Во меѓународната акција „DECOY III“, координирана од Европол, спречено е во оптек да бидат пуштени фалсификувани банкноти и кованици во вредност од околу 1,2 милијарди евра.

Операцијата била насочена кон криминални мрежи кои дистрибуираат лажни пари преку поштенски пратки, се наведува во соопштението на Европол што го пренесе „Танјуг“.

Повеќе од 90 отсто од запленетите фалсификати потекнуваат од Кина, вклучително и романското откривање на 4,8 милиони фалсификувани евро-банкноти и разбивањето на складиште со 223.000 пратки.

Покрај тоа, Португалија, Обединетото Кралство и САД откриле повеќе од 220.000 фалсификувани кованици во евра, фунти и долари, сите со потекло од Кина.

Во текот на шестмесечната фаза од операцијата, од јуни до ноември минатата година, запленети се повеќе од седум милиони фалсификувани предмети, вклучително 4,8 милиони во евра, 2,3 милиони во американски долари, 23.302 во британски фунти и 4.800 во швајцарски франци.

Операцијата покренала 70 нови истраги против криминални мрежи. Во „DECOY III“ учествувале Србија, Бугарија, Хрватска, Грција, Австрија, Португалија, Шпанија, Чешка, Франција, Германија, Ирска, Италија, Холандија, Полска, Романија, Турција, Обединетото Кралство и САД.

Премиерот на Унгарија, Виктор Орбан, остро реагираше по вчерашниот текст на бриселскиот портал Политико, во кој се наведува дека Украина би можела да влезе во Европската унија по принципот „обратно проширување“.

„Официјалното гласило на бриселската елита, Политико, го објави најновиот воен план на Брисел и Киев, планот од пет точки на Зеленски. Тие одлучија Украина да биде примена во Европската унија веќе во 2027 година“, наведе Орбан на платформата Икс.

Тој додаде дека таквиот нов план претставува отворена објава на војна кон Унгарија.

„Тие ја игнорираат одлуката на унгарскиот народ и се решени да ја отстранат унгарската влада со сите неопходни средства. Сакаат Партијата Тиса да дојде на власт, бидејќи тогаш повеќе нема да има вето, нема да има отпор и нема да има држење настрана од нивниот конфликт“, напиша Орбан и на крајот додаде:

„Овој април, на избирачките места, Унгарците мора да ги запрат. Фидес е единствената сила што стои меѓу Унгарија и бриселската власт и единствената гаранција за унгарскиот суверенитет“, порача Орбан.

Двајца кинески државјани се обвинети за шпионирање на будистичка група во Австралија, по налог на кинеско министерство. Станува збор за 25-годишен маж и 31-годишна жена кои, доколку бидат осудени, се соочуваат со максимална казна од 15 години затвор, пишува DW.

Австралиската федерална полиција вели дека дуото, заедно со друга Кинезинка која беше обвинета минатиот август, тајно собирале информации за будистичката група Гуан Јин Чита во главниот град Канбера. Се верува дека активностите биле извршени по налог на кинеското Министерство за јавна безбедност, главната полициска агенција во земјата.

Групата Гуан Јин Чита се смета за култ од страна на властите во Пекинг. Групата ги опишува своите цели како охрабрување на „луѓето да рецитираат будистички списи, да практикуваат ослободување на животот и да даваат големи завети за да им помогнат на повеќе луѓе“.

Ова е втор пат кинески државјани да бидат обвинети според законите за странско мешање донесени во 2018 година, а уапсената двојка е четвртото и петтото лице обвинето според законот.

Полицијата соопшти дека ја започнала истрагата минатата година по дојава од Австралиската безбедносна разузнавачка организација (ASIO). „Бројни странски режими ги следат, малтретираат и заплашуваат членовите на нашата дијаспора“, рече шефот на ASIO, Мајк Бургес, во соопштение објавено заедно со полицијата.

„Овој вид однесување е целосно неприфатлив и ние нема да го толерираме“, додаде тој, истакнувајќи дека странското мешање е една од најголемите безбедносни грижи на Австралија. „Сложената, предизвикувачка и променлива безбедносна средина станува сè подинамична, разновидна и нарушена“, рече Бургес.

фото/Depositphotos