Свет
ОАЕ се повлекле од коалицијата предводена од САД на Блискиот Исток
Министерството за надворешни работи на Обединетите Арапски Емирати соопшти денеска дека ОАЕ се повлекле од поморската безбедносна коалиција предводена од САД на Блискиот Исток пред два месеца, објави новинската агенција на Емиратите (WAM).
„Како резултат на нашата тековна процена на ефективната безбедносна соработка со сите партнери, ОАЕ пред два месеца го повлече своето учество во комбинираните поморски сили“, се додава во соопштението.
Во соопштението се додава дека ОАЕ го отфрлаат „погрешното карактеризирање во неодамнешните извештаи во печатот“.
Пред пет недели Иран заплени два танкера во рок од една недела во водите на Заливот во близина на Ормуската Теснина. Вториот танкер, „Ниови“, пловел од Дубаи кон пристаништето Фуџаира во ОАЕ.
Во соопштението на ОАЕ се вели дека статијата на „Волстрит џурнал“ објавена во вторникот, во која, цитирајќи извори од САД и од Персискиот Залив, се вели дека ОАЕ се фрустрирани од недостигот на американски одговор на неодамнешното запленување танкери, е погрешно карактеризирање на разговорите меѓу двете земји.
Комбинираните поморски сили се работна група од претставници на 34 нации, која работи на безбедноста, борбата против тероризмот и борбата против пиратството во областите на Црвеното Море и на Заливот, низ кои поминуваат некои од најважните светски бродски рути.
Седиштето на силите е во Бахреин, заедно со Петтата флота и Централната команда на американската морнарица.
Во соопштението објавено денеска, Министерството за надворешни работи истакна дека ОАЕ се посветени на мирниот дијалог и на дипломатскиот ангажман како средства за унапредување на регионалната безбедност и стабилност и на одговорното обезбедување сигурност на пловидбата во нивните мориња во согласност со меѓународното право.
Американската морнарица не одговори на барањето за коментар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
120 членови на Исламска држава избегаа од затвор во Сирија
Сирискиот министер за внатрешни работи изјави дека околу 120 припадници на Исламска држава избегале од затвор во градот Шадади, откако курдската веб-страница Rudaw објави дека 1.500 избегале, повикувајќи се на портпарол на Сириските демократски сили (СДФ).
Министерството за внатрешни работи соопшти дека неговите специјални сили и единици на сириската армија влегле во градот Шадади по пробивот и заробиле 81 бегалец. Потрагата по преостанатите избегани е во тек.
Обвинувања за намерно ослободување милитанти
Војската претходно ги обвини Сириските демократски сили предводени од Курдите за ослободување на милитантите на Исламска држава затоа што го контролираат затворот во источниот град.
По неколкудневни борби со владините сили, СДФ се согласија во неделата да се повлечат од Рака и Деир ал-Зор, две провинции со арапско мнозинство што ги контролираат со години и каде што се наоѓаат главните нафтени полиња во Сирија.
Свет
Австралија затвора десетици плажи поради напади од ајкули
Десетици плажи долж источниот брег на Австралија, вклучувајќи го и Сиднеј, се затворени по четири напади од ајкули во последните два дена.
Затворање на плажите поради безбедност
Плажите во градот Порт Маквари, околу 400 километри северно од Сиднеј, беа затворени откако еден сурфер беше каснат од ајкула. Иако беше однесен во болница, човекот е во стабилна состојба.
„Ако сакате да пливате, би ве советувале да изберете базен бидејќи плажите во моментов не се безбедни“, изјави за новинарите Стивен Пирс, извршен директор на Surf Life Saving.
„Имаме многу лош квалитет на водата, што е погодно за активност на ајкули“, додаде тој.
Одлуката за затворање беше донесена во средината на летото на јужната хемисфера, кога австралиските плажи обично се преполни со туристи и локални жители.
Напади врз сурфери
Уште еден напад од ајкула врз сурфер беше пријавен во Сиднеј во понеделник вечерта.
Според еден очевидец, друг сурфер го одржал нападнатиот човек во живот користејќи јаже од неговата даска како импровизирана направа за да го запре крварењето.
„Дишеше, но не беше свесен. Се обидовме да го разбудиме, сите помогнавме колку што можевме“, изјави тој за јавната телевизија Еј-би-си.
Болничарите го лекуваа повредениот маж за сериозни повреди на ногата, пред да го однесат во болница во критична состојба.
Сите плажи на северниот брег на градот ќе останат затворени во наредните денови, потврди полицијата.
Причини за зголемена активност на ајкулите
Нападите следеа по деновите на обилни дождови што ги заматија плитките води и создадоа идеални услови за ајкулите.
„Ајкулите обично не напаѓаат луѓе, но матната вода ја намалува нивната видливост и го зголемува ризикот да удрат нешто или некого. Во тој момент, тие имаат тенденција да касаат, што е одбранбен рефлекс“, напиша академик и експерт за однесување на ајкули Крис Пепин-Неф во колумна за Sydney Morning Herald.
Претходно во понеделник, 10-годишно момче успеа да избега откако ајкула го собори од даската за сурфање и одгриза парче од даската. Еден ден претходно, друго момче заврши во критична состојба откако беше каснато од ајкула.
Во Австралија во просек има околу 20 напади од ајкули годишно, од кои до три се фатални. Сепак, овие бројки се далеку помали од бројот на давења на австралиските плажи.
Свет
Истражителите ја пронајдоа клучната причина за несреќата во Шпанија
Истражителите на местото на несреќата пронајдоа оштетен спој на шината за кој се верува дека е клучната причина за излетувањето на возот од шините, објави „Ројтерс“, повикувајќи се на извор запознаен со првичните наоди од истрагата.
Според агенцијата, експертите што ги истражуваат причините за несреќата од синоќа откриле скршен спој на шината.
Техничарите пронајдоа абење на спојот помеѓу деловите од шината, познат како рибја плоча, и рекоа дека ова укажува дека дефектот постоел веќе некое време.
Претседателот на шпанската државна железничка компанија „Ренфе“, Алваро Фернандез Хередија, претходно изјави дека „човечката грешка“ е практично исклучена како причина за несреќата.
Како што претходно беше објавено, засегнатиот дел од пругата беше целосно обновен дури во мај минатата година, но проблемите продолжија да се појавуваат на него.
фото/епа

