Најмалку четири лица загинаа во земјотресот со јачина од 6,9 степени кој го погоди островот Минданао во јужниот дел на Филипините, соопштија локалните власти.

Полицијата јави дека меѓу жртвите е шестгодишно девојче кое загина кога ѕид се срушил врз неа.

Најмалку три лица загинаа, а неколку се повредени при рушење на трикатна зграда, каде на приземјето имало продавница, јавија медиумите во земјата.

Уште неколку лица можно е да се заглавени под урнатините, а спасувачките операции беа привремено стопирани поради речиси 90 помали земјотреси што следеа по главниот удар.

Лидерот на британските лабуристи Џереми Корбин им се извини на приврзаниците заради големите загуби на неговата партија на изборите.

Тој го призна неуспехот на партијата на изборите и ја прифати својата одговорност за тоа.

„Резултатот е тежок удар за секој на кого очајнички му беше потребна вистинска промена во нашата земја. Жал ми е што потфрливме и јас ја преземам одговорноста за тоа“ напиша Корбин во отвореното писмо до „Мирор“, пренесе Би-Би-Си.

Конзервативците на премиерот Борис Џонсон осовија убедливо мнозинство на општите избори во четвртокот, и тоа е нивната најголемата победа во последните 30 години, потиснувајќи ги лабуристите дури и од нивните традиционални упоришта. Спротивно на нив, лабуристите го доживеаја најголемиот пораз од 1935 година.

Прелиминарните разговори за избор на нов лидер на партијата најверојатно ќе почнат идната недела, а Корбин својата одлука за заминување ќе ја донесе на специјална седница на почетокот на јануари.

Српскиот претседател, Александар Вучиќ, изјави дека се надева оти премиерот на Велика Британија, Борис Џонсон ќе ја посети Србија.

„Ќе ни биде голема чест британски премиер по долги години да ја посети Србија“. рече Вучиќ.

Тој потоа се обрати до амбасадорот на САД во Србија, Ентони Годфри.

„Ние не паметиме кога последен пат во Србија дошол претседател. Мислам дека Картер беше, време е и Трамп да дојде“, порача Вучиќ, пренесе „Б92“.

„Прво доаѓа Џонсон, потоа и Трамп“, нагласи српскиот претседател.