Новозеландски полицаец е убиен, а друг е сериозно повреден при рутинска сообраќајна контрола во Оклeнд, а по напаѓачот се трага, објави полицијата од Нов Зеланд.

Двајцата полицајци, кои се обиделе да го запрат возилото од кое било пукано, не биле вооружени, што е вообичаено во Нов Зеланд, затоа што само припадниците на специјалната полиција на аеродромите носат оружје.

„Според досегашната истрага, ништо не укажувало дека ќе се случи нешто необично“, рече началникот на полицијата, Ендрју Костер, на прес-конференција, пренесува Си-ен-ен.

An unarmed police officer has been shot dead while carrying out a routine traffic stop in the New Zealand city of Auckland — the first to be killed in the line of duty in the country since 2009. https://t.co/vOMBr83xq0

— CNN (@CNN) June 19, 2020

Полицијата не ја наведе причината зошто полицајците го запреле автомобилот за да извршат проверка.

Училиштата во близина на местото на настанот во западниот дел на Окленд се затворени, а полицијата го бара сторителот, кој полесно повредил и еден цивил додека бегал со автомобил.

Во Нов Зеланд, каде што вооруженото насилство е релативно ретко, убиениот полицаец е првата жртва меѓу чуварите на законот по повеќе од една деценија.

Од 1890 година, само 32 полицајци се убиени на должност, според веб-страницата на полицијата во Нов Зеланд.

Дебатата околу тоа дали полицијата треба да биде вооружена се интензивираше во последните неколку недели во Нов Зеланд.