Градоначалникот на Сеул, Парк Фон Сон, исчезна, а полицијата започна голема операција на потрага. Медиумите пишуваат дека политичарот оставил проштално писмо.

„Раша тудеј“ наведува дека Парк не се појавил на работа, а полицијата го пребарува подрачјето каде што е откриен сигналот на неговиот мобилен телефон.

Неговата ќерка ја известила полицијата дека тој исчезнал.

АП известува дека Парк ги откажал сите денешни состаноци, вклучително и оној со соработникот на претседателот на Јужна Кореја.

Парк е познат како адвокат и активист за човекови права и ова е неговиот трет мандат откако беше избран за градоначалник во 2011 година.

Амбасадата на САД во Белград соопшти дека со внимание ги следи настаните во Србија. Од таму наведуваат дека се длабоко загрижени за насилството на протестите што се одржаа вчера и завчера во Белград и други градови во Србија.

„Осудуваме секаков вид насилство, вклучувајќи, како што нам ни изгледа, и координирани напади врз полицијата кои делуваат како да сакаат да испровоцираат претерана реакција, како и, се чини, прекумерна употреба на сила од страна на полицијата“, пишува во соопштението.

Додаваат дека слободата на изразување и правото на мирно собирање се во основата на секоја демократија и дека Америка е земја која токму сега се соочува со предизвици во поглед на граѓанските протести и немири.

„Загриженоста и дебатата за суштината на овие работи во Србија и секаде во светот – за тоа како една земја да го сочува својот народ пред една од најсмртоносните пандемии на нашето време – се сериозна работа и мора да биде дел од смирена расправа на национално ниво. За да се покрене ваков дијалог во Србија, потребно е слободно медиумско опкружување и реформи во областа на владеење на правото“, пишува во соопштението.

Еден од најважните адвокати на премиерот на Израел, Бенџамин Нетанјаху, поднесе оставка.

Тој го стори тоа затоа што на неговиот клиент не му било дозволено да го финансира својот правен тим од приватни фондови.

Нетанјаху, на кого му се суди за корупција, што тој ја негира, побарал 2,9 милиони долари од неговиот пријател, американскиот милијардер Спенсер Патрих, за да ги покрие трошоците за адвокатите.

Сепак, по препораката на Врховниот израелски обвинител, Oдборот во канцеларијата на државниот контролор го спречил Нетанјаху да ги прими парите, објаснувајќи дека тоа би било несоодветен подарок за владин службеник.

На 70-годишниот израелски лидер, чиј личен имот се проценува на повеќе од 10 милиони долари, му беше наредено да врати и дел од парите што ги добил од неговиот братучед од САД, Нејтан Миликовски, за да ги покрие судските трошоци.

После тоа, адвокатот Миха Фетман поднесе оставка од правниот тим на Нетанјаху, а израелските медиуми објавија дека оставката е поврзана со пари и изгледите дека трошоците на Фетман нема да бидат покриени.

Извор директно поврзан со случајот синоќа за францускиот печат потврди дека заминувањето на Фатман е поврзано со одлуката на Одборот да го спречи Нетанјаху да прима пари од приватни фондови.