Иран ќе се врати на ситуацијата пред нејзиниот нуклеарен договор со светските сили ако европските земји не ги исполнат своите обврски, изјави во понеделникот портпаролот на иранската нуклеарна агенција, Бехруз Камалванди.

Иран вели дека европските земји мора да направат повеќе за да ги гарантираат економските придобивки што Иран требаше да ги добие за возврат за ограничувањето на својата нуклеарна програма во согласност со договорот што Вашингтон го напушти минатата година.

Во исто време Франција, Велика Британија и Германија изразија загриженост дека иранскиот нуклеарен договор ќе се распадне поради тензиите во Персискиот Залив.

Во заедничка изјава тие повикаа на дијалог меѓу сите страни.

„Ризиците се големи поради што е потребно сите засегнати страни да застанат и да ги разгледаат можните последици од своите постапки“.

„Веруваме дека е време да се однесуваме одговорно и да бараме начини да се запре ескалацијата на тензиите и да се продолжи со дијалогот“.

Францускиот претседател, Емануел Макронм пристигна во дводневна посета на Белград, а го пречека српскиот претседател Александар Вучиќ.

Двајцата на аеродромот „Никола Тесла“ открија плоча по повод официјалниот почеток на работите на модернизацијата на белградскиот аеродром, која ќе ја спроведе францускиот концесионер, компанијата „Ванси ерпортс“.

Српскиот претседател, Александар Вучиќ, во пресрет на посетата на Макрон порача дека посетата претставува и потврда дека Србија и Франција се на добар пат да постигнат повисоко ниво на политичка и економска соработка, каква што заслужува нивното постојано пријателство и прокламирано стратешко партнерство.

Неидентификувани напаѓачи убија двајца здравствени работници во источниот дел на Конго за време на викендот. Ова е последниот во низата напади што ги попречуваат напорите да се спречи втората најголема епидемија на досега смртоносниот вирус ебола, објави Министерството за здравство.

Двете лица, кои работеле во северната провинција Киву, добивале закани од декември, а едно од лицата веќе било нападнато, објави Министерството.

Нападот доаѓа во време кога првиот случај на ебола беше забележан во градот Гома во Демократската Република Конго, што според Светската здравствена организација може да ја промени карактеризацијата на епидемијата во меѓународна здравствена вонредна состојба.