Норвешкиот пратеник Кристијан Тибринг-Гједе, кој есеноска го номинира американскиот претседател Доналд Трамп за Нобелова награда за мир, сега по упадот на неговите приврзаници во Конгресот, вели дека не е сигурен оти Трамп е способен да остане во Белата куќа до крајот на мандатот.

Тибринг-Гједе, пратеник од десното крило на популистичката Напредна партија, за телевизијата НРК изјави дека не е сигурен оти американскиот претседател е во состојба последните 13 дена да ги помине во Белата куќа.

Состојбата на Трамп е сè полоша и полоша откога ги загуби изборите во ноември, додаде тој, пренесува порталот „Локал.но“.

Според него, лицата одговорни за насилство и вандализам мора да се соочат со последиците од своите постапки.

Во септември 2020 година Тибринг-Гједе го предложи Трамп за Нобелова награда за мир поради неговата улога во постигнувањето историски договор меѓу Израел и Обединетите Арапски Емирати. Тој веќе го номинира Трамп за таа награда во 2018 година.

Сега, сепак, тој вели дека е преплашен од тоа како Трамп ги охрабрува своите приврзаници.