Свет
Зеленски упати нов апел до главните сојузници на Киев да го засилат притисокот врз Москва
Украинскиот претседател, Володимир Зеленски, неодамна потпиша закон со кој им се дозволува на странски државјани да служат во вооружените сили на Украина, вклучително и офицерски позиции, јави БТА повикувајќи се на агенцијата „Укринформ“. Документот влијае на некои воени гранки и беше изгласан од Врховната Рада претходно овој месец.
Во своето вечерно видео обраќање, Зеленски упати нов апел до главните сојузници на Киев да го засилат притисокот врз Москва. Откако ги наброја руските напади во изминатите неколку дена и нивните жртви, тој додаде:
„Секој ден од војната покажува дека Москва е решена да продолжи со својата агресија. Овие луѓе немаат други намери, па затоа се обидуваат да ја зајакнат својата одбранбена индустрија, а тоа го прават со заобиколување на санкциите. Тие се повеќе ја ангажираат Северна Кореја, а Украина ќе биде принудена всушност да војува против Северна Кореја. Ова се околности во кои недостатокот на порешителна акција од партнерите кои ја поддржуваат Украина го охрабрува Путин дополнително да инвестира во теророт, но потребни се конкретни акции“, рече тој.
Рускиот претседател, Владимир Путин, повторно предупреди дека ако Западот дозволи удари со долг дострел врз Русија, ќе се соочи со руски одговор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Путин: Развојот на нуклеарните сили сега е наш апсолутен приоритет
Рускиот претседател Владимир Путин изјави дека развојот на руските нуклеарни сили сега е „апсолутен приоритет“ откако истече последниот преостанат договор за контрола на оружјето меѓу Русија и САД.
„Развојот на нуклеарната тријада, која ја гарантира безбедноста на Русија и обезбедува ефикасно стратешко одвраќање и рамнотежа на моќта во светот, останува апсолутен приоритет“, рече Путин во видео порака.
Путин зборуваше на Денот на бранителот на татковината на Русија, празник кој традиционално се одбележува со воени церемонии и изрази на патриотизам под покровителство на Кремљ.
Тој најави дека Русија ќе продолжи да ја „зајакнува армијата и морнарицата“ и да го користи искуството стекнато за време на речиси четиригодишната војна во Украина.
Тој рече дека сите гранки на вооружените сили ќе бидат подобрени, вклучително и нивната „борбена подготвеност, мобилност и способност за дејствување во сите услови, дури и во најтешките“.
Европа
(Видео) Трамп го обвини дека е диктатор, Зеленски одговори со насмевка
Украинскиот претседател Володимир Зеленски возврати на претходните коментари на американскиот претседател Доналд Трамп во кои тој сугерираше дека е диктатор и дека е одговорен за војната, во интервју за Би-би-си.
Водителот потсети на претходните контрадикторни изјави на Трамп, вклучително и онаа во која тој го нарече Зеленски „диктатор“ кој ја започна војната, повторувајќи ги тврдењата на рускиот претседател Владимир Путин.
„Јас не сум диктатор и јас не ја започнав војната. Тоа е тоа“, одговори Зеленски со смеа.
Во интервјуто се осврнаа и на преговорите, вклучувајќи ги посетите на специјалниот претставник на Трамп, Стив Виткоф, на Москва, и загриженоста дека САД би можеле да бидат под влијание на руските наративи.
Зеленски истакна дека Виткоф се среќава почесто со украинската страна отколку со Русија и дека имал повеќе средби со Трамп отколку со Путин.
Тој додаде дека не може да го тврди тоа со сигурност, истакнувајќи дека самиот Виткоф вели дека се сретнал со украинската страна повеќе пати отколку со Русите. Тој исто така истакна дека имал бројни средби со Трамп, додека Трамп се сретнал со Путин само еднаш.
Зеленски рече дека верува оти САД треба да ја сопрат Русија, а не да се обидуваат да ѝ угодат, тврдејќи дека Москва ќе продолжи да мами без оглед на околностите.
Тој заклучи дека Русија дејствува првенствено водена од сопствените интереси.
Свет
Силна зимска бура во САД: прогласена вонредна состојба во пет држави
Силна зимска бура го погоди североисточниот дел на САД, поради што е издадено предупредувања за 59 милиони луѓе. Во Њујорк се воведени забрани за патување, а низ целиот регион се пријавени прекини во електричната енергија.
Вонредна состојба е прогласена во Масачусетс, Конектикат, Делавер, Њу Џерси и Род Ајленд, јавува Би-би-си.
Метеоролозите велат дека голем дел од североисточните крајбрежни провинции на САД и Канада ќе бидат погодени од недела навечер до понеделник. Се очекува ова да биде најсилната циклонска бура, таканаречена „nor’easter“, за речиси една деценија за поголемиот дел од регионот, носејќи снег, силни ветрови и крајбрежни поплави. Предупредување за снежна бура е издадено за околу 40 милиони луѓе, додека други 19 милиони се под општи предупредувања за зимски бури, кои ја опфаќаат областа од централните Апалачи до крајбрежниот Мејн.
„Иако имаме многу вакви бури што носат обилен снег и силни налети на ветер, поминаа неколку години откако не сме виделе бура од ваков обем над толку голема и густо населена област“, изјави за CBS News Коди Снел, метеоролог од Центарот за временска прогноза на Националната метеоролошка служба.
Националната метеоролошка служба предупреди дека бурата може да произведе помеѓу пет и седум сантиметри снег на час, со вкупни снежни врнежи од 30 до 60 сантиметри, што ги прави условите за патување „скоро невозможни“. Снежната бура ќе го направи патувањето „екстремно опасно“ во делови од североисточниот дел на САД.
Снегот почна да паѓа во недела навечер во Бостон, Филаделфија и Њујорк, каде што се очекуваат најлоши услови. Прекините на електричната енергија веќе се зголемуваат, а повеќе од 20.000 луѓе се без струја во Њу Џерси. Илјадници се без струја и во Вирџинија, Делавер и Мериленд. Околу 3.900 летови беа откажани во САД во недела, а стотици други беа одложени.
За прв пат по девет години, Њујорк, најнаселениот град во Америка, е под предупредување за снежна бура. Се очекува градот да биде особено силно погоден, со очекувања од 45 до 60 сантиметри снег низ целата градска област и температури што се очекува да паднат на околу -6 степени Целзиусови.
Градоначалникот Зохран Мамдани прогласи вонредна состојба и воведе целосна забрана за патување од 21 часот во недела до 12 часот во понеделник. Тој рече дека училиштата ќе бидат затворени, а сите улици, автопати и мостови ќе бидат затворени за сообраќај, освен за службите за итни случаи.
На прес-конференција, Мамдани рече дека најобилни снежни врнежи се очекуваат преку ноќ, со можни до 70 сантиметри снег во некои области. Ова е втора голема снежна бура во неговиот мандат, откако 19 лица загинаа за време на тринеделниот студен бран во јануари.

