Портпаролот на Кремљ, Дмитриј Песков, денес изјави дека транзицијата на Европа кон поскапи извори на енергија наместо руски гас ќе го забрза губењето на нејзиниот економски потенцијал и ќе доведе до пад на конкурентноста на Европската Унија.

„На овој начин, Европа се осудува на значително поскапи извори на енергија, што неизбежно ќе има последици за европската економија и ќе доведе до намалување на конкурентноста. Ова само ќе го забрза процесот што веќе е забележан во последните години, а тоа е губење на водечката позиција на европската економија“, рече Песков, одговарајќи на прашање за реакцијата на Кремљ на изјавата на претседателката на Европската комисија, Урсула фон дер Лајен, дека Европа повеќе нема да зависи од рускиот гас, пренесува РИА Новости.

Тој истакна дека ако Европа го одбие гасот од Русија, таа ќе биде зависна од извори на енергија кои се поскапи, а понекогаш и значително поскапи, од рускиот гас.

Европскиот совет денес објави дека е постигнат договор со Европскиот парламент за постепено укинување на увозот на руски гас до 2027 година, како дел од напорите за ставање крај на енергетската зависност од Русија.

Регулативата претставува правно обврзувачка, фазна забрана за увоз и на течен природен гас (LNG) и на гас преку цевководи од Русија, со целосна забрана што ќе започне кон крајот на 2026 година за LNG и есен 2027 година за цевководи.

Како што е наведено во соопштението, ова придонесува за општата цел за постигнување на отпорен и независен енергетски пазар на ЕУ, а воедно и за одржување на безбедноста на снабдувањето.

Привремениот договор сега треба да биде одобрен од Советот и Парламентот пред неговото формално усвојување.

Учеството на рускиот гас во увозот на ЕУ беше 12 проценти во октомври, значително помалку од околу 45 проценти пред почетокот на војната во Украина во 2022 година, пренесува Танјуг.

Фото: ЕПА

Претседателката на Европската комисија (ЕК), Урсула фон дер Лајен, изјави дека денес Европа влегува во ера на целосна енергетска независност од Русија, откако Европејците постигнаа договор за прекин на увозот на руски гас до есента 2027 година.

„Денес е историски ден за Унијата. Синоќа постигнавме принципиелен договор за предлогот на Комисијата за постепено укинување на руските фосилни горива. Вртиме нова страница, засекогаш. Ова е зората на нова ера, ера на целосна енергетска независност на Европа од Русија“, изјави Фон дер Лајен на прес-конференција, пренесува „Фигаро“.

Според неа, планот REPowerEU донесе резултати.

„Тој нè заштити од најлошата енергетска криза во последните неколку децении и ни помогна да преминеме од руски фосилни горива на други со рекордна брзина. Денес трајно го запираме тој увоз. Со исцрпувањето на воениот фонд на Путин, се солидаризираме со Украина и го фокусираме нашето внимание на нови енергетски партнерства и можности за тој сектор“, рече таа, како што е објавено на веб-страницата на ЕК.

Таа нагласи дека ЕУ „конечно и засекогаш ја затвора славината за руски гас“.

„Европа избра енергетска безбедност и независност. Никогаш нема да се вратиме на нашата опасна зависност од Русија. Никогаш нема да се вратиме на нестабилни снабдувања и манипулација на пазарот. Никогаш нема да се вратиме на енергетска уцена и економска изложеност. И ние сме посилни од кога било со Украина во нејзината потрага по слобода“, рече фон дер Лајен.

Ден Јергенсен, комесар за енергетика и домување, рече дека Европската Унија ефикасно и трајно ќе го суспендира увозот на руски гас и ќе се движи кон постепено укинување на руската нафта во согласност со привремениот политички договор постигнат денес од Европскиот парламент и Европскиот совет.

„Оваа историска одлука ќе стави крај на зависноста на ЕУ од несигурен снабдувач, кој постојано ги дестабилизираше европските енергетски пазари, ја загрозуваше безбедноста на снабдувањето со енергија со уцена и ѝ штетеше на европската економија. Како што е наведено во планот REPowerEU, целосното повлекување од руските фосилни горива е клучен чекор за да се обезбеди енергетската независност, конкурентноста, отпорноста и стабилноста на пазарот на Европа“, рече тој.

Денешната спогодба обезбедува постепено, но трајно прекинување на увозот на руски гас, со прекин на увозот на течен природен гас (LNG) до 31 декември 2026 година, а увозот на гас преку цевководи до 30 септември 2027 година, беше наведено на веб-страницата на ЕК.

По исклучок, земјите-членки можат да го продолжат овој рок до 31 октомври 2027 година, во случај нивните нивоа на складирање да бидат под потребните нивоа на полнење.

Промените на постојните договори ќе бидат дозволени само за тесно дефинирани оперативни цели и не можат да доведат до зголемување на обемот или цените.

Затоа, најдоцна до ноември 2027 година, ЕУ постепено и засекогаш ќе го укине увозот на руски гас, беше наведено на веб-страницата на ЕК, пренесува Танјуг.

Фото: ЕПА

Генералниот секретар на НАТО, Марк Руте, оцени дека разговорите одржани во Москва меѓу специјалниот претставник на американскиот претседател, Стив Виткоф, и рускиот претседател Владимир Путин биле „важен чекор“ во напорите за наоѓање решение за конфликтот во Украина. Како што објавија западните медиуми, Руте нагласи дека ќе следат „следни чекори“, но не сакаше да ја открие нивната содржина.

„Тесно се координираме со Американците, но не коментираме за секој потег“, рече генералниот секретар.

Изјавата на Руте доаѓа во сенка на континуираните дипломатски напори, откако доцна синоќа во Кремљ завршија часови разговори меѓу Виткоф, специјалниот претставник на американскиот претседател Доналд Трамп, и тимот на Путин. На состанокот присуствуваше и зетот на Трамп, Џаред Кушнер, како и специјалниот претставник на рускиот претседател за инвестиции и економска соработка, Кирил Дмитриев, пренесуваат медиумите.

Според написите, иако разговорите беа оценети како „продуктивни“, страните ниту овој пат не успеаја да постигнат компромис за американскиот мировен план. Помошникот на претседателот на Русија, Јуриј Ушаков, потврди дека „територијалното прашање останува главна пречка“, што се совпаѓа со изјавата на американскиот државен секретар Марко Рубио, кој ги идентификуваше териториите како клучна точка на спор во мировните преговори.

Дипломатските напори, и покрај застојот, продолжуваат, а во меѓународните кругови растат очекувањата дека претстојните чекори ќе донесат поголем напредок во потрагата по одржливо решение за украинската криза.

Фото: ЕПА