Свет
Руските медиуми: Министерот се самоуби откога Путин го разреши; Кремљ: Шокирани сме

Кремљ денес објави дека е шокиран од ненадејната смрт на поранешниот руски министер за транспорт Роман Старовоит неколку часа откога претседателот Владимир Путин го разреши.
Старовоит беше пронајден мртов во својот автомобил надвор од Москва со прострелна рана, а водечката хипотеза е дека си го одзел животот, рекоа државните истражители.
Кога беше прашан за смртта на Старовоит, портпаролот на Кремљ, Дмитриј Песков, рече дека Путин бил информиран за инцидентот и ја опиша веста како трагична и тажна. „Не може, а да не ги шокира обичните луѓе. Секако, и нас нè шокира. Во тек е истрага што ќе одговори на сите прашања“, рече Песков одбивајќи да шпекулира за причината за смртта на Старовоит.
Во претседателскиот декрет објавен вчера не е наведена причината за разрешувањето на Старовоит по нешто повеќе од една година на функцијата иако политичките аналитичари се сомневаат дека разрешувањето е поврзано со истрагата за корупција во Курскиот Регион, со кој тој некогаш управувал.
„Ројтерс“ не можеше независно да ги потврди овие сомневања, но извор од транспортната индустрија, кој сакаше да остане анонимен поради чувствителноста на случајот, рече дека позицијата на Старовоит била доведена во прашање со месеци поради скандалот со корупција.
Истрагата се фокусира на тоа дали 19,4 милијарди рубли (речиси 210 милиони евра), што беа наменети за зајакнување на границите на Русија со Украина во Курскиот Регион во 2022 година, биле правилно потрошени или дел од тие пари бил проневерен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Русија сака да се повлече од конвенцијата за забрана на тортура

Рускиот премиер Михаил Мишустин вчера потпиша резолуција со која бара Москва да се повлече од Европската конвенција за спречување на тортура, пишува Kyiv Independent.
Иако Русија формално останува потписник на конвенцијата, воените злосторства и тортурата на Русија врз украински цивили и војници се документирани постојано, додава Kyiv Independent.
Резолуцијата го повикува рускиот претседател Владимир Путин да ја повлече Русија од деценискиот договор.
„До претседателот на Руската Федерација се поднесува предлог за раскинување на Европската конвенција за спречување на тортура и нечовечко или понижувачко постапување или казнување“, се наведува во текстот на резолуцијата.
Дејствијата на Русија на окупираните украински територии дополнително го потврдуваат нејзиното непочитување на меѓународните механизми за заштита, според украинските медиуми.
Свет
Австралија: Иран нарача најмалку два антисемитски напади во нашата земја

Австралија денес објави дека ќе го протера амбасадорот на Иран во Канбера, а премиерот Ентони Албанезе го обвини Техеран за извршување на два антисемитски напади во клучните градови Сиднеј и Мелбурн.
Од почетокот на војната меѓу Израел и Газа во октомври 2023 година, австралиските домови, училишта, синагоги и возила беа цел на антисемитски вандализам и палење, пишува „Ројтерс“.
„Австралиската безбедносна агенција собра веродостојни разузнавачки информации дека иранската влада наредила најмалку два напади“, изјави Албанезе на прес-конференција.
„Иран се обиде да го прикрие своето учество, но ASIO верува дека стои зад нападите врз „Луис Континентал Кујн“ во Сиднеј на 20 октомври минатата година и синагогата Адас Израел во Мелбурн на 6 декември“.
Австралиската безбедносно-разузнавачка организација додаде дека е веројатно дека Иран наредил дополнителни напади.
„Ова беа вонредни и опасни акти на агресија оркестрирани од странска држава на австралиска почва“, рече Албанезе. „Ова беа обиди за поткопување на социјалната кохезија и сеење раздор во нашата заедница“.
„Австралија ја суспендираше својата амбасада во Техеран и сите дипломати се безбедни во трета земја“, рече Албанезе, додавајќи дека неговата влада ќе ја прогласи Иранската револуционерна гарда за терористичка организација.
Свет
Трамп најавува преименување на Пентагон: „Веројатно, за околу една недела“

Претседателот на САД, Доналд Трамп, денес посочи дека неговата администрација веројатно ќе го промени името на Министерството за одбрана во Министерство за војна во наредните денови.
Трамп рече дека официјалните лица веројатно ќе го вратат Пентагон на неговото постаро, поагресивно име за околу една недела. И тој и министерот за одбрана Пит Хегсет, постојано се жалат на промената на името што се случи по Втората светска војна, објавува Politico.
Министерството за војна постоеше од 1789 до 1947 година, кога администрацијата на Труман го подели одделот на Армија и Воздухопловни сили и го спои со тогаш независната Морнарица. Поранешниот претседател Хари Труман ја именуваше новата агенција на ниво на кабинет Министерство за одбрана.
Труман имаше намера промената на името да му даде на шефот на Пентагон поцентрализирана власт над одделните гранки на војската, особено Морнарицата, која уживаше значителна независност до крајот на Втората светска војна.
Трамп постојано алудираше на можноста за враќање на старото име во последните недели, нарекувајќи го Хегсет свој „министер за војна“ на самитот на НАТО во јуни и сугерирајќи дека промената е резултат на политичка коректност.
„Ако ја погледнете старата зграда до Белата куќа, можете да видите каде порано беше Министерството за војна. Потоа станавме политички коректни и го нарековме Министерство за одбрана“, рече тој.
Трамп посочи дека ребрендирањето е неизбежно. Но, на Пентагон веројатно ќе му треба одобрение од Конгресот за каква било промена на името, бидејќи министерството е основано со закон стар неколку децении.
„Не сакам само одбрана. Сакаме напад“, рече Трамп во Овалната соба.