Свет
Радикалните десничари со закани пред инаугурацијата на новиот претседател: „Трамп или војна“

Предупредувачки знаци биле видливи со недели, денови и часови пред приврзаниците на Трамп да влезат во Конгресот. Десничарските групи на социјалните мрежи повикувале на граѓанска војна, атентати врз политичари и напади врз полицијата, а екстремистите сега сè повеќе повикуваат на насилство пред инаугурацијата на Џо Бајден, пишува Си-ен-ен.
„Трамп или војна. Толку е едноставно“, „Ако не знаете како да пукате – мора да научите. Веднаш“, „Ќе упаднеме во владините згради, ќе убиваме полицајци, ќе убиваме чувари, вработени и агенти и ќе бараме пребројување на гласовите“ – ова се само неколку откриени објави кои повикуваат на насилство.
Приврзаниците на претседателот Трамп упаднаа во зградата на Конгресот во средата и ја прекинаа седницата за да спречат потврда на победата на поранешниот американски потпретседател Бајден на претседателските избори. Во немирите загинаа пет лица, вклучително и еден полицаец, а експертите предупредуваат дека повиците за насилство само се засилуваат пред инаугурацијата на Бајден, закажана за 20 јануари.
„Забележуваме преписки од поборниците за надмоќ на белата раса, десничарски екстремисти, сите се чувствуваат охрабрени од моментот“, вели Џонатан Гринблат, извршен директор на Лигата против клевета (АДЛ).
„Очекуваме насилството да се влоши пред да стане подобро“, предупредува тој.
Во средата Трамп прво ги повика приврзаниците да тргнат на Капитол, а по упадот во Конгресот ги замоли да останат смирени и да си одат дома, но ги повтори обвинувањата за наводна кражба на претседателските избори. Републиканските лидери, вклучително и потпретседателот Мајк Пенс и лидерот на мнозинството во Сенатот, Мич Меконел, остро ги осудија немирите, но се чини дека тоа немаше влијание врз радикалната десница.
„Трамп ќе положи заклетва за втор мандат на 20 јануари“, напишал на интеренет еден негов симпатизер, само ден откако толпата упадна во Капитол.
„Не смееме да им дозволиме на комунистите да победат. Дури и ако треба да го запалиме Вашингтон до темел“, додадва тој во објавата.
Џон Скот-Рајлтон, истражувач во „Ситизен лаб“, група од Универзитетот во Торонто, која ја надгледува кибер-безбедноста, вели дека е страшно загрижен за денот на инаугурацијата.
„Иако пошироката јавност беше згрозена од она што се случи во Конгресот, во одредени преписки меѓу десничарите, она што се случи се смета за успех“, изјавил тој за Си-ен-ен.
Тајната служба соопшти дека планот за инаугурацијата на Бајден е подготвуван веќе подолго време.
„Инаугурацијата на претседателот на Соединетите држави е основен елемент на нашата демократија. Безбедноста на сите оние кои учествуваат во претседателската инаугурација е од најголема важност“, порачаа од таму.
Сепак дел од американските медиуми предупредуваат дека во деновите и седмиците пред нападот на Конгресот, како и сега, имало многу знаци за протести кои може да се претворат во немири.
„Адвенс демокраси“, непартиско тело за надзор, тогаш предупреди на бројни објави на социјалните мрежи кои поттикнуваат на насилство.
На пример, шест дена пред немирите, имало 1.480 објави на профили кои се однесуваат на теоријата на заговор „QAnon“, поврзани со настанот и содржеле насилна реторика. Во извештајот се наведува дека на „Парлер“, мрежа слична на „Твитер“, можеле да се прочитаат повеќе објави со изјави како „војната започнува денес“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин денеска изјави дека преговорите со САД во Алјаска биле „многу искрени и содржајни“

Рускиот претседател Владимир Путин денеска изјави дека преговорите со САД во Алјаска биле „многу искрени и содржајни“ и ги приближиле двете страни до донесување на неопходните одлуки.
– Разговорот беше многу отворен и по мое мислење нѐ доближува до потребните решенија, рече Путин на состанок во Кремљ посветен на резултатите од преговорите во Анкориџ.
Тој додаде дека долго време не биле водени преговори од ваков вид на толку високо ниво и дека имал можност „смирено и детално“ да ја изложи руската позиција. Според него, се дискутирало за сите аспекти на билатералната соработка, но главниот акцент бил ставен на можностите за праведно решавање на украинската криза.
На состанокот во Кремљ присуствуваа премиерот Михаил Мишустин, претседателот на Државната дума Вјачеслав Володин, раководителот на претседателската администрација Антон Вајно, како и секретарот и заменик-претседателот на Советот за безбедност Дмитриј Медведев и Сергеј Шојгу. Присуствуваа и вицепремиери, министри, како и гувернерката на Централната банка, претставници на ФСБ, Генералштабот и Рускиот фонд за директни инвестиции.
Путин најави дека детално ќе ги информира учесниците за разговорите со американскиот претседател Доналд Трамп. Состанокот во Кремљ продолжи зад затворени врати.
Регион
Црна Гора се бори со пожари

Седми ден по ред пожарите во Црна Гора не стивнуваат, а најкритично е во Подгорица, каде што и покрај тоа што ситуацијата е под контрола.
Началникот на Дирекцијата за цивилна заштита и намалување на ризици од катастрофи, Љубан Тмушиќ, соопшти дека најзагрозени области се Пипери и Кучки Корита. – Во овие подрачја се ангажирани сите расположливи ресурси – 12 возила и 42 пожарникари, рече Тмушиќ.
Посебна закана претставуваат и таканаречените „подземни пожари“ кои се активираат со пораст на температурите.
Во гаснењето се вклучени и армијата, како и помош од странство – Србија испрати хеликоптер, а вчера пристигна и швајцарски тим со 26 пожарникари и четири специјализирани возила. Поддршка дава и хеликоптер од Чешка.
Свет
(Видео) Четворица маскирани напаѓачи ограбија златарница во западниот дел на Сиетл

Четворица маскирани напаѓачи ограбија златарница во западниот дел на Сиетл и за помалку од две минути украдоа накит и луксузни предмети во вредност од околу два милиона долари, соопшти полицијата.
Настанот се случил во четвртокот попладне, а надзорните камери снимија како осомничените со чекани ги разбиваат заклучените стаклени врати и за 90 секунди празнат шест витрини. Меѓу украдените предмети се наоѓаат и „Ролекс“ часовници со проценета вредност од 750.000 долари и смарагдна огрлица вредна 125.000 долари, објави Еј-Би-Си њуз.
За време на грабежот, еден од напаѓачите им се заканувал на вработените со спреј против мечки и електрошокер, но никој не бил повреден.
„Длабоко сме потресени како вработени. Продавницата ќе биде затворена извесно време“, изјави потпретседателот на семејната златарница Џош Минаше.
Полицијата пристигнала веднаш по дојавата, но сторителите веќе избегале со возило и засега се недостапни за законот.