Двајца новинари од францускиот весник „Ле Монд“ добија сериозни повреди кога гранати на азербејџанските сили погодија група репортери што известуваат за конфликтот меѓу Ереван и Баку за спорниот регион Нагорно-Карабах, пренесува РТ.

Новинарите работеле во Мартуни, во источниот дел на спорната територија, кога азербејџанската војска го погодила градот со воздушен напад. Двајца ерменски репортери исто така се повредени во инцидентот, а еден локален полицаец загинал.

Двајцата новинари биле итно пренесени во болница во Степанакерт – најголемиот град во Нагорно-Карабах и неговиот де факто главен град. Повикувајќи се на ерменски службеник, „Ројтерс“ објави дека еден од репортерите е во тешка состојба. Новинарите снимале цивили во Мартуни кога биле погодени.

Францускиот претседател, Емануел Макрон, рече дека центарот за кризи на Министерството за надворешни работи е мобилизиран и дека медицинскиот авион е подготвен да ги врати повредените репортери дома што е можно побргу.

„Правиме сè за да ги стабилизираме ранетите на самото место пред да дозволиме нивна евакуација“, рече францускиот лидер пред самитот на ЕУ во Брисел.

Urgent❗️: 2 reporters (citizens of #France) from @lemondefr got injured in #Martuni region of #Artsakh from #Azerbaijani bombardment. They are being transported to the hospital.

— MFA of Armenia?? (@MFAofArmenia) October 1, 2020

Во засебен инцидент автомобил, во кој се превезувала група вработени во агенцијата „Франс прес“, исто така бил погоден од азербејџанските сили, јавуваат ерменските медиуми. Новинарите успеале да излезат од возилото неповредени.

Десетици воени и цивилни жртви се пријавени од обете страни за време на петдневните интензивни борби меѓу двете јужни кавкаски држави, кои меѓусебно се обвинија дека напаѓаат цивилно население.

#Martuni Les deux journalistes du « Monde » blessés dans le Haut-Karabakh en cours d’évacuation vers Erevan puis Paris >> https://t.co/YwfGqV32I0

— Le Monde (@lemondefr) October 2, 2020

Ескалацијата на насилството е последниот екцес во деценискиот конфликт меѓу Ереван и Баку за Нагорно-Карабах, меѓународно признат дел од Азербејџан, мнозински населен со етнички Ерменци, кои бараат независност од Баку.

Неодамнешните случувања предизвикаа загриженост кај светските лидери, а Москва, Париз и Вашингтон заеднички ги повикаа двете страни веднаш да престанат со насилството и да се вратат во дипломатијата. Анкара, пак, вети целосна поддршка за својот долгогодишен сојузник Азербејџан.