Ирачката воздушна база Аин ал Асад, во која се сместени американски трупи, рано утрово беше нападната од беспилотно летало.

Во нападот нема жртви, но направена е материјална штета, се додава во соопштението, пренесува АП. Како што се додава, по нападот избувнал пожар кој оштетил една зграда.

Портпаролот на коалицијата, полковник Вејн Марото на Твитер објави дека во нападот е оштетен хангар и додаде дека истрагата е во тек.

Засега никој не ја презеде одговорноста за нападот.

САД ги обвинија милитантните групи поддржани од Иран за претходните ракетни напади, насочени кон американските трупи во Багдад и воените бази низ Ирак.

Нападите со беспилотни летала се ретки, а последниот се случи во средината на април, кога беше погоден меѓународниот аеродром во Ирбил, во курдската област во северен Ирак, недалеку од базата на коалициските сили.

Дваесет и петгодишен Загребчанец бил фатен со украдени респиратори од Шведска кои сакал да ги препродава, објави „Индекс.хр“.

Момчето е осомничено дека во периодот од 8 март до 2 април 2021 година преку компанија од Косово за компанија со седиште во Загреб, во која тој е директор, набавило 24 медицински респиратори од Шведска во вкупна вредност од 350.000 евра.

„За време на кривичната истрага преку меѓународна соработка, беше потврдено дека респираторите биле украдени во Шведска, односно кражбата била пријавена на 15 февруари 2021 година за време на нивниот транспорт низ Шведска“, соопшти полицијата.

Се сомнева дека тој ја набавил медицинската опрема со намера да ја препродава во трети земји иако знаел или морал да знае дека респираторите се добиени со кривично дело.

Францускиот претседател, Емануел Макрон, ги обвини Велика Британија и САД за блокирање на извозот на вакцини против коронавирус, пишува британскиот весник „Телеграф“.

Макрон вели дека е подготвен да го разгледа повикот на американскиот претседател, Џо Бајден, производителите на вакцини за коронавирус да се одречат од патентните права, но истакна дека во глобалната борба против коронавирусот многу е поважно Вашингтон да ја укине забраната за извоз на вакцини.

„Денес, Англосаксонците блокираат многу состојки и вакцини, а 100 проценти од дозите произведени во САД се наменети за нивниот пазар“, нагласи Макрон, истакнувајќи дека ЕУ се бори вакцините да бидат јавно добро.