Видео) Стјуардеса од Белград била во превртениот авион во Торонто, во критична состојба е

Стјуардесата Вања Вичентијевиќ (32) од Белград е тешко повредена во несреќата со авионот на аеродромот во Торонто. Таа е во критична состојба и се бори за живот, јавуваат српските медиуми.
Стјуардесата Вања Вичентијевиќ (32) од Белград е една од тешко повредените во несреќата кога авион на „Делта ерлајнс“ се превртел при слетување на меѓународниот аеродром Пирсон во Торонто, Канада.
Редакцијата на „Блиц“ стапила во контакт со семејството на Вања, а за неа знаат само дека е во болница и е во многу критична состојба, што значи дека лекарите се борат за нејзиниот живот.
„Вања работеше како стјуардеса на летот 4819, а при слетувањето на аеродромот Принстон во Торонто беше тешко повредена. При превртувањето на авионот, таа сега е без свест. Нејзината состојба е многу критична, а таа се бори за живот. Толку ни кажаа од болница, друго не знаеме“, изјави за „Блиц“ нејзината братучетка Мирјана Дориќ.
Additional CCTV Footage from Toronto Pearson International Airport has been released, showing yesterday’s crash-landing of a Delta Air Lines CRJ-900LR operated by Endeavor Air, which amazingly resulted in only 15 Injuries. pic.twitter.com/PsaJGk4BVf
— OSINTdefender (@sentdefender) February 18, 2025
Според Мирјана, Вања, која по потекло е од Сопот, моментално се наоѓа во болницата во здравствениот центар Пирсон, откако се здобила со повреди во авионската несреќа.
„Бараат некој од семејството да оди таму за детали. Ништо друго не дознавме од медиумите. Семејството е очајно, се надеваме на најдоброто и дека ќе се извлече. Толку ни остана“, вели за „Блиц“ братучетката Мирјана Дориќ.
Според последните информации, најмалку 18 лица се повредени, од кои три потешко, откако вчера при слетување на меѓународниот аеродром Пирсон во Торонто се превртел авион со кој управувала американската компанија „Делта ерлајнс“.
Меѓу тројцата тешко повредени има и едно дете кое со возило на брза помош било пренесено во детската болница во Торонто. За среќа, сите 80 патници преживеале, а за време на инцидентот виселе наопаку.
Истрагата за несреќата ќе ја водат канадските власти, бидејќи се случила на канадска територија. Детали за причините за инцидентот се уште не се познати.