Свет
Маж во САД се обидел да киднапира авион за да бара вонземјани, се заканувал со бомба

Полицијата во Лас Вегас уапси маж што ја пробил безбедносната ограда на аеродромот тврдејќи дека сака да украде авион за да стигне до местото познато како Област 51.
Човекот пред полицијата изјавил дека сакал да го украде авионот за да може да лета до Областа 51 и да ги види вонземјаните. Тој беше уапсен кога со автомобил ја пробил оградата на меѓународниот аеродром „Мекаран“, паркирал кај рампата за авионот и се заканувал со бомба, пишува Си-ен-ен.
Уапсен е поради терористички чин, се наведува во полицискиот извештај.
Област 51
Областа 51 е воена база лоцирана во јужниот дел на западна Невада во САД. Се користи како полигон за обука на воздухопловните сили на САД. Самото име, всушност, доаѓа од ознаката на мапата.
Таа воена база долго време беше во фокусот на разни теоретичари на заговор, кои веруваат дека американската влада таму крие тела на вонземјани и НЛО.
Закани со бомба
Според полицијата, кога ја пробил оградата, мажот влетал меѓу неколку авиони, па се паркирал во близина на еден од нив и им се заканил на вработените.
„Имам е*eна бомба. Ќе го кренам во воздух ова место“, им се заканил.
Сведоците велат дека човекот на лицето носел маска на кловн. По заканата, тој се вратил во возилото, а вработените избегале на безбедно и почнале да го евакуираат аеродромот.
Кога пристигнала полицијата, успеала да го запре возилото и веднаш го привела осомничениот. При претресот на неговиот автомобил полицајците пронашле направа што личела на боца за кислород и нешто што личело на апарат за гаснење пожар околу кое биле обвиени многу жици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Екстремни турбуленции на лет до Португалија – има повредени, храната е расфрлана насекаде

Силни турбуленции пред неколку дена предизвикале хаос на летот од Ангола до Португалија, при што има најмалку десет повредени лица.
Видеата и фотографии направени од патниците во авионот покажуваат како оброците, послужавниците и пластичниот прибор за јадење е расфрлан на подот во леталото, за време на летот од Луанда до Лисабон.
Дамки од храна и пијалоци може да се видат низ целата кабина.
Медиумите во Португалија објавија дека најмалку десет лица, вклучително и двајца членови на екипажот, се повредени на летот „Хај Флај“ со кој управува ТААГ Ангола ерлајнс.
„Ангола ерлајнс“ се правда дека неповолните атмосферски услови ги предизвикале турбуленциите, кои наводно почнале додека авионот летал над Демократска Република Конго.
На осум патници им била потребна лекарска помош, а на еден од повредените помош му укажал лекар кој бил во авионот.
Во соопштението на авиопревозникот се наведува дека екипа на итната помош и медицински тим биле испратени на аеродромот во Лисабон, каде што авионот слетал во 20.37 часот, седум часа и 18 минути по полетувањето.
Португалските медиуми објавија дека многу од патниците покажале симптоми на анксиозност.
Европската Унија им забрани на авионите на ТААГ да влезат во европскиот воздушен простор во јули 2007 година поради безбедносни причини.
Забраната беше целосно укината во април 2019 година, по голем број законски олеснувања низ годините.
Европа
Голем шумски пожар во Шпанија, евакуирани над 1.500 лица

Голем шумски пожар избувна во четвртокот на истокот на Шпанија во Вилануева де Вивер, во провинцијата Кастелон, недалеку од Валенсија.
Опустоши околу 4.000 хектари шума, а од загрозената област беа евакуирани околу 1.500 луѓе.
Повеќе од 500 пожарникари, поддржани од 20 авиони и хеликоптери, се распоредени за да го стават огнот под контрола во близина на селото Вилануева де Вивер, соопшти денеска шпанската служба за итни случаи, пренесува Ројтерс.
Во соопштението се наведува дека пожарникарите успеале да спречат пожарот да се прошири и на други подрачја. Властите објавија дека се истражуваат причините за пожарот, објави шпанскиот весник „Ел Паис“.
Свет
Кубанците денеска излегуваат на избори

Кубанците почнаа да гласаат за ново свикување на Националното собрание во следните пет години на избори каде што нема изненадувања бидејќи има 470 кандидати за 470 пратенички места, но одлучувачки фактор ќе биде излезноста, која во последно време се намалува.
Осум милиони гласачи беа поканети да изберат 470 кандидати – 263 жени и 207 мажи – главно членови на Кубанската комунистичка партија (ПЦЦ, единствената партија во земјата) за 470 места во Националното собрание.
Избирачките места се затвораат во 18:00 часот (24 часот по средноевропско време). Излегувањето на гласање во Куба не е задолжително. Гласачите можат да го заокружат името на еден или повеќе кандидати во изборната единица или да заокружат „избери ги сите кандидати“, што значи сите 470 кандидати.
Половина од кандидатите беа назначени од досегашните претставници, а останатите од советите на општините. Меѓу кандидатите се претседателот Мигел Дијаз-Канел (62) и поранешниот лидер Раул Кастро (91).
Изборите се одржуваат во време кога Куба минува низ својата најтешка економска криза во последниве повеќе од 30 години, со галопирачка инфлација и невиден бран на миграција, погодени од пандемијата, заострувањето на американското ембарго и структурните слабости на домашната економија.