Свет
Мохамед Џавад Зариф: САД се секогаш добредојдени за преговори
Иранскиот министер за надворешни работи, Мохамед Џавад Зариф, вели рече дека Вашингтон е секогаш добредојден да продолжи со преговорите со Техеран, но прво мора повторно да ги укине санкциите ,пренесува Ен-би-си.
„Штом овие санкции се укинат, тогаш собата за преговори е широко отворена. САД ја напуштија преговарачката маса и секогаш се добредојдени да се вратат“, вели Зариф, кој моментно е во Њујорк на конференција на ОН.
Тој истакна дека Трамп продолжува да зборува за наводните нуклеарни аспирации на Техеран, но посочи дека Иран одамна ја напуштил својата програма за нуклеарно оружје.
Да бевме заинтересирани за развој на нуклеарно оружје, можевме да го направиме тоа многу одамна“, рече тој.
Коментирајќи во врска со неодамнешната ескалација на тензиите меѓу двете земји за кои многумина стравуваат дека би можеле да доведат до сеопфатна војна, Зариф ја минимизира можноста од вооружен конфликт.
„Не верувам дека Трамп сака војна, но верувам дека околу него има луѓе на кои војната нема да им пречи. Јас не мислам дека тие ќе успеат бидејќи, на крајот на краиштата, мислам дека ќе преовлада внимателноста. Луѓето знаат дека Иран е голема, горда земја и нема лесно да примиме воен удар“, рече Зариф.
Коментирајќи што очекува од можните идни преговори, Зариф рече дека треба да се најде ситуација во која сите ќе бидат победници, како и во сите други преговори.
„Во спротивно, ќе се најдеме во ситуација во која сите ќе изгубат“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во руски напад на Павлоград загинаа 12 лица
Во нападот на руски дронови што утрово беше извршен врз градот Павлоград загинаа 12 лица, а ранети се седуммина, соопшти шефот на воената управа на Дњепропетровската област, Александар Ганжа.
– Непријателско беспилотно летало експлодираше покрај службен автобус на едно од претпријатијата во Павлоградскиот округ. Според прелиминарните информации, 12 лица загинаа, а седуммина се повредени, се наведува во објавата на Ганжа.
Во исто време во руско бомбардирање на градот Славјанск во Доњецката област утрово загина 43-годишна жена, а уште една е ранета.
– Загина 43-годишна жена, жителка на Краматорск. Мое искрено сочувство до нејзиното семејство и пријателите. Една мештанка е повредена, информира началникот на воената управа на Славјанск, Вадим Љах.
Тој потврди дека во нападот се оштетени 14 повеќекатници, три автомобили, филијала на Нова пошта и деловен центар.
Свет
Бројот на жртви во пожарот во Швајцарија се искачи на 41, меѓу жртвите и 18-годишно момче
Почина осумнаесетгодишно момче кое беше повредено во пожарот во барот во Кран-Монтана, соопшти денеска швајцарската новинска агенција Keystone-SDA, повикувајќи се на обвинителството.
Младиот швајцарски државјанин починал во болница во Цирих. Со неговата смрт, бројот на жртви од пожарот во барот „Le Constellation“ во швајцарскиот центар Кран-Монтана се искачи на 41 лице.
Пожарот избувна за време на забава за Нова година, на која присуствувале главно млади луѓе, откако прскалки го запалиле таванот. Пламенот брзо се проширил, а многу луѓе останале заробени во подрумот, не можејќи навреме да побегнат преку тесните скали.
Повеќе од 100 луѓе беа повредени, од кои околу 80 претрпеа тешки изгореници.
Јавното обвинителство води истрага за убиство од небрежност, нанесување телесни повреди и предизвикување пожар.
Свет
Две лица загинаа во најновите руски напади со дронови врз Украина
Маж и жена загинаа во украинскиот град Днипро откако Русија изврши нов бран напади со дронови во текот на ноќта, соопштија денеска официјални лица.
Во нападот избувнал пожар, а една куќа е целосно уништена, изјави воената гувернерка Олександр Ханжа во објава на Телеграм.
Украинските воздухопловни сили соопштија дека Русија во текот на ноќта извршила вкупно 90 напади со дронови низ целата земја, од кои околу десетина завршиле со директни погодоци.
Нападите се случуваат во време кога руски и украински претставници денеска треба да се сретнат во Абу Даби на нови разговори за можен крај на војната.
Разговорите следуваат по слична средба одржана минатата недела, прва по подолга пауза, но овојпат без присуство на американски посредници.
Со цел создавање позитивна основа за разговорите, Русија го прифати барањето на американскиот претседател Доналд Трамп привремено да ги запре нападите врз украинската енергетска инфраструктура, откако претходните напади врз електраните оставија илјадници луѓе без струја, греење и вода, при температури под нулата.
Според Кремљ, ограничениот прекин на огнот треба да трае до денеска.
Во меѓувреме, во Украина продолжуваат работите за обновување на снабдувањето со електрична енергија по вчерашниот прекин, предизвикан од дефект на далноводите.
Градоначалникот на Киев, Виталиј Кличко, изјави дека околу 1.000 домаќинства и натаму се без греење, откако тешкото руско бомбардирање ја оштети електроенергетската и топлинската инфраструктура на главниот град.

