Рускиот претседател Владимир Путин му го честиташе 90. роденден на првиот претседател на Советскиот Сојуз, Михаил Горбачов, нарекувајќи го исклучителна фигура на модерната ера која имала значително влијание врз текот на историјата.

Телеграмата на Путин до Горбачов, кој го слави јубилејот на 2 март, беше објавена на веб-страницата на Кремљ.

„Примете ги моите честитки по повод 90. јубилеј. Вие со право припаѓате на плејадата извонредни луѓе, исклучителни државници од модерната доба, кои имале значително влијание врз текот на татковинската и светската историја“, рече рускиот лидер.

Претседателот додаде дека професионалното и животно искуство, енергија и творечки потенцијал му помагаат на Горбачов да учествува во јавна, едукативна работа, како и во посветувањето внимание на реализацијата на меѓународните хуманитарни проекти.

Горбачов беше на чело на Советскиот Сојуз од 1985 до 1991 година како генерален секретар на Комунистичката партија на СССР, а потоа и како претседател на СССР. Откако ги потпиша Беловешките договори во декември 1991 година, тој објави дека ја напушта функцијата претседател.

Крајот на Студената војна, повлекувањето на трупите од Авганистан, но и распадот на советската економија и распадот на земјата се поврзани со владеењето на Горбачов. Тој исто така придонесе за колапс на комунизмот во источноевропските земји.

Горбачов е добитник на Нобелова награда за мир во 1990 година. Неговата кандидатура беше предложена од германските власти, како знак на благодарност за ставот на Горбачов во врска со обединувањето на Германија.

Турскиот претседател Реџеп Таип Ердоган најави олеснување на ограничувањата воведени за да се спречи ширењето на коронавирусот во неколку провинции кои се категоризираат како провинции со ниско или средно ниво на зараза.

Ердоган вчера рече дека кафулињата и рестораните ќе можат повторно да работат со половина капацитет помеѓу 7:00 и 19:30 часот, освен оние лоцирани во 17 региони кои се категоризираат како многу ризични, објави АП.

Полицискиот час во текот на работните денови ќе продолжи да важи низ цела Турција, како дел од владината програма за контролирана нормализација, рече тој.

Училиштата повторно ќе се отворат во региони со низок и среден ризик, рече Ердоган. Во другите региони, само учениците кои се подготвуваат за приемни испити во средните училишта или универзитети, повторно ќе седнат во училишните клупи.

Турција во последните денови забележа највисоко ниво на зараза од средината на јануари.

Од почетокот на пандемијата на коронавирусот во Турција се регистрирани повеќе од 2,7 милиони случаи на Ковид-19 и околу 28.500 смртни случаи.

Лидерот на Социјалдемократската партија на Германија, Норберт Валтер-Борјанс, ги обвини германската канцеларка Ангела Меркел и министрите од ЦДУ за „лошо управување“ со кризата од коронавирусот.

Валтер-Борјанс изјави дека Германија има шеф на владата кој има направено бројни пропусти во координирањето со кризата.

Тој рече дека министрите од коалицискиот партнер на СПД не ги исполнуваат своите обврски.

Во исто време, ги пофали социјалдемократските членови на владата, како што е вицеканцеларот Олаф Шолц, за кого Валтер-Борјанс тврди дека ги поправа сите проблеми.

Тој вели дека придонесот на членовите на владата од редовите на ЦДУ и ЦСУ е далеку зад оние од редовите на СПД.