Унгарскиот премиер Виктор Орбан го критикуваше претседателот на Украина, Володимир Зеленски, за неговиот говор во Давос, во кој, како што велат од Будимпешта, тој „повторно ја нападна унгарската влада и него лично“.

Сепак, како што истакна Орбан во својата објава на мрежата Икс, Зеленски го критикуваше и „секој друг европски лидер“. „Зеленски вели дека поддршката испратена до Украина е недоволна, оружјето е недоволно и дека решителноста на Европа е недоволна. Не мораше долго да чекаме на одговорот од Брисел. Синоќа претседателката на Европската комисија, Урсула фон дер Лајен, презентираше патоказ за развој на Украина. Во него, Брисел го прифати секое украинско барање – 800 милијарди долари за Украина, забрзан пристап во ЕУ до 2027 година и понатамошна поддршка до 2040 година“, рече Орбан.

Тој рече дека Зеленски „сè погрешил“, но дека Брисел е „подготвен да плати“.

„И ќе кажеме неколку зборови за тоа. Доаѓа национална петиција, со која можеме да испратиме јасна порака до Брисел: нема да плаќаме“, заклучи Орбан, пренесува Танјуг.

Во своето вчерашно обраќање на Светскиот економски форум во Давос, Зеленски, меѓу другото, ги илустрираше своите ставови споредувајќи го со филмот „Денот на мрмотот“, велејќи дека Европа, како херојот од филмот, „ги повторува истите зборови“ без промена во дејствувањето, и покрај изминатата година и повторените апели дека „Европа знае како да се брани“.

Руските сили вчера извршија напади со беспилотни летала и ракети врз два града во југоисточна Украина, при што загина едно лице, а повеќе од дваесет беа повредени, објавија денес локалните власти.

Гувернерот на Запорошката област во објава на Телеграм кажа дека руските сили извршиле четири напади врз градот Комишуваха, при што загина едно лице, а други 10 беа повредени. Во нападот беа оштетени неколку семејни куќи.

Во комбиниран руски напад со беспилотни летала и ракети беа повредени 13 лица, вклучувајќи четири деца, во индустрискиот град Кривји Рог, родното место на претседателот Володимир Зеленски во регионот Дњепропетровск, напиша шефот на воената администрација на градот, Олександр Вилкул, во објава на Телеграм.

Нападите погодија станбени згради, училишта и стратешка инфраструктура.

„Главната работа е што сите преживеаа“, напиша Вилкул, додавајќи дека шест лица, вклучувајќи ги и повредените деца, се хоспитализирани.

„Ројтерс“ не можеше независно да потврди дека се случиле нападите, а руските претставници не коментираа за ситуацијата.

фото/украинска војска

Делови од Тексас, Оклахома и северните држави на САД се соочуваат со екстремно студен бран, а метеоролозите предупредуваат дека температурите можат да паднат до минус 46 степени Целзиусови во некои делови од Минесота и Северна Дакота.

Студениот воздух од Канада е придружен со масивна, повеќедневна зимска бура која се заканува со обилни снежни врнежи, замрзнат дожд и потенцијално катастрофални штети на инфраструктурните објекти, објави АП.

Во Тексас и Оклахома, подготовките се во тек – комуналните услуги во Хјустон ангажираа 3.300 работници за итни случаи, додека Министерството за транспорт на Оклахома посипа сол на автопатите и меѓудржавните патишта. Замрзнат дожд и лапавица веќе се регистрирани во Ново Мексико, додека метеоролозите предвидуваат до 30 сантиметри снег по патеката на бурата од Оклахома до Вашингтон, Њујорк и Бостон, пренесува Танјуг.

Се очекува ледениот бран и снегот да ги оптоварат далноводите и гранките на дрвјата, што може да предизвика прекини на електричната енергија што ќе траат неколку дена, а метеоролозите предупредуваат дека патиштата и тротоарите се потенцијално опасни дури и следната недела.

Во области како Чикаго и Де Мојн, училиштата ги откажаа часовите додека жителите обезбедија основни залихи – леб, млеко, генератори и греалки. Гувернерот на Тексас, Грег Абот, рече дека електроенергетскиот систем „никогаш не бил посилен“, алудирајќи на претходните големи прекини на електричната енергија, додека гувернерите на Џорџија и Мисисипи прогласија вонредна состојба.

Авиокомпаниите откажаа стотици летови закажани за денес и утре, вклучувајќи ги и аеродромите во Далас, Атланта, Оклахома Сити и Талса.

Метеоролозите предупредуваат дека местата со најлошо време можат да се дефинираат само кога ќе пристигне бурата, а граѓаните се повикуваат да бидат внимателни и да останат дома доколку е можно.