Земјите членки на ЕУ се согласија за зајакнување на употребата на брзи антиген-тестови и за меѓусебно признавање на резултатите од тестот на Ковид-19, објави Советот на ЕУ.

Советот наведува дека употребата на брзи тестови и меѓусебно препознавање на резултатите од тестовите за Ковид-19 низ ЕУ се од суштинско значење за ублажување на ширењето на вирусот, како и за придонес кон непречено функционирање на внатрешниот пазар и олеснување на прекуграничното движење и лекување.

„Клучните компоненти на оваа препорака вклучуваат валидација и меѓусебно признавање на брзи антиген-тестови и RT-PCR тестови меѓу земјите членки, размена на стандардизиран сет на податоци, изработка на заеднички список на брзи тестови за Ковид-19 и одредување приоритет за употреба на таквите тестови, се наведува во соопштението на Советот на ЕУ.

Препораката исто така вклучува одредби кои се однесуваат на предизвиците на „еволутивната пандемија“, односно дека заедничката листа на соодветни брзи тестови за Ковид-19 треба да биде доволно флексибилна за да се додадат или отстранат оние тестови врз чија ефикасност влијаат мутациите на вирусот.

Европската Унија со посебен механизам ќе обезбеди вакцини за коронавирус за Западен Балкан „што е можно поскоро“, рече претседателката на Европската комисија, Урсула фон дер Лајен. Таа објасни дека се покажало оти постапката за доставување вакцини на сиромашните и земјите надвор од Унијата преку меѓународниот механизам Ковакс е комплицирана и затоа е одлучено со посебен механизам на ЕУ да се обезбедат вакцини на Западен Балкан, кои ќе ги дадат членките на ЕУ.

Лидерите на ЕУ исто така одлучија дека брзото ширење на опасната нова варијанта на вирусот „силно ги обесхрабрува патувањата кои не се итни“ во рамките на Унијата, но исто така го зачувува единствениот пазар на ЕУ и „Шенген зоната“.Урсула фон дер Лајен и претседателот на Европскиот совет, Шарл Мишел, посочија дека расте загриженоста во ЕУ за ширење на нова варијанта на коронавирусот и истакнаа дека ќе бидат преземени сите мерки за забрзување на масовната вакцинација на населението во ЕУ. Тие истакнаа дека целта е да се вакцинираат најмалку 70% од населението во ЕУ до летото.

Унгарскиот премиер Виктор Орбан изјави дека не може да ги укине мерките воведени за спречување на коронавирусот сè додека не се изврши масовна вакцинација на луѓето.

Тој за унгарското државно радио рече дека најдобриот пристап е да се одобри употребата на неколку различни вакцини против коронавирусот, со цел да се поттикне побрзо производство и испорака на вакцини, пренесува „Ројтерс“.

„Не ни требаат објаснувања, туку вакцини“, рече Орбан и додаде дека се надева дека министерот за надворешни работи на Унгарија Петер Сијарто, кој денес е во Москва за да преговара за вакцините, ќе обезбеди договор за набавка на руската вакцина „спутник В“.

Според него, кога здравствените работници, старите лица и оние кои работат во првите редови ќе ја примат вакцината, може да започнат разговори за олеснување на мерките.

Унгарската агенција за лекови ја одобри употребата на британската „Астра зенека“ и руската вакцина „спутник В“. Унгарија на тој начин стана првата земја на ЕУ што ја одобри руската вакцина, за која европскиот регулатор сè уште нема дадено зелено светло.