Американската Централна разузнавачка агенција (ЦИА) тајно ѝ помагала на Украина со обука и разузнавачки податоци за напади врз клучни руски нафтени рафинерии и т.н. „флота во сенка“, која Русија ја користи за заобиколување на санкциите, објави „Њујорк тајмс“, повикувајќи се на американски и украински функционери.

Според весникот, од јуни, со одобрение на американскиот претседател Доналд Трамп, ЦИА доставувала прецизни разузнавачки информации за засилување на украинските воздушни напади врз руската нафтена инфраструктура. Нападите довеле до значително намалување на преработката на нафта во Русија, пад на извозот и недостиг на гориво, со проценета дневна загуба од околу 75 милиони долари.

Извори наведуваат дека Трамп ги пофалил нападите како средство за зголемување на преговарачкиот притисок врз рускиот претседател Владимир Путин, иако во Белата куќа постоеле поделени ставови, а во одреден период била замрзната и размената на разузнавачки информации.

Весникот наведува и дека Украина, со поддршка од ЦИА, започнала поморска кампања со дронови против „флотата во сенка“ – мрежа од бродови што транспортираат санкционирана нафта – со цел да се намали финансирањето на руската економија и да се зајакне позицијата на Киев во мировните преговори.

Претседателот на Србија, Александар Вучиќ, изјави дека имал важни разговори во врска со српската нафтена индустрија со администрацијата во Вашингтон, OFAC и Стејт департментот, како и со унгарскиот премиер Виктор Орбан, пренесува „Н1“.

Подетални информации за тоа што ова значи за Србија и решавањето на санкциите против NIS ќе презентира претседателот утре, според РТС. Претходно денес, Вучиќ им ја честиташе Новата година на граѓаните на Србија и нагласи дека верува дека во следните 24 часа ќе се радуваат на феноменални политички вести.

„Драги граѓани, среќна Нова Година, а во следните 24 часа, верувам дека ќе се радуваме на феноменални политички вести. Работевме напорно, го заслуживме тоа! Да живее Србија“, рече Вучиќ.

Компаниите што беа јавно споменати како можни купувачи на рускиот удел во НИС беа унгарскиот МОЛ и Националната нафтена компанија Абу Даби (АДНОК). Порано во текот на неделата, српската министерка Дубравка Ѓедовиќ Хандановиќ изјави дека и НИС и МОЛ се обратиле до ОФАК, без да ја прецизира содржината на тоа барање.

Санкциите против НИС стапија на сила на 10 јануари, кога ОФАК го додаде НИС на листата на санкции на СДН, а нивното спроведување е одложено осум пати. Последната издадена лиценца истече на 8 октомври 2025 година, според извештајот на самата компанија од Белградската берза. Моментално се работи на обезбедување лиценца што ќе му овозможи на НИС да работи додека конечно не биде отстранета од листата на СДН.

Нафтената индустрија на Србија е во мнозинска сопственост на Русија. „Газпромнефт“ има удел од 44,85 проценти, Србија 29,87 проценти, а „ЈСК Интелиџенс“ 11,3 проценти (исто така дел од групацијата „Газпром“).

Фото: Depositphotos

Кинескиот претседател Кси Џинпинг го искористи својот новогодишен говор за да испрати силна порака за Тајван, ветувајќи обединување, кое го нарече „незапирлив тренд на времето“.

Неговата изјава доаѓа само еден ден по завршувањето на интензивните кинески воени вежби околу островот, објавува „Гардијан“.

Обраќајќи се до нацијата од Пекинг, Кси нагласи: „Обемотувањето на нашата татковина, трендот на времето, е незапирлив“.

Кина, која го смета самоуправуваниот остров Тајван за своја територија, долго време сигнализираше дека има намера да го анектира, не исклучувајќи ја употребата на сила.

Загриженоста на американските разузнавачки агенции расте поради се поголемите способности на вооружените сили на Кина да извршат таков напад доколку Кси смета дека е потребно.

Кинеските државни медиуми го пренесуваа говорот со снимки од најголемата воена парада во земјата во септември, по повод 80-годишнината од крајот на Втората светска војна. На парадата, која се сметаше за демонстрација на воена моќ, Кси стоеше покрај Путин и севернокорејскиот лидер Ким Џонг-ун.