Полскиот претседател Карол Навроцки му порача на претседателот на Соединетите Американски Држави, Доналд Трамп, дека Русија не ги почитува договорите и дека на рускиот претседател Владимир Путин не може да му се верува, изјави раководителот на Бирото за меѓународна политика при Канцеларијата на полскиот претседател, Марцин Пшидач.

Пшидач во емисијата „Дебата Гоздири“ изјави дека Навроцки го пренел ова директно на Трамп за време на видеоконференцијата одржана по средбата на Трамп со украинскиот претседател Володимир Зеленски во резиденцијата Мар-а-Лаго, каде што се дискутираше за мировниот план за Украина, објави порталот „Полсат њуз“.

„На Владимир Путин не треба да му се верува – тоа беше кажано директно“, рече Пшидач.

Според него, Навроцки може да игра значајна улога во идните американско-руски разговори, бидејќи Трамп обрнува внимание на ставовите на соговорниците кои тој лично ги почитува.

Тој додаде дека ова може да го намали влијанието на, како што рече, „проруските наративи во Белата куќа“.

Пшидач се осврна и на внатрешните прашања во Полска, наведувајќи дека владата го менува својот пристап во спорот околу назначувањето службеници во безбедносните служби.

Тој потврди дека ќе има средба меѓу претставници на претседателот, Министерството за одбрана и координаторот на тајните служби, Томаш Сјемоњак.

Пшидач оцени дека министерот за одбрана Владислав Косињак-Камиш е подготвен за соработка и изрази надеж дека сличен пристап ќе се примени и во односите меѓу Претседателската палата и Министерството за надворешни работи, особено кога станува збор за назначување амбасадори.

Израелскиот премиер Бенјамин Нетанјаху и американскиот претседател Доналд Трамп се согласија дека палестинската милитантна група Хамас ќе добие рок од два месеци за разоружување, пишува израелскиот весник „Израел Хајом“, додавајќи дека доколку Хамас ги одбие условите за разоружување, израелската армија ќе преземе понатамошни чекори.

Според извештајот, договорено е и да се утврдат практични критериуми за разоружување, вклучително и уништување на широката мрежа од тунели под Појасот Газа.

Професионалните тимови на Израел и САД работат на јасна дефиниција за тоа што би претставувало практично разоружување на Хамас, објавува „Тајмс оф Израел“.

Во случај Хамас да не ги исполни условите за разоружување, одговорноста за понатамошниот тек на настаните ќе ја преземат израелските одбранбени сили.

„На Хамас ќе му биде даден многу краток период да се разоружа. Ако не го сторат тоа, како што ветија, ќе следи пекол“, рече Трамп по средбата со Нетанјаху.

Украинскиот претседател Володимир Зеленски се обидува со сите сили да ја задржи власта, а некои европски шефови на држави го поддржуваат на штета на сопствените земји, изјави денес претседателот на руската државна дума, Вјачеслав Володин.

„Зеленски се обидува со сите сили да остане на власт. Него го поддржуваат голем број европски шефови на држави, дури и на штета на сопствените земји“, рече Володин во интервју за телевизискиот канал „Россија-24“, пренесува ТАСС.

Според него, парите биле префрлени во Киев со надеж дека ќе бидат вратени од руски средства.

„Но, тие не успеале, а парите ги снема, беа украдени“, рече Володин.

Земјите од Европската унија и Г7 замрзнаа околу 300 милијарди евра руски средства, а учесниците на самитот на ЕУ не успеаја да се договорат за експропријација на замрзнатите руски средства што ќе се користат како „кредит за репарација“ за Украина.

„Евроклир“, група за инфраструктура на финансискиот пазар со седиште во Брисел, постојано се спротивставува на експропријацијата на руски средства, тврдејќи дека тоа би можело да доведе до тоа Русија да заплени европски или белгиски средства на други места во светот преку судски постапки, пренесуваат медиумите.