Унгарскиот премиер Виктор Орбан изјави дека во Украина е разоткриена воена мафија која на илјада начини е поврзана со претседателот Зеленски. Тој потсети дека министерката за енергетика поднесе оставка, а главниот осомничен побегнал од земјата.

„Ова е хаосот во кој бриселската елита сака да фрли пари од европските даночни обврзници. Парите што нема да завршат на фронтот ќе ги украде воената мафија. Лудило“, напиша Орбан на Фејсбук. Додаде дека Унгарија нема да испраќа пари во Украина и дека тие подобро ќе се употребат дома.

Орбан рече дека Унгарија нема да прифаќа барања и уцени од украинскиот претседател.

Корупцискиот скандал во Украина опфаќа седуммина осомничени за шема од 100 милиони долари во енергетскиот сектор. На барање на Зеленски, оставки поднесоа министрите за правда Херман Галушченко и за енергетика Свитлана Гринчук. Истражителите ги претресоа домовите на Галушченко и на Тимур Миндич, ко-сопственик на „Квартал 95“ и поранешен деловен партнер на Зеленски, кој ја напуштил Украина непосредно пред избивањето на скандалот.

Обвинителството во Милано повторно ја активира истрагата за т.н. викенд-снајперисти – странци кои за време на опсадата на Сараево биле платени да пукаат врз цивили. Како дел од постапката, италијанските обвинители побараа увид во сведочењето на американскиот пожарникар Џон Џордан од 2007 година дадено пред Хашкиот трибунал.

Џордан тогаш изјавил дека видел вооружени мажи што не личеле на локални жители и дека биле придружувани од водичи. Тој опишал дека носеле комбинација од цивилна и воена опрема и пушки што личеле на ловечко оружје. Според него, снајперистите често ги таргетирале најмладите во семејствата – деца што оделе со возрасни или девојчиња.

Италијанското Обвинителство, предводено од обвинителот Алесандро Гобис, ја проширува истрагата и врз можни италијански државјани што учествувале во вакви злосторства. Во постапката се вклучени и документи од поранешната италијанска разузнавачка служба СИСМИ, која, според сведочења, имала сознанија за присуство на странски платеници во Босна и Херцеговина.

Истрагата се води за евентуално намерно убиство извршено со суровост и злобни мотиви, како и за идентификување на организаторите на викенд-турите и лицата што плаќале за учество.

Опсадата на Сараево траеше од април 1992 до февруари 1996 година, при што градот беше секојдневно изложен на гранатирање и снајперски напади.

Рускиот министер за надворешни работи Сергеј Лавров во интервју објавено доцна во средата изјави дека се надева оти Вашингтон нема да преземе акции што би го ескалирале конфликтот во Украина, објави „Ројтерс“.

Лавров рече дека американскиот претседател Доналд Трамп, кој долго време се залага за дијалог со Русија, се обидува целосно да ја разбере позицијата на Русија во врска со Украина и покажува посветеност на наоѓање трајно мирно решение.

„Сметаме на здравиот разум и на преовладувањето на оваа позиција во Вашингтон и на тоа тие да се воздржат од дејства што би можеле да го ескалираат конфликтот на ново ниво“, изјави Лавров, цитиран од руската државна новинска агенција ТАСС.

Неговите коментари првично биле дел од интервју за италијанскиот весник „Кориере дела сера“. ТАСС објави дека весникот одбил да го објави интервјуто.

Лавров тврди дека Трамп признал оти една од причините за руските постапки е проширувањето на НАТО и распоредувањето на инфраструктурата на пактот во близина на руските граници.

„Всушност, ова е она за што рускиот претседател Владимир Путин и Русија предупредуваат во последните 20 години“, рече рускиот врвен дипломат. И инсистира дека Европа работи против американските чекори кон наоѓање мирно решение.