Научници од Австралија соопштија дека во лабораторија успешно развиле верзија на новиот коронавирус, што би можело да го забрза создавањето на вакцина.

Истражувачите од институтот за инфекции и имунитет, „Петер Доерти“ во Мелбурн, најавија дека примерок од коронавирусот кој го зеле од зарзен пациент, ќе го поделат со Светската здравствена организација и со лаборатории низ светот.

„Го имаме! Фантастично!“ рекол Мајк Катон, заменик директор на инситутот „Доерти“, објави „Еј-би-си Њуз“.

„Ова е голем чекор, придонесовме за решавање на дел од сложувалката“ потврдил Катон пред новинарите.

Смртоносниот коронавирус, кој е сличен на грип, изби кон крајот на 2019 година во централниот кинески град Вухан. Вирусот за два месеци се прошири и на други делови на Кина, но и на десетина други земји во светот.

И кинеските научници успеаа во лабораторија во Кина да развијат верзија на коронавирусот, но поделија секвенца од неговиот ген, а не цел примерок, пишува Ројтерс.

Првиот случај на коронавирус е забележан и во Обединетите Арапски Емирати и тоа во семејство кое допатувало од Кина. Засега не е познато колку членови од семејството се заразени, пренесува „Ројтерс“, но се додава дека заболените се во стабилна состојба.

ОАЕ се составени од седум емирати, а мнозинство од населението живее во Абу Даби и Дубаи.

Според информациите на светските медиуми, прв случај на коронавирус е пријавен и во Тибет, а полуавтономниот регион Хонгконг ја затвори границата кон Кина и го прекина железничкиот сообраќај.

Турција објави дека ќе евакуира 32 турски државјани од Вухан, градот каде првпат се појави коронавирусот, изјави турскиот амбасадор во Кина.

Досега тоа го сторија САД и Јапонија, додека Австралија, Нов Зеланд, Јужна Кореја, Франција, Велика Британија и Индија имаат намера да го сторат истото наскоро.

Според најноите податоци, 132 лица починале од ефектите на новиот коронавирус во Кина, а повеќе од 6.056 лица се разболени.

Надвор од Кина, заболени се 70 лица во 19 држави, од кои најмалку пет во САД, пренесува Си-ен-ен.

Палестинците го отфрлија новиот мировен план на американскиот претседател Доналд Трамп, опишувајќи го како „заговор“. Планот предвидува палестинска држава и признавање на израелскиот суверенитет над населбите на Западниот Брег.

Според планот, Ерусалим ќе остане „неподелена“ израелска престолнина, но палестинскиот главен град ќе „вклучи области на Источен Ерусалим“.

„Ерусалим не е на продажба“ порача палестинскиот претседател Махмуд Абас, како реакција на вчерашното соопштение.

„Сите наши права не се за продажба и не се за зделка“, додаде тој.

Илјадници Палестинци одржаа протести во Појасот Газа, додека израелската војска распореди засилувања во окупираниот Западен Брег.