Најмалку осум лица загинаа, а девет се водат за исчезнати кога обилниот дожд го поплави градот Сант Лоренк де Кардасар и неговата околина на Мајорка, се вели во извештаите на итната служба, пренесува „Спутник“.

Повеќе од сто луѓе се евакуирани од градот, главните патишта се затворени за сообраќај, а има и прекин во снабдувањето со електрична енергија во регионот.

„Бројот на жртвите поради вчерашниот интензивен дожд се искачи на осум“, изјавија на „Твитер“ службите за итна помош.

Двајца Британци загинале во такси фатено во поплавите.

Службите за итни случаи беа распоредени во областа, при што спасувачкиот персонал се обидуваше да го процени размерот на штетата со хеликоптерски прелети, а жителите беа евакуирани од покривите и балконите. Шокантните фотографии и видеа сведочат за една од најстрашните поплави на Мајорка.