Премиерот на Шпанија, Педро Санчез, изјави дека на неговата земја и се потребни дополнителни 15 дена вонредна состојба, што би траела до 21 јуни, за дефинитивно да се стави крај на здравствената криза предизвикана од пандемијата на коронавирус.

Затоа, Санчез неделава од парламентот ќе побара ново, шесто продолжување на вонредната состојба, со која се ограничува движењето и собирањето на 47 милиони жители.

„Постигнавме голем напредок“, рече премиерот на прес-конференцијата во Мадрид.

„Но, ќе ни треба уште едно, конечно продолжување на вонредната состојба, за да го завршиме она што го започнавме“, додаде тој.

Владата има намера да ги олабави мерките воведени на 14 март преку четири фази (од 0 до 3).

Денес 70 проценти од населението влезе во фаза 2, во која нема утврден дневен распоред за излегување на прошетка и дозволено е да се соберат до 15 лица, а сите трговски центри, без оглед на големината, може да примаат купувачи.

Најголемите градови, Мадрид и Барселона, најпогодени од вирусот, сепак останаа во фаза 1.

После 21 јуни, жителите на Шпанија би можеле слободно да се движат во рамките на секоја од 17-те автономни покраини, а од 1 јули ќе им биде дозволено да патуваат низ целата земја.

Тогаш Шпанија има намера да ги отвори своите граници и за странски туристи.

Грција планира до 1 јули 2021 година да ја забрани употребата на пластични производи за еднократно користење, рече министерот за животна средина и енергија, Костис Хацидакис.

Хацидикис ја објави веста на настан на плажа во Атина, на кој беше најавена соработка меѓу Министерството за животна средина и енергија и „А.Ц. Ласкаридис“, хуманитарна организација, со мото „Грција без пластика за еднократна употреба“.

Министерот истакна дека секој ден во Грција се користат голем број пластични производи за еднократна употреба и дека на тоа мора да му се стави крај.

„Затоа, почнува иницијативата ‘Грција без пластика за еднократна употреба’, која беше силно поддржана од премиерот, а која мора да се спроведе во соработка со граѓаните“, рече Хацидикис.

Производите на компанијата „Сухој“ претставуваат гордост на Русија и предизвикуваат извесен трепет меѓу конкурентите, изјави рускиот претседател, Владимир Путин.

„’Сухој’ е еден од лидерите во нашата авијациска индустрија. Вие произведувате такви авиони кои се предмет на завист во многу земји и предизвикуваат одреден трепет кај нашите конкуренти. Во исто време тие се гордост на Русија, без никакви претерувања“, рече рускиот претседател.

Путин изрази надеж дека, без оглед на пандемијата на коронавирусот, погоните на „Сухој“ работеле под такт, пренесува „Спутник“.

„Сухој“ е најголемата руска компанија, која се занимава со конструкција и производство на авиони, како и обука за пилоти. Главната задача на компанијата е да им обезбеди современа авијациска опрема на руските воздухопловни сили.