Во Италија во последните 24 часа починале 760 луѓе од коронавирус, со што вкупниот број на починати во оваа земја се зголеми на 13.915.

Според последните податоци, новозаразени се 4.668 лица.

Италија веќе еден месец е земја со најголем број жртви од коронавирус. Најтешка е ситуацијата во северниот дел од земјата, особено во Ломбардија. Гувернерот на Ломбардија, каде денеска починаа 367 луѓе, изјави дека е оптимистичен.

„Ова е уште еден позитивен ден. Намалувањето на бројот на заболени и починати ќе почне за неколку дена“ истакна Атило Фонтана.

Многу израелски функционери се наоѓаат во самоизолација откако било потврдено дека министерот за здравство, Јаков Лицман, е позитивен на коронавирус.

Министерот бил и во чести контакти со премиерот Бенјамин Нетанјаху, соопшти Министерството за здравство.

Во Израел се регистрирани речиси 7.000 заболени од коронавирус, а починале 34. Голема ултра-ортодоксна заедница, каде е член Лицман, најмногу е погодена од епидемијата на коронавирус. Многумина од нив на самиот почеток ја прекршуваа забраната за движење, но изгледа дека по зголемувањето на бројот на заболени тие ги прифатија мерките на владата.

Крематориумите во градот Њујорк работат продолжено, а државата Њујорк не постигнува да ги згрижи сите починати, пренесуваат американските медиуми.

Градот Њујорк ги погребува починатите на привремени локации низ земјата. Епидемијата на коронавирус сè уште не го достигнала врвот во Њујорк, но погребалните служби во градот и државата Њујорк веќе имаат полни раце работа.

Досега од последици на Ковид-19, само во градот Њујорк починале околу 1.400 луѓе. Поголем број њујорчани избрале кремирање наместо погреб, но најнаселениот американски град има само четири крематориуми, па погребните фирми предупредуваат дека подолго се чека на кремирање.

„Ладилниците за починатите се преполни, не можат да примат повеќе од 40 тела“, вели Ендру Нимо, менаџер на една погребна фирма.

Оваа ситуација ги погодува и болниците, кои побавно се ослободуваат од починатите, бидејќи нивните семејства мораат подолго да чекаат на термин за кремирање или погреб.

Американската агенција за кризни ситуации нарачала од Министерството за одбрана 100.000 вреќи за починатите, објави Си-ен-ен.

Во САД се очекуваат меѓу 100 и 200 илјади мртви од коронавирус. Прогнозите се црни, особено по објавата на американскиот претседател Доналд Трамп на почетокот на кризата дека вирусот ќе исчезне самиот од себе и дека тоа ќе биде чудо.

Цела земја е во блокада, а моментално 96 отсто од населението живее под одредбата да остане дома и да не излегува надвор освен за итни ситуации. Само 11 држави не ја воведоа одредбата, а тоа се Алабама, Арканзас, Ајова, Мисури, Северна Дакота, Небраска, Јужна Каролина, Јужна Дакота, Тенеси, Јута и Вајоминг. Но, се очекува и тие наскоро да ги прифатат препораките на фереалните власти.