Во бар во Уганда уапсени се 67 лица од ЛГБТ-заедницата, кои ќе останат во затвор под обвинение за „општо загрозување“, соопштија денеска активисти за човекови права во Кампала.

Полицијата и војската во неделата спровеле рација во бар во главниот град Кампала, каде вообичаено се собираат припадници на ЛГБТ-заедницата.

Тогаш биле приведени 125 лица, но подоцна 58 се ослободени.

Полицијата тврди дека причина за акцијата била проверка на употребата на тутун, кој е забранет на јавни места, но и поради употреба на опијати во тој локал.

Судија во Кампала соопшти дека уапсените се товарат за „општо загрозување“, што според адвокатите е многу нејасна формулација.

Албанскиот премиер Еди Рама изјави дека политичарите во Приштина, спротивставувајќи се на заедничката иницијатива за создавање на балканскиот мини шенген, ја загрозуваат надворешната политика на Албанија, поради свои внатрешно-политички интереси, пренесува српски „Блиц“.

Рама за албанската телевизија „Топ ченел“ изјави дека долго време му објаснувал на Албин Курти, лидерот на Самоопределување и кандидат за премиер на Косово, во што се состои значењето на процесот мини шенген и порача оти би бил многу изненаден доколку тој не го разбира тоа, затоа што, како што кажа Рама, Курти е доволно интелигентен.

„Ако тој се преправа дека разбира или не разбира, тоа е негов избор, но се чини дека надворешната политика со Албанија ја користи за внатрешна политика. Не верувам дека ова е најдобро, ќе имаме време да разговараме и да ги продлабочиме дискусиите“, истакна Рама.

Коментирајќи ја изјавата на Курти за отворање на границите меѓу Албанија и Косово, албанскиот премиер рекол дека такво нешто не може да се направи без согласност на Србија.

„Ако Курти сака да отвори граници, тогаш мора да има согласност од сите држави“, рече Рама.

Грчките власти денеска се откажаа од плановите богохулството да се прогласи за казниво дело, откако предлогот наиде на бројни критики во парламентот за време на расправата меѓу претставниците на конзервативната Влада и левичарската опозиција.

Министерот за правда, Костас Цијарас, рече дека е повлечен предлог-законот за криминализација на богохулството, потсетувајќи дека со тој предлог била предвидена казна затвор до две години, пренесува агенцијата АП.

Предлогот наиде на бројни критики.

„Само фундаменталистички држави во Азија и на Блискиот Исток имаат такви закони“, изјави опозицискиот пратеник Спирос Лапас.

Грчката православна црква го поздрави овој предлог-закон, оценувајќи дека тој би помогнал во зачувување на религиските чувства на верниците.