Свет
„Њујорк тајмс“: Израел, по налог на САД, го уби вториот човек на Ал каеда во Иран

Израелски оперативци кои постапувале по налог на САД го убиле вториот човек на Ал каеда, обвинет за организирање на бомбашките напади во 1998 година на две американски амбасади во Африка, при пукање во движење во Техеран, Иран, во август, пренесува „Њујорк тајмс“, повикувајќи се на разузнавачки извори.
Абдула Ахмед Абдулах, познат под военото име Абу Мухамед Ал-Масри, бил застрелан заедно со неговата ќерка Марјам од двајца мотоциклисти на улица во главниот град.
Според извештајот на „Асошиејтед прес“ од неделата, Марјам Ал-Масри била намерно убиена затоа што САД верувале дека таа е подготвена за лидерска улога во Ал каеда, а разузнавачките служби сугерираат дека била вклучена во оперативно планирање.
Масри беше еден од водачите на Ал каеда и веројатен наследник на сегашниот лидер, Ајман Ал-Завахири, пишува весникот.
Тој беше на списокот на најбараните терористи на ФБИ и беше обвинет во САД за злосторства поврзани со бомбардирањата на амбасадите на САД во Кенија и Танзанија, во кои загинаа 224 лица и беа ранети стотици други.
Според извештајот, Ал каеда досега остана без коментар за неговата смрт, а иранските власти ја прикриваа истата издавајќи во саботата демант и велејќи дека нема терористи на Ал каеда на нивна територија.
Портпаролот на иранското Министерство за надворешни работи, Саид Хатибзаде, рече дека САД и Израел понекогаш се обидуваат да го поврзат Иран со такви групи лажејќи и давајќи лажни информации до медиумите за да избегнат одговорност за криминалните активности на оваа група и други терористички групи регионот.
„Тактиката на застрашувачки напади на администрацијата Трамп против Иран стана рутина“, рече Хатибзаде.
САД и Израел и претходно работеа заедно на операциите во Иран. Вирусот „стакснет“ од 2012 година, кој беше создаден за да ја спречи нуклеарната програма на Иран, во голема мера се смета за заеднички проект на двајцата сојузници.
Исто така, ова не е прво убиство од движење од ваков вид. Тоа наликува на истиот модус операнди како атентатите, припишувани на Израел, врз иранските нуклеарни научници.
Убиството се случи во период на големи тензии во Иран, со повеќе мистериозни експлозии на клучни инфраструктурни локации, како и со експлозија на 2 јули во нуклеарниот објект за збогатување ураниум „Натанц“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Рајанер“ го зголемува дозволениот бесплатен рачен багаж

„Рајанер“ ќе ја зголеми максималната големина на багажот што може да се носи во авион бесплатно и да се складира под седиштето за 20 проценти, откако Европската Унија презентираше предлог за нови закони што би дозволиле поголеми димензии.
Нискобуџетната авиокомпанија моментално им дозволува на патниците да земат бесплатен рачен багаж што се вклопува под седиштето, како што е чанта или мал ранец. Максималната големина сега се зголемува од 40x25x20 см на 40x30x20 см.
Иако станува збор за зголемување само од 5 сантиметри во ширина, ова значи дека волуменот на торбата се зголемува од 20 на 24 литри.
И покрај зголемувањето, „Рајанер“ сè уште заостанува зад својот главен конкурент „ИзиЏет“, кој дозволува багаж со димензии 45x36x20 см (32 литри), додека „ВизЕр“ веќе дозволува багаж со димензии 40x30x20 см.
„Рајанер“ изјави дека новите правила ќе бидат имплементирани во наредните недели.
Минатата недела, европратениците предложија патниците да имаат право на багаж со димензии од најмалку 40x30x15 см, како и дополнителен багаж со димензии до 100 см и тежина до 7 кг, без дополнителни трошоци со нивниот авионски билет.
Свет
САД воведоа нови санкции врз Иран и Хезболах

Соединетите Американски Држави воведоа нови санкции врз Иран и неговиот либански сојузник Хезболах, насочени кон високи функционери и мрежи кои помагаат да се избегнат санкциите на САД поврзани со продажбата и транспортот на иранска нафта.
Министерството за финансии соопшти дека неговата Канцеларија за контрола на странски средства „презема мерки против мрежите кои колективно транспортирале и купувале иранска нафта вредна повеќе милијарди долари, од кои дел им користеле на силите Кудс на Иранскиот корпус на револуционерната гарда (IRGC-QF), кој е прогласен за странска терористичка организација“.
Санкциите се насочени и кон бродовите вклучени во транспортот на нафта.
Министерот за финансии Скот Бесент изјави: „Министерството ќе продолжи да воведува мерки против изворите на приходи на Техеран и да го зголемува економскиот притисок за да го наруши (неговиот) пристап до финансиските ресурси што им овозможуваат на неговите дестабилизирачки активности“.
Санкции беа воведени и против неколку високи функционери и еден субјект поврзан со Хезболах поради помагање во избегнувањето на санкциите.
Овој потег ја нагласува посветеноста на попречување на напорите на Хезболах да ги избегне санкциите, според одделот.
Целта на санкциите беше и да се поддржат напорите на новата либанска влада да го ограничи влијанието на терористичката група, особено затоа што актери како финансиските институции на Хезболах продолжуваат да ја поткопуваат веќе кревката економија на Либан, соопшти одделот.
Свет
Путин разговараше со Трамп: „Нема да се откажам од своите цели во Украина“

Претседателот на САД, Доналд Трамп, и рускиот претседател, Владимир Путин, разговараа по телефон речиси еден час за војната во Украина, при што двајцата изразија подготвеност да бараат решение преку преговори, објави советникот на Кремљ, Јуриј Ушаков.
За време на разговорот, Трамп повторно го отворил прашањето за брзо завршување на војната во Украина, но Путин јасно ставил до знаење дека Русија нема да отстапи од своите цели, вклучително и, како што рекол, отстранување на причините што довеле до конфликтот.
„Нашиот претседател нагласи дека Русија ќе ги постигне целите што си ги поставила, а тоа е да ги елиминира познатите причини што доведоа до сегашната конфронтација“, рече Ушаков.
Путин му ги презентирал на Трамп и деталите за неодамнешниот договор со Украина за размена на затвореници и загинати војници и ја изразил подготвеноста на Москва да продолжи со преговорите со Киев.
Ушаков нагласи дека рускиот став е дека мировните преговори за Украина мора да се водат исклучиво меѓу Москва и Киев, без трети страни.