Мажот обвинет за убиството на поранешниот јапонски премиер Шинзо Абе се извини на семејството на починатиот политичар за прв пат. Тецуја Јамагами, кој претходно се изјасни за виновен за убиство и други обвиненија, вчера пред судот изјави дека „длабоко жали“ за вдовицата на Абе, Акие, објави Би-би-си.

Јамагами го застрелал Абе со рачно изработено оружје за време на политички митинг во западниот јапонски град Нара на 8 јули 2022 година. Поранешниот премиер почина истиот ден во болница, а неговата смрт го шокираше светот. Абе беше познат по својата строга надворешна политика и препознатлива економска стратегија што стана позната како „Абеномика“.

„Им предизвикав три и пол години страдање… Немам изговор“, изјави Јамагами пред судот.

Јамагами наводно им рекол на истражителите дека го нападнал Абе затоа што го обвинувал за промовирање на Црквата на обединување, за која тврди дека финансиски ја уништила неговата мајка и целото семејство. Неговите обвинувања предизвикаа широка истрага за Црквата на обединување, која е основана во Јужна Кореја и е позната по организирање масовни свадби.

Црквата на обединување беше предмет на контроверзии дури и пред атентатот врз Абе. Дедото на Абе, Нобусуке Киши, исто така поранешен јапонски премиер, беше познат како близок до црквата поради нејзината антикомунистичка природа, а самиот Абе во минатото зборувал на настани поврзани со групата.

Во март оваа година, суд во Токио нареди црквата да се распушти, а организацијата изјави дека ќе „се бори до крај“. За време на сослушувањето минатиот месец, обвинителите прочитаа изјава од вдовицата на Абе, Акие, во која таа напиша: „Тагата поради губењето на мојот сопруг нема да биде ублажена“.

Соединетите Американски Држави планираат да го прошират бројот на земји опфатени со забраната за патување на повеќе од 30, изјави американската министерка за внатрешна безбедност, Кристи Ноем.

„Нема да бидам прецизна за точниот број, но тоа е повеќе од 30, а претседателот продолжува да ги оценува земјите“, рече Ноем во интервју за американската телевизија „Фокс њуз“, одговарајќи на прашањето дали администрацијата на американскиот претседател Доналд Трамп планира да го зголеми бројот на земји опфатени со забраната на 32.

Ноем не прецизираше кои земји ќе бидат додадени на списокот. „Ако таму немаат стабилна влада, ако немаат земја што може да се спротивстави и да ни каже кои се овие луѓе и да ни помогне да ги провериме, зошто би им дозволиле на луѓето од таа земја да доаѓаат тука во Соединетите Американски Држави“, рече таа.

Во јуни, Трамп потпиша проглас со кој им се забранува на граѓаните на 12 земји влез во Соединетите Американски Држави и се ограничува влезот на седум други земји, велејќи дека е неопходно да се заштитат од странски терористи и други безбедносни закани. Забраните важат и за имигранти и за неимигранти, како што се туристи, студенти и деловни патници, пренесува Танјуг.

Фото: ЕПА

Данската влада планира значително да го намали износот на воена помош за Украина од 2026 година, што е најава за постепен преглед на нејзините финансиски обврски кон Киев. Како што објави данската јавна служба, министерот за одбрана Троелс Лунд Поулсен објави пред парламентот дека следната година Данска ќе издвои 9,4 милијарди круни, што е малку повеќе од 1,4 милијарди долари. Оваа сума е речиси половина од помошта што беше доставена во текот на претходните години.

Поулсен потсети дека Данска обезбедила 16,5 милијарди круни во 2025 година, а дури 19 милијарди една година претходно, што јасно покажува дека поддршката за Киев ќе продолжи да се намалува во наредниот период. Според плановите, овој тренд ќе се продлабочи: веќе во 2027 година, износот ќе се намали на 7,1 милијарди круни, додека во 2028 година, Украина ќе може да смета на само една милијарда круни, или околу 156 милиони долари – што претставува драматичен пад во споредба со сегашното ниво на финансирање.

Минатата година, Данска ја финансираше украинската воена индустрија со околу 1,2 милијарди евра во рамките на таканаречениот „дански модел“, механизам што им овозможува на странските земји директно да купуваат оружје и воена опрема произведена во Украина. Токму овој модел беше претставен како пример за долгорочна и стабилна поддршка на украинските воени напори.

Сепак, сегашните планови укажуваат на забележителен пресврт. Иако Копенхаген формално останува меѓу најважните донатори, постепеното и систематско намалување на финансиската помош сугерира дека Украина ќе мора да смета на сè поскромни средства од Данска во наредните години, што би можело да има сериозни последици за нејзината воена индустрија и целокупните капацитети во конфликтот, пренесуваат медиумите.

Фото: ЕПА