Свет
Првата британска градоначалничка со хиџаб се повлече од Лабуристичката партија поради исламофобија
Првата жена со хиџаб во Велика Британија избрана за градоначалник се повлече од левичарската Лабуристичка партија обвинувајќи дека во редовите на партијата има вградени исламофобични и расистички елементи, пренесува „Гардијан“.
Рахија Исмаил, бегалка родена во Сомалија, која дошла во Обединетото Кралство во 80-тите години на минатиот век, се повлече од својата улога на градоначалник на лондонскиот округ Ајлингтон минатиот месец. Поранешната градоначалничка сега објави дека целосно ја напушта Лабуристичката партија велејќи дека доживеала исламофобија и дека се чувствува маргинализирана како обоена жена од своите машки колеги.
„Длабоко сум тажна што партијата за која мислев дека е за правда и правичност и за мнозинството е сосем спротивно на тоа, од моето лично искуство. Затоа, тешко ми е да го застапувам Холовеј Вард како советник на лабуристите бидејќи се борев со партиски систем што едноставно им овозможува на белите луѓе да имаат што сакаат и кога сакаат “, изјави Исмаил.
Во еден пример на забележан расизам поранешната градоначалничка на Ајлингтон рече дека добила покана за првата национална конференција на жените лабуристи во февруари 2019 година, во која стоел зборот „Сомалија“ под нејзиното обраќање.
„Каква врска има моето родно место со оваа покана? Бев шокирана“, рече таа.
Таа исто така ја цитира одлуката на Лабуристичката партија да не одржи настан со кој се слави исламскиот празник Еид во 2019 година како пример за исламофобија во партијата. Локалниот совет на Ајлингтон тврди дека закажаниот настан бил откажан поради неможноста да се добие осигурување од јавна одговорност и поради други проблеми во организацијата.
Исмаил тврди дека колега од Лабуристичката партија ја прозвал затоа што зборувала пред медиумите за нападите со нож во нејзината област и дека на групниот состанок ѝ било речено да молчи за овој проблем за да не го наруши угледот на советот.
Како одговор на обвинувањата, портпаролот на Лабуристичката партија рече: „Одлуката на Исмаил да поднесе оставка е разочарувачка, особено што се случи набргу по нејзиното назначување за градоначалник на Ајлингтон откако восхитувачки ѝ служеше на околијата во неверојатно предизвикувачко време“.
„Лабуристите во Ајлингтон имаат разнолика и талентирана група советници, кои ѝ служат на својата заедница. Лабуристичката партија ги прифаќа исклучително сериозно сите наводи за дискриминација, кои се целосно испитани во согласност со нашите правила и процедури“.
Освен обвинувањата за исламофобија, Лабуристичката партија долго време беше опфатена со скандали во врска со антисемитизмот, особено за време на мандатот на поранешниот лидер на лабуристите, Џереми Корбин.
Во јули партијата се согласи да исплати значителна отштета на седум дојавувачи за клевета за време на борбата против антисемитизмот. Обелоденет интерен извештај во април покажа дека лабуристите во своите редови имаат мал број членови што имаат ставови што се несомнено непријателски кон еврејскиот народ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Пожар зафати над 1.000 хектари шума во Нов Зеланд
Пожарникарите во Нов Зеланд повторно ја започнаа борбата со неконтролиран шумски пожар што зафати повеќе од 1.000 хектари во националниот парк „Тонгариро“ на Северниот остров, соопшти утринава противпожарната и спасувачка служба.
Пожарот започнал вчера попладне во популарната туристичка област „Тонгариро“, а околу 40 туристи биле евакуирани по воздушен пат. Акциите биле привремено прекинати преку ноќ поради безбедносни причини.
Заменик-командантот на противпожарната служба Ник Вест изјави дека пожарот се проширил во текот на ноќта, но засега нема информации за оштетени објекти или дополнителни евакуации.
Вест најави дека денеска преку воздушно извидување ќе се потврдат размерите на пожарот, а според првичните проценки, неговото ставање под контрола би можело да потрае уште најмалку еден ден.
Во акцијата се вклучени шест противпожарни возила и пет цистерни за вода, поддржани од шест хеликоптери и два авиони, соопшти службата.
Свет
Бајден со порака до Трамп: Ги посрами САД и ги издигна интересите на богатите над оние на обичните Американци
Поранешниот претседател на САД, Џо Бајден, упати остри критики кон актуелниот шеф на државата, Доналд Трамп, посочувајќи дека тој го уништува не само Источното крило на Белата куќа, туку и целата земја, јави ДПА.
– Знаев дека Трамп ќе преземе деструктивни дејствија против земјата, но морам да признаам дека немав претстава дека ќе стане вистински уништувач, рече Бајден на гала-вечера на Демократската партија во градот Омаха, Небраска.
Поранешниот претседател демократ, кој сега има 82 години, ова го кажа во врска со проектот на Трамп на местото на Источното крило на Белата куќа да се изгради сала за балови. Трамп претходно изјави дека неговите планови за таква сала „нема да влијаат на зградата во нејзиниот сегашен изглед“.
– Ова е совршен симбол на неговото претседателствување, посочи Бајден.
– Трамп презеде деструктивни дејствија не само против домот на народот, туку и против Уставот, владеењето на правото и самата наша демократија, додаде поранешниот претседател.
Бајден директно му се обрати на Трамп во својот говор, изјавувајќи дека со своето однесување актуелниот шеф на државата ги посрамил САД и ги издигнал интересите на богатите над оние на обичните Американци.
Свет
Се бараат оставки поради трагедијата во Домот за пензионери
Голем број граѓани на Тузла денеска излегоа на улиците на градот и одржаа протест, изразувајќи го своето незадоволство поради трагедиите и скандалите што го погодија Тузланскиот кантон.
Пожарот што избувна во вторникот во Домот за пензионери во Тузла однесе 13 животи, а 12 пациенти сè уште се наоѓаат во болница. Како што беше утврдено, жртвите починале од труење со јаглерод моноксид.
Една седмица претходно, Тузланскиот кантон го потресе случајот со подведување малолетнички, за што се осомничени полициски службеник и еден професор. Нивното подведување траело неколку месеци во текот на минатата и оваа година.
Присутните граѓани од Тузла, но и оние кои допатуваа од други градови на Босна и Херцеговина, денеска побараа оставки од надлежните.

