Најмалку 31 лице загина денеска во Нигерија при стампедо пред црква во јужната држава Риверс, изјави портпаролката на полицијата, Грејс Ајринџ-Коко.

Стотици луѓе кои рано утринава дојдоа во црквата за да добијат храна ја скршија капијата, што предизвика стампедо, рече Иринге-Коко, пренесе Ројтерс.

„Луѓето доаѓаа порано, а некои станаа нетрпеливи… што доведе до газење. Полицијата е на терен и ја следи ситуацијата додека трае истрагата“, рече таа.

Поранешниот претседател на Украина, Петро Порошенко, бил спречен да ја напушти Украина за да учествува на состанокот на НАТО во Литванија, соопшти фракцијата на неговата партија.

Порошенко двапати бил запрен на граничниот премин со Полска додека одел на состанок на Парламентарното собрание на НАТО, се наведува во соопштението, пренесе Ројтерс.

Украинските медиуми објавија дека Порошенко не можел да ја помине границата поради технички проблеми со дозволата што му овозможува да ја напушти земјата.

„Порошенко ги доби сите формални дозволи за излез од Украина и беше вклучен во официјалната делегација на украинскиот парламент за овој настан“, соопшти неговата парламентарна фракција „Европска солидарност“.

Русија е подготвена да помогне во непречен извоз на жито од Украина, порачал рускиот претседател Владимир Путин во разговорите со францускиот претседател Емануел Макрон и германскиот канцелар Олаф Шолц, но прекинот на руската блокада на пристаништата го условил со укинување на санкции од страна на Западот.

„Русија е подготвена да помогне во изнаоѓањето начини за непречен извоз на житарки, вклучително и украински житарки од пристаништата на Црното Море“, се вели во соопштението на Кремљ.

Путин предупреди на опасноста од западните испораки на оружје за Украина и за дополнително дестабилизирање на ситуацијата.

„Рускиот претседател укажа на опасната природа на продолжувањето на големите испораки на западно оружје за Украина, предупредувајќи на ризиците од натамошна дестабилизација на ситуацијата и влошување на хуманитарната криза“, се вели во соопштението на Кремљ по телефонскиот разговор.

Шолц и Макрон го повикаа Путин да започне „сериозни директни преговори“ со украинскиот претседател Володимир Зеленски.

За време на осумдесетминутниот телефонски разговор со рускиот претседател, Макрон и Шолц „инсистираа на итен прекин на огнот и повлекување на руските војници“.

Според соопштението на германската влада, Макрон и Шолц „го повикале рускиот претседател на сериозни директни преговори со украинскиот претседател и за дипломатско решение на конфликтот“.