Свет
Русите тврдат дека Украинците имаат нова тактика: „Слушаме мјаукање, но нè чека смрт“

Руските војници тврдат дека украинската страна користи звучни снимки од мачки за да ги измами да отворат минирани ормани и фиоки. Ова необично тврдење, кое не можеше да се потврди, го изнесе руски војник за време на интервју за ТВ „Звезда“, која е во сопственост на руското Министерство за одбрана.
„Влегуваме во соба и слушаме мјаукање, да речеме, во плакарот. Кога ќе отворите од жал за мачката, одеднаш сè ќе експлодира“, рече Леонид Отделнов, командант на единицата за деминирање. Отделнов тврди дека ова се случило кога неговите војници влегле во згради во регионот Донецк во источна Украина. Тој не откри дали некој руски војници загинал во експлозијата на такви нагазни мини. Киев не ги коментира овие тврдења.
Руските провоени активисти минатата година изјавија дека војниците почнале да носат мачки во рововите на првата линија за да се справат со наездата од стаорци и други глодачи. Говорејќи на националната телевизија, Владимир Малигин рече: „Нашите мачки се навикнати да ловат глувци и да ги смируваат војниците“.
Некои руски војници биле заразени со треска од каснување од стаорец. Украинските војници исто така се пожалија на „Тајмс“ за глувците што џвакаат електрични жици и ги напаѓаат објектите за складирање храна на линијата на фронтот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
ЕУ воведе нов пакет санкции против Русија, главна цел им е руската „флота во сенка“

Европската унија усвои нов пакет санкции против Русија поради војната во Украина, насочени кон руската „флота во сенка“, хибридни закани и кршење на човековите права, потврди високиот претставник на ЕУ за надворешна политика, Каја Калас.
Во објава на платформата „Икс“, Калас напиша:
„ЕУ го одобри својот 17-ти пакет санкции против Русија, кој вклучува речиси 200 бродови од флотата во сенка. Новите мерки се однесуваат и на хибридни закани и кршење на човековите права. Нови санкции се во подготовка. Колку подолго Русија води војна, толку посилен ќе биде нашиот одговор“, напиша таа.
Што вклучува 17-тиот пакет санкции?
Цел на 200 бродови од таканаречената „флота во сенка“, која се користи за заобиколување на меѓународните ограничувања за извоз на руска нафта.
Санкции поврзани со хибридни закани, вклучувајќи сајбер напади, дезинформации и напади на критична инфраструктура во земјите на ЕУ.
Мерки против поединци и субјекти поврзани со кршење на човековите права во окупираните територии на Украина и во самата Русија.
И Велика Британија претходно денес воведе 100 нови санкции кон Русија, насочени кон воениот сектор, енергетиката и финансиските институции.
Свет
Речиси половина од младите во Велика Британија сакаат свет без интернет

Најновото британско истражување покажа дека речиси половина од младите луѓе на возраст меѓу 16 и 21 година би претпочитале да живеат во свет каде што нема интернет, објавија денес британските медиуми.
Во исто време, 50 проценти од анкетираните го поддржале ограничувањето на користењето интернет по 22 часот, а речиси 70 проценти рекле дека се чувствувале полошо по посетата на социјалните мрежи, објави „Гардијан“.
Истражувањето покажа дека една четвртина од анкетираните поминуваат четири или повеќе часа на ден на социјалните мрежи, а 42 процента рекле дека се согласуваат со своите родители за она што го прават онлајн.
Анкетата, во која учествувале 1.293 млади луѓе, исто така открила дека 42 процента од нив лажат за својата возраст додека се онлајн, како и дека 40 проценти имаат лажен профил, а 27 испитаници признале дека се преправаат оти се сосема друга личност додека се на социјалните мрежи.
Како што е наведено, 27 проценти од испитаниците рекле дека ја споделиле својата локација преку интернет со непознати луѓе, а 68 проценти процениле дека времето што го поминуваат преку интернет има негативен ефект врз нивното ментално здравје.
Истражувањето е спроведено откога британскиот министер за технологија, Питер Кајл, навести дека владата размислува за ограничување на времето поминато на некои апликации, како што се „Тик-ток“ и „Инстаграм“.
Одговорната за безбедноста на децата на интернет, Рани Говендер, вели дека оваа мерка може да помогне, но дека не може да ги заштити децата од штетна содржина, освен ако не се применат други мерки.
Таа додаде дека примарниот фокус на компаниите и владите треба да биде да се осигурат дека децата и младите користат многу побезбедни веб-страници, што создаваат помалку зависност.
Свет
Зеленски: Русија купува време, треба да се притисне со уште посилни санкции

Еден ден по телефонскиот разговор меѓу американскиот претседател Доналд Трамп и рускиот претседател Владимир Путин, украинскиот претседател Володимир Зеленски рече дека војната мора да заврши со преговори, но со реални и јасни предлози.
„Очигледно е дека Русија се обидува да купи време за да ги продолжи војната и окупацијата“, напиша Зеленски на апликацијата „Телеграм“.
Тој додаде дека Украина работи со партнерите за да го зголеми притисокот врз Москва.
„Санкциите се важни и благодарен сум им на сите што ги прават поопипливи за оние што ја почнаа војната“, вели Зеленски.
Тој повтори дека Украина е „подготвена за сите ефективни формати на преговори“, но и предупреди дека ако Русија продолжи да поставува нереални услови, мора да следуваат сурови последици.