Украинскиот претседател Володимир Зеленски предупреди дека Полска не е способна да ги заштити луѓето во случај на масовен руски воздушен напад.

Минатата недела, 19 руски беспилотни летала влегоа во полскиот воздушен простор, а само четири беа соборени.

Во разговор за Скај њуз, Зеленски ги спореди перформансите на воздушната одбрана на Украина со оние на Полска, наведувајќи го искуството на Киев во одбивањето на руските напади.

„Нашите воздухопловни сили работат со воздушна одбрана и мобилни групи, но и со воени авиони и беспилотни летала-пресретнувачи. Сето ова функционираше против 810 воздушни цели и уништи 700 од нив. Тоа е голема бројка. Ако споредите, ние уништивме 700 од 810, а Полјаците имаа, мислам, 19 беспилотни летала и тие уништија четири. Секако, тие не можат да ги заштитат луѓето ако се случи масовен напад“, рече Зеленски.

Тој истакна дека ограничените одбранбени капацитети на Полска од беспилотни летала се разбирливи, со оглед на недостатокот на директно воено искуство.

„Ова не е порака до нашите полски пријатели. Тие не се во војна, па затоа е разбирливо што не се подготвени за такви работи“, рече Зеленски.

Тој додаде дека Украина е подготвена да ѝ помогне на Варшава да ја зајакне својата одбрана нудејќи обука за тактики против беспилотни летала. Тој исто така рече дека руските напади на полска територија биле дизајнирани да создадат несигурност кај сојузниците на НАТО и да ја ослабнат западната поддршка за Киев.

Фото:

Јулија Навални, сопругата на починатиот руски опозициски лидер Алексеј Навални, изјави дека тестовите на странски лаборатории врз биолошки примероци земени од нејзиниот сопруг покажале дека тој бил отруен.

Алексеј Навални, која имаше 47 години, почина ненадејно на 16 февруари 2024 година во руски затвор во Арктичкиот круг, оставајќи ја опозицијата без својот најхаризматичен и најпопуларен лидер, објави Ројтерс.

Јулија Навални ги обвинува руските власти за неговата смрт, додека Кремљ ги отфрла овие тврдења како бесмислени.

Таа објави видео на мрежата X, во кое вели дека биолошкиот материјал на Навални бил прокриумчарен во странство во 2024 година и дека две лаборатории го испитувале материјалот.

„Тие лаборатории во две различни земји дошле до ист заклучок: Алексеј бил убиен. Поточно, тој бил отруен“, рече Јулија Навални.

Таа побара лабораториите да ги објават своите наоди и не прецизираше кој отров го откриле лабораториите.

Минатата година, Навални ги отфрли информациите од руските истражители кои тврдеа дека Навални починал од „комбинација од болести“.

Американските разузнавачки агенции заклучија дека претседателот Владимир Путин не го наредил директно убиството на Навални, според Асошиејтед Прес и Волстрит Џурнал.

Глобалното затоплување предизвикано од човекот e причина за две од три летни смртни случаи поради топлина во Европа, според анализата на истражувачите од Империјал колеџот во Лондон.

Од јуни до август, околу 24.400 луѓе починале поради топлината, од кои 16.500 случаи се припишуваат на дополнителна топлина предизвикана од емисиите на стакленички гасови, според брза анализа која сè уште не е испратена на преглед, објавува Гардијан.

Според студија спроведена од епидемиолози и климатолози во 854 големи градови, просечната температура во градовите е за 2,2 степени повисока поради климатските промени, што значително го зголеми бројот на смртни случаи од екстремна топлина.

Коавторката на извештајот и климатолог Фредерике Ото изјави дека причинско-последичната врска помеѓу согорувањето на фосилни горива и зголемувањето на температурите и зголемената смртност е неоспорна.

„Доколку не продолживме да согоруваме фосилни горива во текот на последните децении, повеќето од проценетите 24.400 луѓе во Европа немаше да умрат ова лето“, рече Ото.

Истражувачите откриле дека дополнителната топлина е одговорна за околу 68 проценти од проценетите смртни случаи од топлина, и дека постарите лица се најтешко погодени од екстремните температури – 85 проценти од оние што починале биле над 65 години, а 41 процент над 85 години.

Епидемиологот Гарифалос Константинудис, исто така еден од авторите на студијата, рече дека ризикот за јавното здравје од топлината продолжува да се потценува, и покрај опасностите.

„Никој не би очекувал некој да го ризикува својот живот работејќи во обилни дождови или ветрови со сила на ураган. Но, опасната топлина сè уште се третира премногу лежерно“, рече тој.

Европските градови се подобро подготвени да се справат со екстремна топлина отколку во 2003 година, кога екстремен топлотен бран уби 70.000 луѓе, но службите за итни случаи сè уште се борат со зголемувањето на температурите и стареењето на населението.

Фото: принтскрин