Министерот за надворешни работи на Русија, Сергеј Лавров, изјави дека Западот мора да го прифати фактот дека руските сили ја имаат „стратешката иницијатива“ во војната во Украина, повторувајќи дека ставот на Москва за конфликтот не е променет.

Во интервју за руската државна новинска агенција РИА, Лавров рече дека Русија верува дека добила предност на бојното поле.

„Нашата принципиелна позиција останува непроменета. Стратешката иницијатива е целосно на страната на руската армија и Западот го разбира тоа“, рече тој.

Лавров додаде дека, според него, американската администрација го поддржала предлогот за одржување нови избори во Украина.

„Американската администрација спроведува активна и насочена медијациска работа“, рече тој, осврнувајќи се на контактите и разговорите меѓу Вашингтон и Москва.

Зборувајќи за односите меѓу двете нуклеарни сили, Лавров нагласи дека САД и Русија „носат одговорност за зачувување на меѓународниот мир и безбедност“.

Тој исто така рече дека Москва сè уште чека официјален одговор од Вашингтон на предлогот на рускиот претседател Владимир Путин за замрзнување на ограничувањата од Новиот СТАРТ договор за нуклеарно оружје. Сепак, предупреди дека не треба да се брза со заклучоци.

„Додека истекува договорот, логично е да ѝ се даде можност на американската страна да спроведе сеопфатна анализа на иницијативата на претседателот Путин за доброволно едногодишно замрзнување на квалитативните ограничувања на Новиот СТАРТ договор“, рече Лавров.

Новиот СТАРТ договор стапи на сила на 5 февруари 2011 година. Со него, Соединетите Американски Држави и Русија ја презедоа обврската да го ограничат стратешкото офанзивно нуклеарно оружје.

Според американскиот Стејт департмент, двете земји ги исполниле клучните обврски до февруари 2018 година и оттогаш се придржуваат до пропишаните ограничувања, кои вклучуваат: до 700 распоредени интерконтинентални балистички ракети, балистички ракети лансирани од подморници и тешки бомбардери со нуклеарно оружје, максимум 1.550 нуклеарни боеви глави на распоредени системи и максимум 800 распоредени и нераспоредени ракетни лансери и тешки бомбардери.

фото/депозитфотос

Украина соопшти дека не постојат докази за тврдењата на Русија дека украински беспилотни летала нападнале една од официјалните резиденции на рускиот претседател Владимир Путин.

Украинскиот министер за надворешни работи Андриј Сибиха изјави дека Русија не понудила никакви уверливи докази за ваквите обвинувања.

„Нема никакви докази, таков напад не се случил“, напиша Сибиха на социјалните мрежи. Тој додаде дека Русија има „долг список на лажни тврдења“, што, како што наведе, е нивна препознатлива тактика. „Често ги обвинуваат другите за она што самите планираат да го направат. Нивните зборови никогаш не треба да се земаат здраво за готово“, порача Сибиха.

Изјавата доаѓа откако Украина остро ги отфрли руските тврдења за наводен напад во Новгородската област. Рускиот министер за надворешни работи Сергеј Лавров вчера тврдеше дека во нападот биле уништени 91 украински дрон, и најави дека Москва ќе ја ревидира својата преговарачка позиција, со порака дека веќе е одлучено како Русија ќе одговори.

Украинскиот претседател Володимир Зеленски обвинувањата ги нарече лажни и оцени дека Кремљ со нив подготвува оправдување за нови руски напади. Според неговите зборови, целта на Москва е да создаде изговор за удари врз Киев и државните институции.

„Ако нема скандал меѓу Украина и САД и ако има напредок, тоа за Русија е неуспех, бидејќи тие не сакаат да ја завршат војната“, рече Зеленски, предупредувајќи дека сите мора да бидат внимателни поради можни напади врз главниот град.

Зеленски дополнително порача дека во ситуацијата поактивно треба да се вклучат американскиот претседател Доналд Трамп, неговата администрација и европските сојузници, со цел да извршат притисок врз Москва.

Откако Володимир Зеленски ја напушти Флорида во неделата, каде што разговараше со Доналд Трамп, украинскиот претседател постави временска рамка за тоа што следи.

Тој рече дека целта е да се соберат „сите релевантни актери во наредните денови, а не недели“.

Зеленски додаде дека треба да следи и состанок со европските лидери, а не е исклучено дека тој би можел да се одржи уште денес.

Полската телевизија TVN24 објави дека полскиот премиер Доналд Туск ќе разговара за ситуацијата во Украина со други европски лидери во 11 часот по локално време.

Сè уште не е потврдено со кого точно ќе разговара Туск.