Одлуката на високиот претставник за БиХ, Валентин Инцко, да наметне закон со кој се казнува негирање воени злосторства, како што се очекуваше, поинаку е оценета од политичарите во оваа земја, а членот на Претседателството на БиХ, Милорад Додик, најави дека таков закон нема да се спроведува во Република Српска и се закани со отцепување од БиХ.

Според законот за измени и дополнувања на Кривичниот законик на БиХ, кој ќе стапи во сила за осум дена, се предвидува затвор до пет години за секој што во иднина ќе негира воени злосторства, вклучително и геноцидот во Сребреница, односно нема да ги почитува пресудите изречени за сторителите или ги велича и наградува.

Меѓутоа, веднаш по објавувањето на изјавата на Инцко, членот на Претседателството на БиХ, Милорад Додик, свика прес-конференција во Бања Лука за луто да рече дека одлуките на високиот претставник во врска со наметнатиот закон нема да бидат признаени или спроведени во Република Српска и дека парламентот на ентитетот ќе предложи да се забранат активностите на судот и на Обвинителството на БиХ на територијата на РС.

Додик исто така порача дека е подготвен сè да подреди на бранење на интересите на Република Српска.

„Што ако прогласиме одлука за независност, тие не може да ни направат ништо. Па што? Нема да има конфликт, ние само бараме политичка поддршка за одлуките што ќе ги донесеме“, нагласи тој.

САД извршија воздушни напади во Авганистан за поддршка на владините сили кои се под притисок на талибанците во време кога странските сили, преведени од Америка, ја спроведуваат последната фаза од нивното повлекување од таа земја, пренесува „Ројтерс“.

Портпаролот на Пентагон, Џон Кирби, за новинарите изјави дека воздушните напади биле извршени за поддршка на авганистанските безбедносни сили во последните неколку дена, но не изнесе дополнителни детали.

Портпаролот на талибанците, Забихулах Муџахид, изјави дека нападите биле извршени во средата вечерта на периферијата на градот Кандахар на југот на земјата и дека тројца нивни борци биле убиени, а две возила биле уништени.

„Ние ги потврдуваме овие воздушни напади и силно ги осудуваме бидејќи тоа е очигледен напад и кршење на договорот од Доха бидејќи тие не може да имаат операции по мај“, рече Муџахид осврнувајќи се на договорот меѓу САД и талибанците, кој го отвори патот за повлекување на американските сили.

„Ако извршат каква било друга операција, тогаш тие ќе бидат одговорни за последиците“, предупреди портпаролот на талибанците. Речиси сите американски трупи, освен оние што ја штитат Амбасадата во Кабул и аеродромот во главниот град, ја напуштија земјата.

Три четвртини од инфекциите со коронавирус во Сингапур во последните четири недели се појавиле кај вакцинирани лица, а меѓу нив нема сериозни случаи на Ковид-19, покажуваат владините податоци, додека кампањата за забрзана вакцинација продолжува.

Во Сингапур со 5,7 милиони луѓе, вакцинирани се речиси 75 проценти од населението. Според „Ројтерс“, се работи за втората земја по нивото на вакцинираност, веднаш зад Обединетите Арапски Емирати. Половина од населението во Сингапур е целосно вакцинирано.

Во последните 28 дена земјата забележа 1.096 локални преноси на коронавирус. Од нив, 484 или 44 проценти се случиле кај целосно вакцинирани лица, 30 % од заразените биле делумно вакцинирани, а 25 % од новите случаи не биле вакцинирани.

Имало само седум случаи со потешка форма на болест што барала третман со кислород; шест од нив не примиле вакцина, а едно лице било делумно вакцинирано, соопшти тамошното Министерство за здравство.

„Постојат докази дека вакцината придонесува за спречување тешки форми на болеста“, нагласија од Министерството додавајќи дека оние што биле целосно вакцинирани и се заразиле или имале лесни симптоми или воопшто немаат.