Свет
Осудени тинејџерите што го избодеа Келијан 27 пати во автобус во Лондон

Двајца тинејџери се осудени на најмалку 15 години затвор за бруталното убиство на 14-годишниот Келијан Бокаса, кој беше избоден дури 27 пати со мачети во автобус во Лондон. Еден од напаѓачите, денес 16-годишен, се смеел додека му се изрекувала пресудата, пренесува „Скај њуз“. Убиството се случило на 7 јануари во Вулич, југоисточен Лондон. Убиците се идентификувани како Мосавар Зази (16) и Колин Чабиква (15).
Судијата Марк Лукрафт ги осуди двајцата на доживотен затвор, со можност за условен отпуст дури по 15 години и 110 дена. Тој истакна дека камерите за надзор забележале дека напаѓачите се смееле за време на нападот. Смртта на Келијан ја нарече „бесмислена загуба на уште еден млад живот“.
Мари Бокаса, мајката на убиениот Келијан, изјави дека убијците го уништиле нејзиниот цел свет. Себеси се опиша како „скршена душа на која ѝ се смени животот засекогаш оној ден кога животот на детето ѝ го одзеде друго дете“.
„Се прашувам што се случило со тие две деца што довело до толку страшен чин на насилство. Не можам да си замислам како некој може да биде толку гневен. Тоа што го направија е ужасно, и можеби никогаш нема да дознаам што ги натера на тоа“, рече таа. „Тој момент на насилство можеби траеше неколку секунди, но последиците се вечни.“
Келијан на денот на убиството се наоѓал на горниот кат од автобусот околу 14:30 часот, кога му се приближиле обвинетите со оружје. Обвинителот Том Литл изјави дека е јасно дека нападот не бил спонтан, туку планиран, и дека обвинетите знаеле дека Келијан се наоѓа во автобусот.
„Му се приближија и речиси веднаш двајцата извадија мачети и го нападнаа,“ рече судијата на рочиштето. „Избоден е вкупно 27 пати пред да излезат од автобусот.“ Итните служби пристигнале брзо, но Келијан починал кратко по пристигнувањето на лекарите.
Обвинетите ја признаа вината за убиство и за поседување оружје. Една од мачетите била фрлена во реката Темза, но полицијата подоцна ја пронашла.
Главната инспекторка Сара Ли упати сочувство до семејството на жртвата, откако обвинетите ја признаа вината.
„Бруталниот и бесмислен напад врз Келијан остави длабоки последици врз неговите пријатели, пошироката заедница и сите што неуморно работеа на идентификување, апсење и процесуирање на виновниците. Се надевам дека семејството на Келијан ќе најде некаква утеха во оваа пресуда, но знам дека остануваат длабоко нажалени – бидејќи изгубени се три млади животи“, изјави таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан: Зеленски ќе трпи долгорочни последици

Унгарскиот премиер Виктор Орбан изјави дека украинскиот претседател Володимир Зеленски ќе ги сноси последиците за неодамнешните напади врз гасоводот „Дружба“, кој ги снабдува Унгарија и Словачка.
Во објава на Фејсбук, Орбан истакна дека „Зеленски отворено ѝ се закани на Унгарија“ и призна дека нападот врз нафтоводот бил одговор на противењето на Будимпешта на членството на Украина во Европската Унија.
„Зеленски отворено ѝ се закани на Унгарија. Тој призна дека го гранатираат нафтоводот „Дружба“ затоа што не го поддржуваме нивното членство во ЕУ. Оттука следува дека Унгарците донеле правилна одлука. Зеленски ќе има долгорочни последици за зборовите што ги изговорил“, рече Орбан.
Фото: принтскрин
Свет
Германија попушти под притисокот, ќе продолжи да прифаќа бегалци од Авганистан

Германија набргу ќе ја укине повеќемесечната суспензија за прием на ранливи авганистански државјани што вети дека ќе ги прифати, објави денес весникот „Велт“ повикувајќи се на владини извори, објави „Ројтерс“.
Речиси 2.000 Авганистанци, на кои им е одобрено преселување во Германија во рамките на програмата за луѓе во ризик под власта на талибанците, се заробени во соседен Пакистан со месеци откога Берлин ја замрзна програмата како дел од ветувањето за запирање на миграцискиот бран.
Групите за човекови права и десетици погодени Авганистанци ја оспорија суспензијата на суд, а некои добија судски пресуди, што дополнително го зголемија притисокот врз Берлин да дејствува.
Прашањето стана уште поитно бидејќи Пакистан презеде чекори за протерување на документирани авганистански бегалци, вклучително и оние што се дел од германската програма за преселување, до крајниот рок на 1 септември.
Според весникот „Велт“, семејствата на засегнатите лица веќе се информирани за продолжувањето на програмата, а првите семејства на Авганистанци се очекуваат во наредните денови.
Германската влада планира дискретно да ги преселува авганистанските бегалци со редовни комерцијални летови со застанувања во Дубаи или Истанбул пред да пристигнат во Германија, а точниот број на лица на кои моментно им е одобрено заминување сè уште не е познат, објави весникот.
Министерството за надворешни работи само потврди дека процедурите за верификација продолжуваат и дека вработени се испратени во Пакистан за да продолжат со обработката на случаите.
Свет
Турски аналитичар: САД би можеле да ја жртвуваат Украина

Соединетите Американски Држави би можеле да ја жртвуваат Украина во обид да се спротивстават на сè поцврстиот сојуз меѓу Русија и Кина, процени турскиот аналитичар Мехмет Али Бал, пренесува „Хабер“.
Тој нагласи дека територијалните отстапки од страна на Киев нема да претставуваат закана за Вашингтон, а губењето на територијата би било егзистенцијално прашање исклучиво за самата Украина.
Американскиот претседател Доналд Трамп неодамна изјави дека европските лидери покажуваат разбирање за потребата од територијални отстапки за Украина. Според медиумите, се очекува американскиот лидер да реагира остро на наводното трошење на воена помош и да го принуди украинскиот претседател Володимир Зеленски да ги прифати условите на Москва.
„САД, особено Трамп, мора да обезбедат мир во Украина за да го докажат своето глобално лидерство. Сепак, губењето на територијата за Украина не е егзистенцијална закана за САД. Дури и за Европа оваа загуба повеќе не е стратешки значајна. САД, особено Трамп, во конфликт со сојузот на Русија и Кина, може да ја жртвуваат Украина, ако не целосно, тогаш во значителна мера“, оцени Али Бал.
Според него, САД нема да претрпат сериозни загуби доколку се случи такво сценарио, а Кина ќе продолжи да се соочува со предизвиците на својата агресивна извозна политика поради регионалните и глобалните тензии.
Но, Бал заклучи дека Украина е таа што нема алтернатива во оваа ситуација бидејќи за неа тоа е прашање на егзистенција.
Фото: принтскрин