Мексиканскиот претседател Андрес Мануел Лопез Обрадор (67) соопшти дека е позитивен на коронавирусот.

Тој на својот „Твитер“ напиша дека има лесни симптоми и е оптимист, како и дека ќе продолжи да работи од дома. Како што рече, тој ќе има разговор од дома со рускиот претседател Владимир Путин за набавка на руската вакцина „Спутник V“ против коронавирусот.

Лопез Обрадор минатата година изјави дека ќе набави 12 милиони дози руска вакцина, доколку се покаже дека е ефикасна против вирусот.

Засега Мексико не одобри употреба на руска вакцина, но официјалните лица сакаат да ја прошират програмата за вакцинација за 128 милиони жители поради доцнењето во испораката на вакцините од страна на компаниите „Фајзер-Бионтек“.

Високорангираниот севернокорејски дипломат Рио Хјун-ву избега во Јужна Кореја.

Тој бил на должност амбасадор на Северна Кореја во Кувајт и се смета дека со семејството избегал во септември 2019 година.

Во извештајот на еден јужнокорејски дневник се наведува дека амбасадорот Рио сакал да обезбеди подобра иднина за своите деца, пренесува Би-би-си.

Ова потсетува на случајот со севернокорејскиот дипломат Џо Сонг-ги, кој беше на должност во Италија и во 2018 година беше прогласен за „исчезнат“, а всушност во 2019 година избегал, што беше објавено дури во 2020 година.

Јужнокорејските власти одбија да ги потврдат овие случаи.

Не се случува често високи севернокорејски претставници да избегаат, иако секоја година од Северна Кореја бегаат околу илјада луѓе.

Министрите за надворешни работи на земјите членки на ЕУ на денешниот состанок ќе разговараат за ажурирањето на стратегијата за дистрибуција на вакцините против Ковид-19 до трети земји, пред сè  од Западен Балкан и соседите.

Состанокот на Советот за надворешни работи ќе го води министерот за надворешни работи на ЕУ, Џозеп Борел. Како што е најавено, првата точка на дневниот ред ќе биде презентирање на стратегијата на ЕУ од страна на Борел за дистрибуција на вакцини против Ковид-19 на трети земји и други напори на ЕУ да се обезбеди еднаков и фер пристап до безбедни вакцини на глобално ниво.

Потоа министрите ќе разменат мислења за неодамнешното апсење на рускиот опозициски политичар Алексеј Навални по неговото враќање во Русија на 17 јануари 2021 година.

Советот, исто така, ќе разговара за трансатлантските односи, со цел иден ангажман со администрацијата на САД по инаугурацијата на Џо Бајден за 46. американски претседател.

Се очекува министрите да ги поздрават одлуките донесени од новиот американски претседател во текот на првите денови од неговиот мандат, особено кога станува збор за враќање на САД во Парискиот договор за климата и Светската здравствена организација.

Размената на мислења, исто така, ќе се фокусира на состојбата на мигрантите и бегалците во Босна и Херцеговина, вклучително и различни аспекти на акцијата на ЕУ за решавање на оваа „непосредна хуманитарна состојба“.