Свет
По 20 месеци ограничување САД ги отвора границите за вакцинираните патници
Соединетите Држави се подготвуваат повторно да ги отворат своите копнени и воздушни граници за странските посетители вакцинирани против Ковид-19 во понеделник, ставајќи крај на 20-месечните ограничувања кои беа особено лошо прифатени во Европа, Мексико и Канада.
Разделените семејства, нарушените деловни односи, оневозможените професионални амбиции, „забраната за патување“ воведена од Доналд Трамп на почетокот на 2020 година, а потоа потврдена од неговиот наследник Џо Бајден, наиде на остри критики и стана симбол на конфузијата предизвикана од пандемијата.
За да се заштити од земјите најпогодени од Ковид-19, Трамп наметна ограничувања за пристигнувања од Кина во февруари 2020 година. Потоа на 13 март, на ред дојдоа европските шенген-земји, а подоцна и Британија и Ирска, додека копнените граници со Мексико и Канада беа затворени поголемиот дел од времето.
Соединетите држави имаат значителна трговија со сите овие земји.
„Беше многу тешко, само сакам да го видам мојот син“, рече Британката Алисон Хенри (63), која во понеделник по 20 месеци ќе отпатува да го посети својот син во Њујорк.
Во многу семејства од двете страни на Атлантикот владее возбуда пред семејните собири. Беше можно да се патува од САД до Европа минатото лето, но странците кои живеат во САД и оние со визи немаа гаранција дека ќе можат да се вратат.
Авиокомпаниите го зголемија бројот на трансатлантските летови и ќе користат поголеми авиони бидејќи укинувањето на ограничувањата носи елан во секторот што пандемијата го фрли на колена.
Дожд границата со Мексико, голем број американски градови од Тексас до Калифорнија претрпеа економски последици поради овие ограничувања и со нетрпение чекаат да се вратат во нормала.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Берлин под притисок: се бара дијалог меѓу Мерц и Путин
Германскиот канцелар Фридрих Мерц треба директно да разговара со рускиот претседател Владимир Путин, изјави Адис Ахметовиќ, експерт за надворешна политика на фракцијата на Социјалдемократската партија на Германија во Бундестагот, во интервју за „Зидојче Цајтунг“.
Ахметовиќ оцени дека фактот што Берлин ги препушта преговорите на двајца американски претприемачи за недвижности – Стив Виткоф и Џаред Кушнер – предизвикува значителна недоверба. Тој го изјави ова коментирајќи го трилатералниот состанок одржан во Абу Даби.
Според него, шефот на германската влада мора да покаже храброст и да преземе поактивна улога во процесот на решавање на конфликтот.
Пред состанокот, портпаролот на Кремљ, Дмитриј Песков, изјави дека Москва позитивно ги оценила преговорите на делегациите на Русија, Соединетите Американски Држави и Украина во Абу Даби.
Свет
Данската премиерка: Светскиот поредок каков што го знаеме е завршен
Данската премиерка Мете Фредериксен предупреди дека ерата на сегашниот светски поредок е завршена, велејќи дека не верува дека некогаш ќе се врати. Таа ја даде изјавата на јавен форум во Париз, каде што учествуваше со премиерот на Гренланд, Јенс-Фредерик Нилсен, пишува „Гардијан“.
Обраќајќи се пред студентите, Фредериксен нагласи: „Светскиот поредок каков што го знаеме е завршен и не мислам дека ќе се врати“. Таа, исто така, предупреди дека „Русија не сака мир со Европа“ и ги повика Европа и САД да „се држат заедно“.
Осврнувајќи се на неодамнешните тензии со САД околу Гренланд, данската премиерка рече дека двете страни делат загриженост за безбедноста на Арктикот и дека ќе „се обидат да најдат заеднички пат со САД“.
Премиерот на Гренланд, Нилсен, исто така, зборуваше за последиците од тензиите со САД врз локалното население.
„Како влада, се соочуваме со задачата да се спротивставиме на надворешните притисоци и да се грижиме за нашите луѓе кои се исплашени и преплашени“, рече тој.
Европа
Холандија доби ретка малцинска влада и најмлад премиер во историјата
Лидерите на политичките партии во Холандија се согласија да формираат ретка малцинска влада, беше објавено во вторник.
Центристичката проевропска партија Д66, која победи на изборите во октомври минатата година, ќе ги здружи силите со конзервативните христијански демократи и десничарската VVD во коалиција која ќе има само 66 места во долниот дом на парламентот со 150 места.
Коалицијата, исто така, нема мнозинство во Сенатот, горниот дом на парламентот, што може да блокира закони донесени во долниот дом, и ќе треба да побара поддршка од опозициските партии за да ги спроведе своите политики.
Владата ќе ја предводи лидерот на Д66, Роб Јетен, 38, кој ќе стане најмладиот премиер во холандската историја.
Се очекува пратениците на партиите да го ратификуваат договорот за коалиција во наредните денови, а формалната презентација се очекува во петок.
Останатите позиции во кабинетот ќе бидат пополнети во наредните недели, а се очекува новата влада официјално да биде именувана во рок од еден месец.

