Украинскиот претседател Володимир Зеленски денес потврди дека води разговори со американскиот претседател Доналд Трамп за евентуално распоредување на американски трупи во Украина, но нагласи дека конечната одлука ќе зависи исклучиво од Вашингтон.

На прашањето дали Соединетите Американски Држави, во рамките на безбедносните гаранции, размислуваат за распоредување на своите сили во Украина, на линијата на демаркација или на границата, Зеленски изјави дека таквата одлука може да ја потврди само претседателот на Соединетите Американски Држави, објави Укринформ.

„Тоа, искрено, може да го потврди претседателот на Соединетите Американски Држави.

Станува збор за американски трупи и Америка е таа што носи такви одлуки.

Секако, за ова разговараме со претседателот Трамп и со претставници на Коалицијата на волјата“, рече Зеленски, пренесува Танјуг.

Тој додаде дека Украина би сакала да види американски трупи на нејзина територија како дел од безбедносните гаранции, оценувајќи дека тоа би претставувало силен дел од системот на безбедносни гаранции.

Мнозинството испитаници ширум светот очекуваат подобрување на општата состојба во 2026 година, меѓутоа, од 30-те земји анкетирани од Ипсос, Франција се издвојува како најпесимистичка, односно 71 процент од испитаниците ширум светот веруваат дека општата состојба ќе се подобри следната година, додека само 41 процент од француските граѓани го делат ова мислење, што е за 30 проценти под просекот.

Истражувањето, објавува Фигаро, покажува дека две третини од испитаниците ширум светот (66 проценти) веруваат дека 2025 година била лоша година за нивната земја, додека тој процент во Франција достигнува 85 проценти, што Ипсос го поврзува со силни политички турбуленции.

Сепак, овие резултати се подобри отколку во 2020 година, првата година од пандемијата на Ковид-19, кога 90 проценти од испитаниците на глобално ниво сметале дека годината била лоша за нивната земја.

Околу 59 проценти од анкетираните ширум светот очекуваат протести против начинот на кој се управува со земјата во 2026 година, додека речиси седум од десет Французи го сметаат ова сценарио за веројатно.

Загриженоста за безбедноста е поизразена и во Франција, каде што 41 процент од испитаниците веруваат дека е можен терористички напад, во споредба со 29 проценти во другите земји.

Кога станува збор за глобалната економија, 49 проценти од анкетираните очекуваат нејзин посилен раст во 2026 година, додека во Франција тој процент е значително помал и изнесува 17 проценти.

Според анкетата на Ипсос, Французите се особено загрижени за влијанието на вештачката интелигенција, бидејќи 73 проценти се плашат дека таа би можела да доведе до губење на работни места, додека само 30 проценти веруваат дека ќе создаде нови работни места.

Песимизмот, истакнува парискиот весник, е изразен и во однос на меѓународните прашања, каде што 65 проценти од Французите не очекуваат војната во Украина да заврши во 2026 година, во споредба со 49 проценти од испитаниците во други земји.

Анкетата, исто така, покажува дека 72 проценти од Французите сметаат дека е малку веројатно американскиот претседател Доналд Трамп да ја освои Нобеловата награда за мир, што е над светскиот просек од 64 проценти.

Околу 40 проценти од испитаниците во Франција велат дека сакаат помалку да ги користат социјалните мрежи, што Ипсос го толкува како растечка свест за негативните ефекти од прекумерната изложеност на социјалните мрежи врз менталното здравје, пренесува Танјуг.

Светското првенство, кое ќе се одржи во САД, Мексико и Канада во 2026 година, е планирано да го гледаат 49 проценти од Французите, додека интересот е многу поголем во Аргентина, каде што 73 проценти од граѓаните имаат намера да ги гледаат натпреварите, а 87 проценти веруваат дека нивната репрезентација може повторно да ја освои титулата.

Во анкетата учествуваа 23.700 возрасни лица од 30 земји, кои ја оценија годината на крајот и ги изразија своите очекувања за 2026 година.

Погрешната политика на сегашното раководство на Европската Унија ја доведе Европа во длабока криза и создаде реална закана од избувнување војна на континентот, оцени унгарскиот министер за надворешни работи Петер Сијарто, нагласувајќи дека унгарската влада останува цврсто посветена на зачувување на својата независна и суверена позиција во рамките на ЕУ.

Сијарто, во објава на социјалните мрежи, истакна дека Брисел со години дава, како што наведе, погрешни одговори на клучните прашања што ја одредуваат иднината на Европа.

„Војна, миграција и енергетска безбедност – без да навлегувам во детали, Брисел редовно прави грешки во одговорите на овие прашања, со што го поткопува просперитетот на европските нации и, во суштина, ја загрозува иднината на целиот континент“, рече шефот на унгарската дипломатија.

Според него, последиците од таквата политика се веќе видливи: европските земји, тврди тој, сè повеќе се лизгаат кон војна, западните градови се преплавени со мигранти, додека сметките за енергија низ целиот континент продолжуваат да растат.

Министерот потсети дека Унгарија јасно ги дефинирала своите приоритети – да се држи подалеку од војна, да не прифаќа мигранти и да не се откажува од руските енергетски извори, за, како што изјави, граѓаните да имаат најниски трошоци за комунални услуги во Европа.

„Имаме национална влада и се потпираме на здравиот разум и реалноста, грижејќи се за едно нешто – интересите на унгарскиот народ“, рече Сијарто.

Тој оцени дека неуспешните политики на Брисел, кои ја доведоа Европа во криза, се сè поочигледни и дека, како што рече, на континентот започна „патриотска револуција“, кон која се приклучуваат сè поголем број земји.

Во овој контекст, Сијарто нагласи дека парламентарните избори во Унгарија, планирани за април 2026 година, ќе имаат одлучувачко значење, бидејќи, според него, тие ќе одлучуваат за прашањето за војна и мир. Тој предупреди дека доаѓањето на власт на опозицијата би значело прифаќање на политиката на Брисел, која, тврди тој, би ја загрозила безбедноста не само на Унгарија, туку и на цела Европа.

„Ова би значело испраќање пари, оружје и војници во Украина, прифаќање мигранти и исклучување на Унгарија од руските енергетски резерви“, рече Сијарто.