Рускиот претседател Владимир Путин донесе одлука на 24 јуни да се одржи воена парада, која традиционално се одржува во Москва на 9 мај за Денот на победата.

Годинашната парада беше одложена поради епидемијата на коронавирусот.

Сепак, на 7 мај, десетици авиони и хеликоптери го покрија небото над Москва, како дел од подготовките за воздушната парада по повод 75-годишнината од победата во Втората светска војна. Во тој момент, никој не знаеше кога ќе се одржи парадата.

Денес, претседателот на Русија пресече и нареди парадата да се одржи на 24 јуни.

Во изминатите 24 часа во Хрватска и Словенија не се потврдени нови случаи на коронавирус.

Во Хрватска втор ден по ред нема нови случаи. Од вкупно 2.244 потврдени случаи, оздравеле 2.046 лица, а 101 лице починало. Во Хрватска активни се 97 случаи.

Досега се тестирани вкупно 63.682 лица, а во последните 24 часа 1.260 лица.

И во Словенија во последните 24 часа не е регистриран ниту еден нов случај на коронавирус на 754 тестирани, а само девет лица со Ковид-19 сè уште се наоѓаат во болница, објави словенечката влада.

Вкупниот број потврдени случаи од почетокот на епидемијата е 1.469. Во последните 24 часа починал еден пациент, со што бројот на смртни случаи достигна 108.

Православен свештеник од грчкиот остров Крит бил повикан да одговара пред црковните власти затоа што барал причестувањето на верниците да се изврши со повеќе лажички, а не само со една.

На веб-страницата на атинскиот весник „Ефимерида тон синтактон“ (ЕФСИН), беше пренесена неговата изјава дека според тоа верува дека „нешто тргнало наопаку во нашата Црква“, пренесува „Мондо“.

„Јас ќе се бранам како што знам и нема да одговорам со лажна понизност“, рече свештеникот Хараламбос Копанакис од Крит.

Тој беше повикан на постапка пред црковните власти затоа што, за да ги заштити верниците среде пандемијата, рекол дека е опасно да се даде причест на сите со иста лажичка и дека тоа треба да се промени во сите цркви во Грција.

Во последните неколку дена, 44-годишниот свештеник беше цел на напади на екстремни црковни кругови кои „ја бараат неговата глава“ – да биде заменет од митрополитот Макариос, под чија надлежност е тој.

Во подолг текст објавен на социјалните мрежи на 19 мај, свештеникот од Крит, меѓу другото, напиша: „Во времето кога беше воведена употребата на истата лажичка за сите, последното нешто што луѓето би можеле да претпостават е можноста за пренесување на болест“.

Треба да се има предвид, продолжи Копанакис, дека до пред еден век не бевме свесни за придобивките од миењето на рацете како основно средство за здравствена заштита.

Затоа, заклучи тој, одлуката на црквата да се користи иста лажичка за причестување на сите верници, не е донесена врз основа на здравствени критериуми, туку исклучиво од практични причини.