Францускиот претседател Емануел Макрон оваа недела ја започнува својата четврта државна посета на Кина, додека Европа се бори да ги избалансира економските и безбедносните закани од Пекинг и нејзината зависност од втората по големина економија во светот, во услови на глобални трговски превирања, објави Ројтерс.

Аналитичарите велат дека Макрон во минатото се обидувал да проектира силен европски став во односите со Кина, внимавајќи да не го антагонизира Пекинг, чија растечка самоувереност ги става на тест трговските, безбедносните и дипломатските врски.

„Тој мора јасно да му стави до знаење на кинеското раководство дека Европа ќе одговори на растечките економски и безбедносни закани од Пекинг, а воедно ќе спречи ескалација на тензиите што би довело до целосна трговска војна и дипломатски колапс“, изјави за Ројтерс Ноа Баркин, кинески аналитичар во „Родиум груп“. „Ова не е лесна порака за пренесување“, додаде тој.

Макрон ќе го започне своето патување во среда со посета на Забранетиот град во Пекинг, а ќе се сретне со претседателот Шји Џјинпинг во четврток во главниот град и повторно во петок за време на посетата на Ченгду, во југозападната покраина Сечуан.

Неговото доаѓање следи по напнатата посета на претседателката на Европската комисија, Урсула фон дер Лајен, во јули, кога таа рече дека односите меѓу ЕУ и Кина се на „пресвртница“. Британскиот премиер Кир Стармер и германскиот канцелар Фридрих Мерц, исто така, треба да ја посетат Кина на почетокот на следната година.

Трговските тензии меѓу Кина и Европа ескалираа, оценуваат аналитичарите, бидејќи евтиниот кинески извоз, особено во секторот за челик откако беше отсечен од американскиот пазар, уништува делови од европската индустрија. Исто така, во Европа расте загриженоста за технолошката супериорност на Кина во секторот за електрични возила (EV) и нејзината доминација во преработката на ретки метали, што би можело да ги загрози испораките за клучните европски индустрии.

Додека царините на Вашингтон влијаат врз глобалната трговија, Пекинг ја користи можноста да се претстави како сигурен деловен партнер, надевајќи се дека ќе ги ублажи европските загрижености за поддршката на Кина за Русија и нејзиниот индустриски модел субвенциониран од државата.

Пред патувањето, советниците на Макрон рекоа дека францускиот претседател ќе се залага за ребалансирање на трговските односи, охрабрувајќи ја Кина да ја зголеми домашната потрошувачка и надевајќи се дека ќе „ги сподели придобивките од иновациите“ за да може Европа да добие пристап до кинеската технологија.

Фото: ЕПА

Средбата на специјалниот пратеник на американскиот претседател Стив Виткоф со рускиот претседател Владимир Путин би можела да означи почеток на нова фаза во пристапот на Вашингтон кон украинската криза, а според проценките од Брисел, таа би можела да доведе и до притисок врз Киев да направи отстапки кон Москва.

Како што објави Гардијан, шефицата на европската дипломатија, Каја Калас, изрази загриженост дека претстојните дипломатски контакти би можеле да бидат насочени кон „убедување на жртвата“ да попушти.

„Се плашам дека целиот притисок ќе биде насочен кон жртвата, што значи дека Украина ќе мора да направи отстапки и да преземе обврски“, предупреди Калас, оценувајќи дека таквото сценарио би можело да ја ослабне позицијата на Киев во долгорочниот конфликт.

Портпаролот на Кремљ, Дмитриј Песков, потврди дека Виткоф ќе се сретне со Путин во вторник, 2 декември, попладне. Тој додаде дека рускиот претседател ќе има неколку приватни консултации во текот на денот како дел од подготовките за претстојните руско-американски контакти.

Средбата доаѓа веднаш откако САД и Украина одржаа разговори во Флорида за време на викендот. Украинската делегација ја предводеше поранешниот министер за одбрана Рустем Умеров, кој го наследи Андриј Јермак на чело на претседателската администрација по големиот корупциски скандал.

Според руските медиуми, на состаноците во Флорида биле разгледани клучни прашања за идната стратегија, очекувањата од Вашингтон и Киев, како и можните модели за понатамошниот процес на преговори. Нивните извештаи укажуваат дека пристапите на двете страни се промениле до одреден степен, што дополнително ја зајакнува важноста на мисијата на Виткоф во Москва.

Пред продолжувањето на дипломатските контакти, останува прашањето дали Вашингтон ќе инсистира на забрзано барање компромис или, како што предупредуваат некои европски претставници, ќе се обиде да го префрли товарот на отстапките врз Киев.

Фото: ЕПА

Претседателот на Венецуела, Николас Мадуро, изјави дека неговата земја е подготвена да се одбрани додека САД размислуваат за копнен напад. Тензиите се на врвот поради големото американско воено распоредување во Карибите, кое вклучува носач на авиони и илјадници војници, пишува Скај њуз.

Американскиот претседател Доналд Трамп се сретна со својот тим за национална безбедност синоќа откако минатата недела предупреди дека копнените напади би можеле да започнат „многу наскоро“. Иако деталите од состанокот не беа објавени, портпаролката на Белата куќа, Каролин Ливит, им изјави на новинарите: „Претседателот има многу опции што се на маса – и ќе го оставам тој да зборува за нив“.

Американските сили извршија најмалку 21 напад во последните неколку месеци врз бродови за кои тврдат дека превезуваат наркотици до американските брегови. Белата куќа го обвинува Мадуро за вмешаност во трговија со дрога, што тој жестоко го негира.

Мадуро: „Ова е психолошки тероризам“
Мадуро, кого западните земји најчесто го сметаат за диктатор, вчера на митинг во Каракас изјави дека Венецуелците се подготвени да „ја бранат земјата и да ја водат по патот на мирот“. „Преживеавме 22 недели агресија што може да се опише само како психолошки тероризам“, им рече тој на своите поддржувачи.

Венецуела вели дека нападите на САД врз бродовите, во кои загинаа повеќе од 80 луѓе, се еднакви на убиство. Според Каракас, вистинскиот мотив на Трамп е да го собори Мадуро со цел да ги заплени венецуелските резерви на нафта.