Британската полиција заплени речиси еден тон кокаин скриен во гајби со овошје од Јужна Америка и уапси двајца мажи. Вредноста на запленетиот кокаин се проценува на речиси 128 милиони долари, а пронајден е во пристаништето Довер на југоистокот на Англија, пренесува „Ројтерс“.

Уапсени се мажи на возраст од 40 и 64 години, кои се осомничени за увоз на дрога од класа А, а полицијата ја открила дрогата со дешифрирање на пораките на организаторите.

„Оваа операција спречи големи количини кокаин да завршат на улиците“, изјави еден инспектор.

Во Италија расте бројот на заразени со Ковид-19, па во последните 24 часа откриени се 1.670 нови случаи на инфекција, 250 повеќе од претходниот ден. Починаа 20 лица како последица на вирусот.
Последните 24 часа, рекорден број на луѓе биле тестирани за Ковид-19, повеќе од стотина илјади.

Американски инфектолог Ентони Фаучи, директор на Американскиот национален институт за алергии и болести (НИАИД), оцени дека Италија „мора да биде крајно внимателна во оваа фаза, имајќи предвид дека инфекцијата со коронавирус се шири во соседните земји и дека ова е време на голем предизвик“, бидејќи треба да се обнови економијата.

Д-р Фаучи учествуваше на интернет-конференцијата „Граници, фестивал на здравјето“ (Frontiere-Festival di Salute) организирана во Рим и по тој повод рече дека враќањето во нормален живот може да се очекува на крајот на следната година.

До тогаш, Фаучи препорачува строго почитување на пропишаните мерки: заштитни маски, физичко растојание, избегнување групни собири и останување надвор.

Според него, до крајот на оваа година е можно да се очекува ефикасна вакцина, мнозинството од светската популација може да се вакцинира во текот на следната година, но не и целата популација, како што е случајот со вакцината за сипаници.

„Доволно е да се вакцинираат 75% од светската популација за да се запре ширењето на инфекцијата“, рече Фаучи.

Во Грција се потврдени уште 358 нови случаи на коронавирус, а пет лица починаа како резултат на инфекција со вирусот.

Националната организација за јавно здравје соопшти дека од крајот на февруари, кога е регистриран првиот случај на Ковид-19, вкупно се заразени 16.286 лица, од кои се верува дека речиси 3.000 биле заразени во странство, а 6.808 се поврзани со веќе познати случаи, јавува агенцијата АНА.

Вкупно 73 лица се на апарати за дишење. Од болниците се пуштени 191 пациент, кои оздравеле од вирусот. Досега починаа 357 лица како резултат на инфекција со коронавирусот, од кои 132 се жени.