Германската канцеларка, Ангела Меркел, наводно размислува за воведување досега најстрогo заклучување во земјата, пишува „Билд“.

Ваквата блокада би значела целосно затворање на државата.

Денеска, во Германија е забележан рекорден број смртни случаи од корона. Имено, починаа 1.244 лица, а вкупниот број смртни случаи од почетокот на пандемијата се искачи на 43.881.

Претходно, земјата забележа најголем број смртни случаи на 8 јануари кога починаа 1.188 заразени пациенти.

Според Институтот „Роберт Кох“, бројот на заразени на дневна основа е зголемен за 25.164 нови случаи, а вкупниот број на досега заразени е 1.978.590 лица.

Во меѓувреме, училиштата, продавниците што не продаваат основни продукти, баровите, рестораните и објектите за забава и култура се затворени со мерки што постепено се интензивираат од нивното воведување на почетокот на ноември.

Мерките, кои исто така предвидуваат дека едно домаќинство може да го посетува само едно лице надвор од тој круг, треба да останат во сила најмалку до крајот на јануари.

Канцеларката Ангела Меркел и другите членови на владата веќе предупредија дека мерките може да продолжат и по јануари.

Се очекува германската канцеларка да разговара за следните чекори во борбата против пандемијата на 25 јануари на состанокот со премиерите на 16 сојузни покраини.

Австрискиот парламент денеска одобри владата да воведе задолжителен негативен тест за одење во театар и за хотелско смесутвање и покрај воздржаноста на некои деловни здруженија.

Владејачките конзервативни пратеници во коалиција со зелените гласаа за владата на Себастијан Курц да ја воведе оваа мерка по завршувањето на третиот карантин на 24 јануари.

За ваквата одлука беа и опозициските социјалдемократи, кои го овозмижија потребното двотретинско мнозинство, а крајната десница беше против.

Австриската стопанска комора претходно соопшти дека е скептична во однос на мерката во кафулињата, хотелите и рестораните, кои сега се затворени.

Владата исто така сака да воведе задолжителен негативен тест на коронавирус при влегување во болница за лекување други болести, освен Ковид-19.

Главно поштедена од првиот пролетен бран на пандемијата, Австрија, не успева да го намали бројот на заразени, иако по Божик го воведе третиот карантин од почетокот на пандемијата.

Социјалната мрежа „Твитер“ го ограничи пристапот до официјалниот налог за промоција на „спутник 5“ – руската вакцина против коронавирусот.

На налогот е издадено предупредување дека пристапот до него е привремено ограничен бидејќи биле забележани „невообичаени активности“, иако корисниците сепак може да пристапат на страницата и да прават кликови, пренесува „Ројтерс“.

„Се обидуваме да ја откриеме причината за блокадата“, се наведува во соопштението на Рускиот фонд за директни инвестиции, кој управува со нарачките, но и со пласманот на вакцината на странските пазари.

Во соопштението се додава дека Фондот ќе побара од корисниците да пишуваат на „Твитер“ и да побараат налогот да се врати во нормала за да може да ги сподели сите информации поврзани со вакцината.

Сепак, во меѓувреме налогот е одблокиран а во новото известување се наведува дека тој бил привремено заклучен од автоматски филтер за спам, пренесе „Гардијан“.

„Овој налог е вратен и сега е целосно оперативен“, се додава во соопштението.

На самиот твитер налог на „спутник 5“ се наведува дека, според образложението од технолошката компанија, профилот за кратко бил блокиран поради можно нарушување на безбедноста од Вирџинија, САД.