Австрискиот инфектолог Франц Алербергер не верува дека коронавирусот ќе се искорени и верува дека секој од нас ќе се зарази порано или подоцна, но тој посочува дека станува збор за многу побезопасна болест отколку што се стравуваше пред десет месеци.

„Ќе останеме со овој вирус. Порано или подоцна, секој од нас ќе има Корона, освен ако не умре пред тоа”, рече Алербергер во изјавата за австриското радио „Oe3″.

Директорот на Одделот за јавно здравје на Агенцијата за здравје и безбедност на храна (АГЕС) очекува дека вакцината против коронавирусот ќе биде достапна уште во јули следната година.

„Се обложувам дека нема да има лек, бидејќи сите лекови протв вируси може да се избројат на прстите од едната рака“, подвлече тој.

Алербергер вели дека вирусот корона е побезбедна болест отколку што се стравуваше пред десет месеци, кога се сметаше дека стапката на смртност е 30 проценти.

Тој се осврна на студија на Универзитетот Стенфорд, според која стапката на смртност е 0,23 проценти.

„Таа вредност одговара и на нашите податоци“, потенцира водечкиот австриски инфектолог.

Во исто време, тој предупредува дека, иако во моментов се полни само 7% од установите за интензивна нега во австриските болници, треба да се има предвид дека 90% од Австријците можат да се разболат и дека не треба да се потценува уделот на луѓе над 65 години, бидејќи смртноста е јасно поголема од сезонски грип.

Тој исто така предупреди на влошување на состојбата во текот на зимата.

„Мора да бидеме внимателни да не доживееме изненадување во негативна смисла. Ако имаме 4.000 или 5.000 нови инфекции на ден, мора да сметаме дека медицинските капацитети ќе бидат на нивните граници, дека ќе има смртни случаи во домовите за стари лица, а политичарите ќе бидат изложени на огромен притисок.Во принцип не можеме да спречуваме одделни смртни случаи, но можеме да го забавиме нивниот тек“, рече Алербергер, додавајќи дека врвот на инфекцијата на Ковид-19 го очекува во декември или јануари.

По повеќе од четири месеци, во Мелбурн денес не се пријавени нови случаи на коронавирус. Владата на австралиската држава Викторија објави дека од утре сите продавници и угостителски објекти повторно ќе можат да работат, како и спортските натпревари на отворено можат да продолжат.

Од 8 ноември завршува забраната за жителите на Мелбурн да се движат повеќе од 25 километри од дома и ќе можат да патуваат во другите делови на Викторија.Во Мелбурн, како извор на инфекција, беа воведени строги ограничувачки мерки на почетокот на јули.

Владата на Викторија е обвинета за нанесување непотребна економска штета, одбивајќи да ги олесни мерките.Последната смрт предизвикана од Ковид-19 е регистрирана во Викторија пред седум дена.

Во Викторија, вирусот зеде 817 животи, а во остатокот од Австралија вкупно 88 лица.На почетокот на август, повеќе од 700 нови случаи биле регистрирани во Викторија секој ден, според АП.

Пакистанскиот премиер Имран Кан го критикува францускиот претседател, Емануел Макрон, дека ја поттикнува исламофобијата напаѓајќи го исламот, пренесува „Анадолија“.

Во објавата на „Твитер“, Кан истакна дека карактеристика на еден лидер е да ги зближува луѓето наместо да ги разделува и дека жално е што Макрон ја поттикнува исламофобијата напаѓајќи го исламот наместо да ги напаѓа насилните терористи, без разлика дали се муслимани, бели расисти или пак нацистички идеолози.

Кан посочи дека Макрон решил намерно да ги испровоцира муслиманите, вклучително и своите граѓани, поттикнувајќи го прикажувањето на навредливите карикатури на пророкот Мухамед.

Нагласувајќи дека со напаѓањето на исламот францускиот претседател ги повредил чувствата на милиони муслимани низ Европа и светот, Кан додаде дека поголема поларизација е последното нешто што светот го посакува. Тој, исто така, истакна дека јавните изјави кои се засновани на незнаење ќе предизвикаат поголема омраза, исламофобија и екстремизам.

Сирак-ул-Хак, лидерот на пакистанската партија Џемаати Ислам, ги осуди изјавите на Макрон и истакна дека муслиманските лидери несомнено треба да реагираат на прикажувањето на карикатурите во зградите во Франција.

Хак наведе дека треба да се контактира со претседателите на муслиманските држави за да се разговара за ова прашање и итно на состанок да се повика Организацијата за исламска соработка.

Тој, исто така, рече дека прашањето треба да се донесе на дневен ред на глобалните форуми и дека Обединетите нации (ОН) треба да соопштат дека навредите против божјиот пратеник Мухамед ќе бидат казнети според меѓународното право.

Во Монпелје и Тулуз, во знак на сеќавање на професорот кој беше обезглавен минатата недела во квартот Конфланс-Сен-Онорин во близина на Париз, на ѕидовите на официјалните згради беа поставени карикатури на пророкот Мухамед од францускиот магазин „Шарли Ебдо“.

Макрон во својата изјава рече дека нема да престанат да ги објавуваат карикатурите за Мухамед.