Свет
Ново видео од полициска бруталност пред болница

Видео од полициски службеник во Пенсилванија, кој со колено ги притиска вратот и главата на еден човек при приведување, предизвика бес кај демонстрантите и ги осуди службените лица, јавува Ен-би-си.
GRAPHIC VIDEO: @AllentownPolice held down this man’s face to the pavement and then one of its officers placed their knee on his neck!! This happened yesterday and is exactly what led to #GeorgeFloyd’s death. We need this officer’s name and badge # NOW. #ICantBreathe pic.twitter.com/3qSlKGSgF4
— Ben Crump (@AttorneyCrump) July 12, 2020
На видеото може да се види како еден од полицајците му ги притиска главата и вратот на човекот со коленото и рамото. Ен-би-си наведува дека полицискиот службеник е белец, а дека уапсениот се чини дека е црнец.
Видеото беше објавено на Фејсбук, по што движењето „Блек лајвс медр“ побара од полицијата да ги објави своите видеа и да ги суспендира полицајците вклучени во инцидентот.
Ова движење беше формирано кога Афроамериканецот Џорџ Флојд почина во Минеаполис, откако полициски службеник го притисна неговиот врат за време на апсењето, а протестите траеја со недели низ САД и низ целиот свет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Британскиот премиер: Упадот со руски беспилотни летала во Полска е исклучително загрижувачки

Британскиот премиер Кир Стармер утрово остро го осуди рускиот упад во полскиот воздушен простор нарекувајќи го екстремно загрижувачки.
Стармер го опиша нападот врз Украина како варварски и додаде дека тоа е грубо неодговорен потег на Русија што само го потврдува очигледното непочитување на мирот од страна на Путин и континуираното бомбардирање невини Украинци.
Тој рече дека разговарал со полскиот премиер Доналд Туск за јасно да ја стави до знаење поддршката на Обединетото Кралство. „Искрено сум им благодарен на НАТО и на полските сили, кои бргу реагираа за да ја заштитат алијансата“, рече Стармер.
Тој додаде дека Велика Британија, заедно со партнерите и преку раководството на коалицијата на волјата, ќе продолжи да го зголемува притисокот врз Путин сè додека не се постигне праведен и траен мир.
Фото: принтскрин
Регион
Трагедија на аеродромот „Никола Тесла“ во Белград: маж почина штом слета од Тунис

Вистинска драма се одвивала синоќа, еден час по полноќ, на аеродромот „Никола Тесла“ во Белград, кога на патникот Н. Л. (64) му се слошило штом неговиот авион слетал од Тунис.
Според информациите објавени од „Блиц“, лекарите на аеродромот „Никола Тесла“ веднаш му укажале помош, но човекот не можел да се спаси.
Неговата сопруга била до него цело време. Таа, неофицијално, изјавила дека на нејзиниот сопруг му се слошило штом излегол од авионот. Лекарите итно реагирале, но и покрај нивните напори, немало начин да се спаси.
За случајот било известено Вишото јавно обвинителство, кое нареди обдукција на телото на мажот, објавија српските медиуми.
Свет
Фон дер Лајен: Европа ќе го брани секој квадратен сантиметар од својата територија

Претседателката на Европската комисија (ЕК), Урсула фон дер Лајен, го одржа своето традиционално обраќање за состојбата на Европската Унија пред европратениците сумирајќи ги достигнувањата од изминатата година и ги истакна предизвиците со кои се соочува Унијата, но и клучните приоритети за следната година како во Европа така и на глобално ниво.
Фон дер Лајен го почна својот говор со силен апел Европа да заземе јасно место на глобалната сцена.
„Европа се бори за мир, се бори за интегритетот на нашиот континент, за слободна и независна Европа, за нашите вредности и нашата демократија, нашата слобода и нашата способност сами да ја одредуваме нашата судбина. Немојте да се залажувате, ова е нашата иднина“, рече претседателката на ЕК нагласувајќи дека денешниот свет се карактеризира со суровост.
„Не смееме да ги затвораме очите пред проблемите, нашите граѓани го чувствуваат тоа, тие се загрижени за бескрајната спирала на настани што ги гледаат на вестите“, додаде таа.
„Се цртаат нови контури на светски поредок заснован на моќ. Светските сили се или амбивалентни или непријателски настроени кон европските земји. Поради сето ова, мора да се појави нова Европа“, предупреди Фон дер Лајен.
Таа нагласи дека Европа мора да биде независна и силна. „Европа отсекогаш останала обединета и успевала, а ние мора да го сториме истото тоа сега. Ве прашувам, дали Европа е доволно храбра за оваа борба?“, праша таа заклучувајќи дека одлуката е јасна и дека единството меѓу членките на ЕУ мора да остане приоритет.
Претседателката на ЕК потсети на тешката ситуација во Украина истакнувајќи ја хуманитарната криза што најмногу ги погодува децата и најави иницијатива за нивно враќање. „Секое дете мора да се врати, оваа војна мора да заврши и мирот мора да се обезбеди“, рече таа предизвикувајќи громогласен аплауз од публиката.
„26 земји изразија подготвеност да учествуваат за да се стави крај на оваа војна, но видовме како изгледа дипломатијата за Русија“, потсети претседателката осврнувајќи се на најновите брутални напади врз цивили во Украина.
„Мораме итно да работиме на ново решение за финансирање на воените напори на Украина врз основа на имобилизирани руски средства, со кои можеме да ѝ обезбедиме на Украина заем за репарации“, рече Фон дер Лајен.
Таа додаде дека овие средства остануваат руски средства, а Украина ќе го врати заемот само кога Русија ќе ги исполни своите обврски за репарации. „Парите ќе ѝ помогнат на Украина денес, но ќе бидат клучни и за безбедноста на Украина на среден и на долг рок. На пример, финансирање силни украински вооружени сили како прва линија на безбедносни гаранции“, рече Фон дер Лајен.
„Европа цврсто стои со Полска“, рече Фон дер Лајен во контекст на нападите со руски беспилотни летала што ја преминаа полската граница синоќа. „Русија мора да плати за предизвиканата штета“, нагласи таа.
„Европа ќе го брани секој квадратен сантиметар од својата територија“, нагласи таа најавувајќи јасен план со конкретни цели за одбрана до 2030 година. „Мора да се подготвиме денес. Кога зборуваме за иднината, зборуваме за нашата независност. Европа е идејата за слобода и заедничка сила“.
„Само обединета Европа може да биде силна и независна, затоа мора повторно да овозможиме обединета Европа“, додаде Фон дер Лајен.
Претседателката на ЕК емотивно зборуваше за хуманитарната катастрофа во Газа.
„Она што се случува во Газа ја потресе цела Европа. Деца што молат за храна, мајки што ги држат своите гладни деца во раце и затоа морам јасно да кажам – глас предизвикан од човечка акција никогаш не може да биде оружје на војната. За доброто на децата, за доброто на човештвото, ова мора да престане“, нагласи таа.
Фото: принтскрин