Бугарската Агенција за безбедност на храната соопшти денеска дека во јужна Бугарија, во градот Раковски, во областа Пловдив се појавил вирусот птичји грип H5N8, пренесува „Бгнес“.

Сите 5.830 патки на фармата ќе бидат усмртени, информирала Агенцијата и додала дека тоа е прв случај на овој вирус во Бугарија во последните 10 години.

Околу фармата е поставено заштитно подрачје од три километри, а во него е забрането движење на домашните, дивите и други птици, како и продажба на јајца и живина.

„Репортери без граници“ иницираа петиција против екстрадиција на основачот на „Викиликс“, Џулијан Асанж, на САД. Иницијативата следува само неколку дена пред сослушувањето пред судот во Лондон.

Организацијата ја повика владата на Велика Британија во постапувањето кон Асанж во прв план да ги стави слободата на изразување и одбраната на новинарството и да дејствува во согласност со британското право и обврските што произлегуваат од меѓународното хуманитарно право.

Во соопштението на „Репортери без граници“ се потсетува дека Асанж во САД се соочува со казна од 175 години затвор поради обвиненија во врска со објавување и обезбедување информации за други новинари, кои служеле на јавниот интерес.

Во тек е потпишување електронска петиција на интернет-страницата „Репортери без граници“.

Врховниот суд во Индија пресуди дека жените може да служат како воени команданти отфрлајќи го ставот на владата дека мажите војници не се подготвени да прифатат наредби од женски офицери бидејќи тоа ги вознемирува.

Судот исто така ѝ нареди на владата во Њу Делхи да ја продолжи постојаната служба, која досега се однесувала само на мажите на сите жени офицери, што сигнализира промена нa родовата еднаквост во традиционално машкиот бастион, пренесува „Ројтерс“.

Со тоа жените ќе добијат исти можности и корист како и нивните машки колеги, вклучително и чинови, промоции и пензии.

Моменатно жените може да работат до 14 години, а трајно вработување им е дозволено само во правните и образовните сегменти на војската.