Унгарскиот премиер Виктор Орбан испрати новогодишна порака до европските земји во која посака континентот да се врати на „здравиот разум“ во 2026 година, со јасна порака дека мирот мора да биде приоритет пред понатамошната ескалација на конфликтот.

„Среќна Нова Година! Нека 2026 година биде годината во која владее мирот и Европа се враќа на здравиот разум!“ напиша Орбан на Икс.

Унгарскиот премиер испрати слична порака за време на божиќните празници, нагласувајќи дека посветеноста на Будимпешта кон мирот треба да послужи како пример и поттик за остатокот од Европа, како што изјави, „да оди по вистинскиот пат“. Долго време Орбан го застапува ставот дека конфликтот во Украина не може да се реши со воени средства, туку исклучиво преку дипломатски канали, анализираат медиумите.

Во пресрет на Нова Година, тој исто така процени дека во 2026 година може да има реална можност за склучување мировен договор за украинското прашање меѓу Русија и Соединетите Американски Држави, но предупреди дека Европската Унија може да остане надвор од клучните преговарачки процеси.

Според Орбан, постои длабока дивергенција во ставовите меѓу Вашингтон и Брисел за прашање од стратешко значење – вооружен конфликт на европско тло. Тој верува дека американскиот претседател Доналд Трамп го претставува концептот за мирно решение и прекин на војната, додека институциите на Европската Унија, како што тврди, продолжуваат да инсистираат на политиката на продолжување на борбите, дури и ако Соединетите Американски Држави се откажат од директно учество.

Ставовите на Орбан, кои честопати се разликуваат од официјалната линија на Брисел, овој пат се во фокусот на европската јавност, особено во контекст на сè поизразените поделби во рамките на ЕУ во врска со понатамошниот тек кон Украина и односите со главните глобални актери.

Според последните информации од светските агенции, во моментот на експлозијата и пожарот во барот и салонот „Ле Констелашн“, сместен во алпскиот скијачки центар Кран-Монтана во Швајцарија, во објектот имало повеќе од 100 лица. Иако капацитетот на барот бил поголем од 300 лица, точниот број на присутни во тој момент сè уште не е официјално потврден.

Во утринската изјава, полицијата изјави дека службите за итни случаи се сè уште на терен и дека е во тек обемна спасувачка операција. Голем број полициски, противпожарни и спасувачки екипи се испратени на местото на несреќата за да им помогнат на повредените. Областа околу објектот останува целосно обезбедена и затворена за јавноста, а воведена е и привремена забрана за летови над скијачкиот центар Кран-Монтана.

🇨🇭🔥🎉 ALERTE INFO – Une explosion a déclenché un incendie dans un bar de Crans-Montana (VS) lors des festivités du Nouvel An, faisant plusieurs morts et blessés graves. (Blick) pic.twitter.com/GKiGZfTETs

— SuisseAlert (@SuisseAlert) January 1, 2026

Швајцарската полиција потврди за „Скај њуз“ дека најмалку 10 лица загинале во експлозијата. Исто така, беше нагласено дека овој настан не се третира како терористички напад. Портпаролот на полицијата претходно изјави дека има „многу повредени и многу мртви“.

Експлозијата и пожарот се случија за време на новогодишната прослава во барот „Ле Констелашн“, а последиците беа тешки. Лекар од Швајцарската воздушна служба за брза помош и спасување изјави за националната телевизија РТС дека болниците се преполни со пациенти со тешки изгореници.

Францускиот претседател Емануел Макрон во своето традиционално новогодишно обраќање до нацијата изјави дека има три желби за 2026 година, единство, сила и надеж, објавија локалните медиуми.

„Нашата историја нè учи дека можеме да надминеме сè, да се соочиме со сè, ако знаеме како да останеме обединети. Затоа, никогаш да не заборавиме дека нашите причини за заеднички живот се посилни секој ден од она што може да нè раздели“, рече Макрон за време на неговото деветто и претпоследно новогодишно обраќање до францускиот народ.

Зборувајќи за меѓународната ситуација, каде што се среќава „враќање на империите и доведување во прашање на меѓународниот поредок“, Макрон ја нагласи одбраната на француската „независност и слободи“, залагајќи се за забрзување на „европската одбрана“.

„Европската одбрана долго време е предмет на дебата, а во следната година, 2026 година, ќе се забрза, почнувајќи од 6 јануари во Париз, кога бројни европски и сојузнички земји ќе дадат конкретни обврски за заштита на Украина и обезбедување праведен и траен мир на европскиот континент“, рече Макрон.

Францускиот претседател повика на заштита на „индустриска и земјоделска Европа преку воспоставување фер и еднакви трговски правила со остатокот од светот“.

Макрон ја изрази својата „желба за надеж“ за 2026 година, повикувајќи ги луѓето да не се откажуваат од „напредокот што е сè уште можен, под услов да се гради, да се работи напорно, да се инвестира на долг рок и да се препознае дека вистинскиот напредок не се постигнува преку ноќ“.

„Да не се откажуваме од хармонизирањето на климата, биодиверзитетот, растот и независноста“. Да не се откажуваме од тоа да бидеме пообединета и побратска нација“, нагласи францускиот претседател.