Кина воведе санкции за 11 државјани на САД, како одговор на воведените сакции врз 11 официјални претставници од Хонгконг и Кина кои се обвинети дека ги ограничуваат политичките слободи во поранешната британска колонија Хонгконг.

Меѓу оние на кого се однесуваат санкциите се и сенаторите Тед Круз, Марко Рубио, Том Котон, Пет Томеј, како и претставникот Крис Смит.

„Како одговор на лошото однесување на Америка, Кина одлучи да наметне санкции врз поединци кои се однесуваа лошо во врска со Хонгконг“, рече портпаролот на кинеското Министерство за надворешни работи Жао Лијиан.

На бродот кој на 25 јули заринка во корален гребен во Индискиот океан кај Маурициус се појавиле пукнатини, кои претставуваат опасност дека може да се преполови. Премиерот на Маурициус, Кумар Југнаут, информираше дека бродот би можел да се преполови по појавата на пукнатините.

Јапонскиот брод „Вакашио“ кој заринка на корален гребен е долг 299,5 метри и широк 50 метри и има 20 членови на екипажот. Плови под знамето на Панама, а е во сопственост на компанијата „Окијо Марин“, подружница на „Нагашики шипинг“. За бродот се верува дека носел околу 4.000 тони гориво. Се стравува дека досега протекле најмалку 1.000 тони нафта во водите околу Маурициус.

Од него се излева нафта која предизвикува еколошка катастрофа, бидејќи ги загрозува коралите, рибите и другиот морски живот во Индискиот океан, а активистите на Гринпис соопштија дека најверојатно тоа ќе биде најлошата еколошка криза во историјата на Маурициус.

Претседателот на Движењето Самоопределување, Албин Курти, испрати писмо до амбасадорите во Косово во кое бара помош по повод епидемијата на Ковид-19. Потсетувајќи дека неколку пати ги искажал своите ставови за пандемијата пред членовите на дипломатските мисии, Курти предупреди дека Косово се соочува со хуманитарна катастрофа, пренесува „Косово онлајн“.

„Во име на граѓаните на Косово, јавно ве повикувам вас и вашата земја да ги обезбедите здравствените установи во Косово со потребната медицинска опрема и со човечки ресурси за да се овозможи превенција на здравствената криза да не се претвори во хуманитарна катастрофа“, напиша Курти на Фејсбук.